Lucas 8

49 Yesu hang’ali yolonga, tsakatsa imunu kulawa mne ing’anda ya Yairo. Kamlongela Yairo, "Uleke kumtsupfa Imlangulitsi."

50 Lekeni Yesu haulike apfo kamlongela Yairo, "Uleke kupfuka, ghwe toghola na imwanagho katsohonetsighwa."

51 Hapfikile ukaye kwa Yairo, kawaghoma iwanu waleke kwingila naye mng’anda, lekeni Petiri, Yohane, Jakobu, aba wa imwana yula iyafile na mai wake. 52 Wanu wose wang’ali womlila imwana iyafile akuno weyayana. Yesu kawalongela, "Mleke kulila, imwana ng’afile bae, ila kawasa!"

53 Iwanu wose wamseka Yesu kwaapfila tsawamanya imwana kafa. 54 Yesu kaghukinda ghumoko ghwe imwana iyafile, kamlongela, "Mwanangu, lamka!" 55 Imwana iyafile ughima wake umuyila, na bahala kalamka. Kuya Yesu kawalongela wamwing’e imwana yula ichijo. 56 Aba wake na mai wake tsawakangawala, lekeni Yesu kawaghoma kumlongela imunu wowose achila ichilawile.