1 Raheli hayonile ng'odaha baye kumwelekela Yakobu iwana, kamwonela chepfu mkulu wake. Kamlongela Yakobu, "Ngaya iwana, hela nitsakufa!"

2 Yakobu kamwonela maya Raheli kamlongela, "Nene si Imulungu baye. Imulungu iyo iyakutendile uleke ukweleka."

3 Kuya Raheli kalonga, "Ayuno ahano Biliha mtumwa wangu. Uwase naye, yanyelekele nene iwana. Nene nitsopata iwana kubitila yeye." 4 Apfo Raheli tsakamwing'a Yakobu mtumwa wake Biliha. Naye Yakobu kawasa naye. 5 Kuya Biliha kakinda inda, kamwelekela Yakobu mwana mmale. 6 Raheli kalonga, "Imulungu kanendela ghoya kahulika chililo changu, kangaya imwana." Apfo tsakamkema mwana ayo Dani. 7 Biliha kakinda keli inda, kamwelekelawa Yakobu imwana mmale. 8 Kuya Raheli kalonga, "Nitowa ng'ani na mkulu wangu, lekeni nihuma." Apfo tsakamkema imwana ayo Nafutali.

9 Lea hayonile kaleka ukweleka, kamwing'a Yakobu mtumwa wake Zilipa yawe ipinga wake. 10 Kuya Zilipa kamwelekela Yakobu imwana mmale. 11 Lea kalonga, "Aino ndondokela." Apfo tsakamkema imwana ayo Gadi. 12 Zilipa kamwelekela Yakobu imwana yungi mmale. 13 Kuya Lea kalonga, "Nibweda! Iwapinga wose watsonikema nibweda." Apfo tsakamkema imwana ayo Asheri.

14 Mna ghamatsuwa gha ukupfuna, Rubeni tsakaghenda kulwanda, ako tsakapata mitsitsi ya mbiki iughukemighwe mandilake, kamghalila Lea, mai wake mitsitsi ayo.

Raheli kamlongela Lea, "Chonde chonde ngaya chidogho mitsitsi ayo ye imwanagho." *

15 Lea kamwidika, "Apfi ghweghwe kwakwona pfidodo pfaunibokile mmale wangu, kuya sambi kobama usole mitsitsi ye imwanangu?"

Raheli kamlongela, "Ung'angaya mitsitsi ye imwanagho, chilo chino kutsowasa na Yakobu."

16 Mihe ila Yakobu hayang'ali yolawa kumghunda, Lea kaghenda kumbokela, kamlongela, "Kutsowasa na nene chilo chino, kwaapfila nikulihila ghweghwe kwa mitsitsi ye imwanangu." Apfo chilo chila Yakobu tsakawasa na Lea.

17 Imulungu kamtegheletsa Lea, naye kakinda inda, kamwelekela Yakobu imwana wa tano. 18 Kuya Lea kalonga, "Imulungu kanighweka, kwaapfila tsanimwing'a mmale wangu mtumwa wangu." Apfo kamkema imwana ayo Isakari. 19 Lea kakinda inda keli kamwelekela Yakobu imwana wa sita. 20 Kuya Lea kalonga, "Imulungu kanighweka pfinoghile. Lelo immale wangu katsonitoghola, kwaapfila nimwelekela imwana wa sita." Apfo tsakamkema imwana ayo Zabuloni. 21 Hambele keleka imwana pinga, tsakamkema Dina.

22 Kuya Imulungu ng'amsemwile baye Raheli, kamtegheletsa chayalombile, kamtenda yadahe kweleka iwana. 23 Raheli kakinda inda keleka imwana mmale, kalonga, "Imulungu kaleghusa chinyala changu." 24 Apfo tsakamkema imwana ayo Yosefu, kalonga, mana yake, "Imulungu yangaye imwana yungi mmale."

25 Raheli hamweleke Yosefu, Yakobu kamlongela Labani, "Ndekelele mbuye ukaye yetu, mna isi yangu. 26 Ngaya iwapinga wangu ne iwanangu, yanikusang'anile, nobama mbuke nawo. Kwomanya pfanikusang'anile ghoya."

27 Lekeni Labani kamlongela, "Undeke nonge chinu chimwe tanu, chondechonde uleke ukuka. Nimanya IMNDEWA kanibaliki kubitila ghweghwe." 28 Labani kalonga, "Nongele chubama nikulihe, nani nitsokuliha."

29 Yakobu kamlongela, "Kwomanya pfanikusang'anile na pfanikulolelesele iwanyama wako. 30 Ahala ng'ana nipfike ghweghwe tsakukala na pfinu pfidodo lekeni kulawa hanipfikile IMNDEWA kakubaliki, pfinu pfako pfongetseka sideke, kwokwose kwanighendile. Lelo tsuwachi nene hanitsoilolesa kaye yangu?"

31 Labani kamghutsa, "Nikwing'e choni?"

Yakobu kamwidika, "Uleke kungaya chinu chochose. Lekeni ung'anendela pfino, nitsoghendelela kuwalolesa iwanyama wako. 32 Leloli ndekelele nilute mna kingili lye iwanyama wako, nibaghule chila ng'olo yane madowadowa na mabaka, na chila ng'olo mtitu kulawa mna iwang'olo awo, na wamene wane madowadowa na mabaka. Iwanyama awo watsokuwa maliho ghangu. 33 Ghamatsuwa ighakutsa wende wangu utsakoneka ghendo hautsokutsa kulola maliho ghangu. Imene wowose iyalihela madowadowa au mabaka, au ng'olo wowose iyali si mtitu baye, ang'akwoneka mna iwanyama wangu, ayo katsopetighwa ka kebighwa."

34 Labani kamwidika, "Pfinogha, iwe ka pfaulongile." 35 Litsuwa lilila kawabaghula wamvulati wose wane mabaka na madowadowa, na mbughuma wose iwali na mabaka na madowadowa, na chila mnyama iyali na dowa tselu mlukuli, na iwang'olo wose watitu, kaweng'a iwanaghe wawalolese. 36 Labani tsakaghenda kukala kutali na Yakobu, utali wake tsaukala wa ghumwanza wa matsuwa madatu. Naye Yakobu yang'ali yowadima iwanyama wa Labani iwasighale. 37 Yakobu kasola tsifito mbisi tsa imibiki ya mlubina, mlotsi na mwalamoni, katsibambula ili misitali mitselu yoneke mna tsifito atso. 38 Kuya katsihomeka tsifito atso hanu ho ukunwela ghamatsi iwanyama. Na kwaapfila wanyama Ftsile kunwa ghamatsi wang'ali webebesela hanu hala, 39 wapata tombo hambele he tsifito atso, kuya weleka iwanyama wane imisitali, ghamabaka na madowadowa.

40 Yakobu kawabaghula iwang'olo awo kulawa mna iwamene, kuya kawatenda wawalolese iwanyama wala iwali ne misitari na watitu mna kingili lye iwanyama wa Labani. Kwa kutenda apfo kepatila kingili lyake mwenyegho, na kawabaghula iwanyama wake, kutali ne iwanyama wa Labani.

41 Kuya chila ghamatsuwa gha iwanyama wane ngupfu kutitsa haghapfikile, Yakobu katsika tsifito tsila hambele hawo hanu ha kunwela ghamatsi, ili webebesele habehi ne tsifito tsila. 42 Lekeni ng'atsikile baye tsifito tsila kuchughu mwe iwanyama iwalihela ngupfu. Apfo iwanyama iwalihela ngupfu tsawakala wa Labani, na iwanyama wane ngupfu tsawakala wa Yakobu. 43 Apfo Yakobu tsakapata mali nyingi. Tsakakala ne iwanyama wengi, iwatumwa, ngamiya na pfihongwe.