उत्पत्ति 2

18 तब प्रभु परमेश्वर न कह्यो, "आदमी को अकेलो रहनो अच्छो नहीं; मय ओकी मदद लायी एक असो संगी बनाऊं जो ओको सी मेल खाये।" 19 ✝2:19 भजन 8:6येकोलायी प्रभु परमेश्वर जमीन सी कुछ माटी ली अऊर पूरो जनावरों अऊर आसमान को सब पक्षियों ख रच क आदमी को जवर आयो कि ऊ उन्को का का नाम रखेंन; अऊर जो जो जीन्दो प्रानी को जो जो नाम आदम न रख्यो उच ओको नाम होयेंन। 20 त ऊ आदमी न सब जाति को पालतु जनावरों, अऊर आसमान को पक्षियों, अऊर सब जाति को जंगली जनावरों को नाम रख्यो; पर आदमी लायी कोयी असो मदद करन लायी नहीं मिल्यो जो ओको सी मेल खाय सके।

21 तब प्रभु परमेश्वर न आदम ख गहरी नींद म डाल दियो, अऊर जब ऊ सोय गयो, ओन आदम की एक फसली निकाली अऊर मांस ख भर दियो। 22 अऊर प्रभु परमेश्वर न ऊ फसली ख जो ओन आदमी म सी निकाली होती, ओन एक बाई बनायी; अऊर ओख आदम को जवर लायो। 23 ✝2:23 उत्पत्ति 29:14तब ऊ आदम न कह्यो,

"अब यो मोरी हड्डियों म की हड्डी अऊर मोरो मांस म को मांस हय;

येकोलायी येको नाम ‘बाई’ होयेंन,

कहालीकि ओख आदम म सी बाहेर निकाली गयी हय।"

24 ✝ 2:24 मत्ती 19:5; मरकुस 10:7,8; १ कुरिन्थियों 6:16; इफिसियों 5:31 योच वजह हय कि आदमी अपनो माय बाप ख छोड़ क अपनी पत्नी सी मिल्यो रहेंन, अऊर हि एक जुट बन्यो रहेंन।