उत्पत्ति 36

एसाव की वंशावली

1 एसाव जो एदोम भी कहलावय हय, ओकी यो वंशावली हय। 2 ✝36:2 उत्पत्ति 26:34एसाव न त कनान देश की टुरियां सी बिहाव कर लियो; मतलब हित्ती एलोन की टुरी आदा ख, अऊर ओहोलीबामा ख जो अना की टुरी अऊर हिव्वी सिबोन की नातिन होती। 3 ✝36:3 उत्पत्ति 28:9तब ओन इश्माएल की टुरी बासमत ख भी, जो नबायोत की बहिन होती, बिहाव कर लियो। 4 आदा न एसाव को द्वारा एलीपज ख, अऊर बासमत न रूएल ख जनम दियो। 5 अऊर ओहोलीबामा न यूश, अऊर यालाम, अऊर कोरह ख पैदा करयो। एसाव को हिच टुरा कनान देश म पैदा भयो।

6 तब एसाव अपनी पत्नियों अऊर टुरा टुरियों, अऊर घर को सब प्रानियों, अपनी शेरी मेंढियों, गाय बईल अऊर सब जनावरों, निदान अपनी पूरी जायजाद ख, जो ओन कनान देश म हासिल करी होती, ले क अपनो भाऊ याकूब को जवर सी दूसरो देश ख चली गयो। 7 कहालीकि उन्की जायजाद इतनी भय गयी होती कि हि जमा नहीं रह्य सक्यो; अऊर जनावरों को बहुत होनो को वजह ऊ देश म, जित हि परदेशी होय क रहत होतो, हि उत समाय नहीं सक्यो। 8 एसाव जो एदोम भी कहलावय हय, सेईर नाम की पहाड़ी देश म रहन लग्यो।

9 सेईर नाम की पहाड़ी देश म रहन वालो एदोमियों को मूल आदमी एसाव की वंशावली या आय। 10 एसाव को टुरावों को नाम यो हंय; मतलब एसाव की पत्नी आदा को टुरा एलीपज,

अऊर वाच एसाव की पत्नी बासमत को टुरा रूएल। 11 एलीपज को हि टुरा भयो; मतलब तेमान, ओमार, सपो, गाताम, अऊर कनज। 12 एसाव को टुरा एलीपज की तिम्रा नाम की एक रखैल होती, जेन एलीपज को द्वारा अमालेक ख जनम दियो : एसाव की पत्नी आदा को वंश म हिच भयो। 13 रूएल को हि टुरा भयो; मतलब नहत, जेरह, शम्मा, अऊर मिज्जा : एसाव की पत्नी बासमत को वंश म हिच भयो।

14 ओहोलीबामा जो एसाव की पत्नी अऊर सिबोन की नातिन अऊर अना की टुरी होती, ओको हि टुरा भयो : मतलब ओन एसाव को द्वारा यूश, यालाम अऊर कोरह ख जनम दियो।

15 हि एसाव को वंशजों को मुखिया भयो : मतलब एसाव को बड़ो टुरा एलीपज को वंश म सी तेमान, ओमार, सपो, कनज मुखिया, 16 कोरह, गाताम, अमालेक मुखिया : एलीपज को वंश म सी, एदोम देश म हिच मुखिया भयो : अऊर हिच आदा को वंश म भयो।

17 एसाव को टुरा रूएल को वंश म हि भयो; मतलब नहत, जेरह, शम्मा, मिज्जा : रूएल को वंश म सी, एदोम देश म सी हि मुखिया भयो; अऊर हिच एसाव की पत्नी बासमत को वंश म भयो।

18 एसाव की पत्नी ओहोलीबामा को वंश म हि भयो; मतलब यूश, यालाम, कोरह, अऊर अना की टुरी ओहोलीबामा जो एसाव की पत्नी होती ओको वंश म हिच मुखिया भयो। 19 एसाव जो एदोम भी कहलावय हय, ओको वंश हिच आय, अऊर उन्को मुखिया भी हिच भयो।

सेईर की वंशावली

20 सेईर जो होरी नाम की जाति को होतो, ओको हि टुरा एदोम देश म पहिले सी रहत होतो : लोतान, शोबाल, सिबोन, अना, 21 दीशोन, एसेर, अऊर दीशोन : एदोम देश म सेईर को हिच होरी जाति को मुखिया भयो।

22 लोतान को टुरा, होरी अऊर हेमाम भयो; अऊर लोतान की बहिन तिम्रा होती।

23 शोबाल को हि टुरा भयो : आल्वान, मानहत, एबाल, शपो, अऊर ओनाम।

24 सिदोन को हि टुरा भयो : अय्या, अऊर अना; या वाच अना आय जेक जंगल म अपनो बाप सिबोन को गधा ख चरावत चरावत गरम पानी को झरना मिल्यो होतो। 25 अना को दीशोन नाम को टुरा भयो, अऊर वाच अना ख ओहोलीबामा नाम की टुरी भयी। 26 दीशोन को हि टुरा भयो : हेमदान, एश्बान, यित्रान, अऊर करान।

27 एसेर को हि टुरा भयो : बिल्हान, जाबान, अऊर अकान।

28 दीशोन को हि टुरा भयो : ऊस, अऊर अरान।

29 होरी जाति को मुखिया हि भयो : लोतान, शोबाल, सिबोन, अऊर अना मुखिया, 30 दीशोन, एसेर, दीशोन; सेईर देश म होरी जाति को हिच मुखिया भयो।

एदोम को राजा

31 तब जब इस्राएलियों पर कोयी राजा न राज्य नहीं करयो होतो, तब भी एदोम को देश म हि राजा भयो;

32 बोर को टुरा बेला न एदोम म राज्य करयो, अऊर ओकी राजधानी को नाम दिन्हाबा हय। 33 बेला को मरनो पर, बोस्रा नगर को रहन वालो जेरह को टुरा योबाब ओकी जागा पर राजा भयो।

34 योबाब को मरनो पर तेमानी जाति को देश को निवासी हूशाम ओकी जागा पर राजा भयो।

35 तब हूशाम को मरनो पर बदद को टुरा हदद ओकी जागा पर राजा भयो : यो उच आय जेन मिद्दानी जाति ख मोआब को देश म मार लियो, अऊर ओकी राजधानी को नाम अबीत हय।

36 हदद को मरनो पर मस्रेका नगर को निवासी सम्ला ओकी जागा पर राजा भयो।

37 तब सम्ला को मरनो पर शाऊल जो महा नदी को तट वालो रहोबोत नगर को होतो ऊ ओकी जागा पर राजा भयो।

38 शाऊल को मरनो पर अकबोर को टुरा बाल्हानान ओकी जागा पर राजा भयो।

39 अकबोर को टुरा बाल्हानान को मरनो पर

हदर ओकी जागा पर राजा भयो : अऊर ओकी राजधानी को नाम पाऊ हय; अऊर ओकी पत्नी को नाम महेतबेल हय, जो मेजाहब की नातिन अऊर मत्रेद की टुरी होती।

40 एसाव को वंशजों को मुखिया को कुलों अऊर जागा को अनुसार उन्को नाम हि आय : तिम्रा, अल्बा, यतेत मुखिया, 41 ओहोलीबामा, एला, पीनोन मुखिया, 42 कनज, तेमान, मिबसार मुखिया, 43 मग्दीएल, ईराम : एदोम वंशियों न जो देश अपनो कर लियो होतो, ओकी निवास की जागा म उन्को हिच मुखिया भयो; एदोम जाति को मूल आदमी एसाव हय।