1 Kuya Waishimaeli wala wamghala Yosefu Misiri na wamuhutsa kwa Potifa, Potifa tsa akida wa Farao na tsa mkulu wa iwabetetsi wake. 2 IMNDEWA tsa kahamwe na Yosefu na kamtenda yaghendelele pfinoghile. Na Yosefu tsakakala mna ing'anda ya imkulu wake Mmisiri. 3 Imkulu wake kamwona Yosefu kahamwe ne Imulungu, na Imulungu kamwapfila yadahe kutenda ghoya mna chila chinu chayatendile. 4 Potifa tsakanoghelwa na Yosefu, kamwika yamsang'anile yeye mwenyegho, pfipfila kamwika yawe mwimilitsi wa ing'anda yake na ipfinu pfake pfose. 5 Kulawa Potifa hayamwikile Yosefu yawe mwimilitsi wa ing'anda yake na ipfinu pfose, IMNDEWA kapfibaliki pfose ipfili mng'anda mwa Mmisiri ayo na ipfili mumghunda mwake. 6 Potifa kamwing'a chila chinu chayali nacho chiwe mna ghamoko ghake naye Potifa ng'epfikitse baye mna chinu chochose, ila mna ichijo chake chiliyeka.

Yosefu tsakana lukuli lunoghile na chihanga ichideghete. 7 Hambele chidogho, ipinga wa imtwatsa wake tsakambama, kamlongela, "Wasa na nene!" 8 Yosefu tsakalema, kamlongela, "Bae! Mkulu wangu ng'epfikitsa baye mna chinu chochose ichili mng'anda mwake, ipfinu pfake pfose kangaya nene nipfilolese. 9 Mne ing'anda ino kuduhu imunu mkulu kubita nene. Mkulu wangu ng'angomile chinu chochose ila ghweghwe, kwaapfila ghweghwe kwa mwehe wake. Pfii lelo nende chinu chihile na nimtotsele Imulungu?" 10 Hata ka ipinga yula tsakaghendelela kumtewetsa Yosefu chila litsuwa, lekeni Yosefu tsakalema kuwasa naye na ng'amtegheletse baye.

11 Litsuwa limwe Yosefu tsakengila mng'anda kusang'ana, na mng'anda tsakuduhu imunu wowose. 12 Ipinga wa Potifa kamkinda Yosefu lighwanda lyake, kamlongela, "Utse tuwase!" Lekeni Yosefu kalileka lighwanda lyake mna ghamoko ghake, katsumila kunze. 13 Ipinga yula hayonile Yosefu kalileka lighwanda mna ghamoko ghake na katsumila kunze, 14 ipinga ayo kawakema iwatumwa wake, kawalongela, "Mtse mlole! Mheburaniya yuno iyamghulile mmale wangu kotuligha. Kengila mng'anda mwangu na kabama awase na nene, lekeni nidamilila. 15 Hayahulike nodamilila, kalileka ghwanda lyake, katsumila kunze."

16 Ipinga yula kalika ghwanda lya Yosefu mbaka mkulu wa Yosefu yoye. 17 Kuya kamlongela imbuli iila, "Mtumwa yuno Mheburaniya yumghulile, katsa mng'anda mwangu kunighela chinyala. 18 Lekeni hanidamilile, kalileka ghwanda lyake, katsumila kunze."

19 Imkulu ayo wa Yosefu hayahulike Yosefu pfayamtendele mwehe wake, tsakona maya. 20 Kamsola Yosefu, kamwika mchifungo. Tsakohighwa hanu hawohighwe woighwa we imfalume. 21 Lekeni IMNDEWA tsakahamwe na Yosefu, kambaliki, imkulu wa geretsa tsakanoghelwa naye. 22 Apfo kamsaghula Yosefu yawe imkulu wa woighwa wose na kulolesa ghose ighotendeka mghati. 23 Imkulu wa geretsa ng'asang'ane baye ne ichinu chochose chayamwing'ile Yosefu yachilolese, kwaapfila Imulungu tsa kahamwe na Yosefu na kamwapfila mna ghose ghayatendile.