1 Nadabu na Abihu, wanaghe Aruni tsawasola chinu cha ukuhalila ghumoto ichikemighwa chetetso, chila munu kasola chake, weka ghumoto na mumo wadusula upfumba, wamlapfila IMNDEWA ghumoto ighughomighwe, na Imulungu ng'awalaghitse waghudusule apfo baye. 2 Bahala IMNDEWA kahulumsa ghumoto, ghuwalakatsa iwasongolo awo, nawo wafa baho hambele ha IMNDEWA. 3 Kuya Musa kamlongela Aruni, "Kwa chinu achino ichilawile IMNDEWA kakulangusa ghendo yang'ali yolonga choni ahala hayalongile, ‘Nitselangusa ka nene na Mwenzeluka kwa awala iwali habehi na nene, na nitsotunyighwa hambele ha iwanu wose.’ " Aruni kenyamala tulu.

4 Apfo Musa kawakema Mishaeli na Elisafani wanaghe Uzieli, aba wake mdodo Aruni, kawalongela waghende kusola mauti gha ndughu tsawo iwafile hane kaye yenzeluke, waighale kunze, kutali ne ndalo yawo. 5 Apfo watsa wasola mauti gha ndughu tsawo, waighala kunze, kutali na indalo yawo aku wapfala maghwanda ghawo ka Musa pfayalaghitse. 6 Kuya Musa kamlongela Aruni na iwanaghe Eriatsari na Isamari, "Mleke kuwalilila kwa kutsitimula tsimvili tsenu na kughadegha maghwanda ghenu, mng'atenda apfo, mtsakufa na IMNDEWA katsowaghudubukila iwanu wose. Lekeni ndughu tsenu, Iwaisiraeli wose, wodaha kuwalilila awo, iwakomighwe ne ghumoto ighulawile kwe IMNDEWA. 7 Mleke kulawa kunze mwa Lihema lya ukwitinganila, hela mtsakufa kwaapfila ghamapfuta ghayawaghelile IMNDEWA hamuhimikighwe muwe watambika ghang'ali mchanya mwenu." Aruni na iwanaghe tsawatenda ka Musa pfayalongile. 8 IMNDEWA tsakalonga na Aruni, 9 "Hamkwingila mng'anda mwe Lihema lya ukwitinganila, ghweghwe na iwanagho mleke ukunwa dipfai wala imbwali, mng'atenda apfo, mtsakufa. Ghweghwe mwenyegho ulikinde laghitso lino na watsukulu wako wose mna ghamatsuwa ghose ighakutsa. 10 Mwobamighwa mghatange aghala ighenzeluke na aghala ighali si ghenzeluka baye, ichihile na ichinoghie hambele he Imulungu, 11 namwe muwalangulitse Waisiraeli malaghitso ghose ghaniwalongele kubitila Musa." 12 Musa kamlongela Aruni ne iwanaghe weli iwakalile, Eliasari na Isamari, "Msole usaghe we ingano iukalile kulawa mna ipfijo ipfilapfighwa kwe IMNDEWA pfilakatsighwe, muije habehi na Matsabahu. Usaghe awo uleke kuwa na ihamila kwaapfila awo wenzeluka ghendo. 13 Mtsoija hanu haenzeluke kwaapfila acho chijo chako ghweghwe na iwanagho ichilawa mna ipfijo ipfilapfighwa kwe IMNDEWA pfilakatsighwe. Apfo pfipfo Imulungu pfayandaghitse. 14 Lekeni chidali na lihatsa ipfinulighwe mchanya hambele ha Imulungu, ghweghwe ne iwanagho iwamale na iwapinga mwodaha kupfija hanu hohose helile hatogholighwe ne Imulungu. Kwaapfila chidali na lihatsa kwikighwa ghweghwe ne wanagho pfiwe chijo chenu kulawa mna iwanyama iwolapfighwa na Waisiraeli ili wakale tseghamba ne Imulungu. 15 Lihatsa na chidali ipfinulighwe hambele he Imulungu, mwobamighwa mpfighale hamwe na ghamapfuta igholakatsighwa mmoto, mtsakwinula mchanya kulangusa ka pfose pfilapfighwa kwe Imulungu. Apfo pfose pfitsakuwa chijo chako, ghweghwe ne iwanagho, mna ghamatsuwa ghose ighakutsa ka IMNDEWA pfayalaghitse."

16 Kuya Musa kaghutsa kwayali mene iyalapfighwe na Waisiraeli ili Imulungu yawaleghusile nzambi tsawo. Na hayatangile ka imene ayo ma kalakatsighwa, kawonela maya Eliasari na Isamari, iwana wa Aruni iwakalile, kawaghutsa, 17 "Hebali ng'amumjile baye imene ayo hanu haenzeluke? Kwaapfila ayo kenzeluka ghendo, na Imulungu kamwing'ani mwemwe ili kuleghusa matotso ghe iwanu wose wa Isiraeli. 18 Kwaapfila idamu yake ng'aighalighwe baye mghati mwa hanu haenzeluke, mwemwe tsambamighwa muije inyama mghati mwa hanu haenzeluke ka pfanilaghitse." 19 Aruni kamwidika, "Ulole, leloli wanangu walapfa imnyama wa kuleghusa nzambi tse iwanu na walapfa imnyama wa kulakatsighwa hambele he IMNDEWA, lekeni aghano ghandawila nene, wanangu wakomighwa! Angu lelo Imulungu yang'atoghole ka ning'ajile imnyama wa kuleghusa nzambi tse iwanu iyalapfighwe leloli?" 20 Naye Musa hayaghahulike agho, tsakatogholela.