उत्पत्ति 23

सारा की मृत्यु अऊर आखरी क्रिया को वर्नन

1 सारा एक सौ सत्ताईस साल की भयी; 2 तब सारा की मृत्यु किर्यतर्बा यानेकि हेब्रोन नगर म भयी। जो कनान देश म हय। तब अब्राहम न सारा की मृत्यु लायी शोक मनायो।

3 तब अब्राहम न अपनी पत्नी को शव को जवर सी उठ क हित्तियों सी कह्यो; 4 ✝23:4 इब्रानियों 11:9-13; प्रेरितों 7:16"मय त तुम्हरो बीच एक परदेशी अऊर अजनबी हय; मोख मरघट लायी अपनो इत जमीन देवो ताकि मय अपनी पत्नी को शव ख गाड़ सकूं।"

5 हित्तियों को सन्तानों न अब्राहम सी कह्यो, 6 "श्रीमान, तय हमरी बात सुन। तय हमरो बीच म बड़ो प्रधान हंय। तय जित चाहवय अपनी पत्नी ख हमरो अच्छो कब्र म गाड़ सकय हंय। हम म सी कोयी भी तोख अपनी पत्नी ख गाड़न लायी अपनो कब्र देन सी मना नहीं करेंन।"

7 तब अब्राहम उठ्यो अऊर ऊ देश को लोगों ख यानेकि हित्तियों ख झुक क नमस्कार करयो, 8 अऊर अब्राहम न उन्को सी कह्यो, "यदि तुम चाहवय हंय कि मय अपनी पत्नी ख माटी देऊं, तब मोरी एक बात अऊर मान लेवो अऊर तुम सोहर को बेटा एप्रोन सी मोरो लायी बिनती करो, 9 ताकि ऊ मकपेला की गुफा ख, जो ओकी जमीन की सीमा पर हय; ओको पूरो दाम ले क मोख बेच दे, ताकि ऊ तुम्हरो बीच म हमरो लायी एक मरघट की जागा हो।"

10 एप्रोन त हित्तियों को बीच उत बैठ्यो हुयो होतो, येकोलायी जितनो हित्ति ओको नगर को फाटक सी होय क अन्दर जात होतो, उन पूरो को आगु एप्रोन न अब्राहम सी कह्यो, 11 "हे मोरो स्वामी; मोरी बात सुनो; मय तोख ऊ गुफा जमीन सहित मोरो लोगों को आगु दे रह्यो हय; तय येको म अपनी पत्नी ख गाड़ दे।"

12 तब अब्राहम न फिर सी हित्तियों को आगु झुक क नमस्कार करयो। 13 अऊर ऊ उन्को सुनतो हुयो एप्रोन सी कह्यो, "यदि तय असो चाहे, त मोरी सुन ऊ जमीन को जो दाम हो, ऊ मय देनो चाहऊ हय; ओख मोरो सी ले ले, तब मय अपनी पत्नी को शव ख उत गाड़ सकूं।"

14 एप्रोन न अब्राहम ख यो उत्तर दियो, 15 "हे मोरो स्वामी, मोरी बात सुन; ऊ जमीन को दाम त चार सौ चांदी को सिक्का हय; पर ऊ मोरो अऊर तोरो बीच म का हय? तय अपनी पत्नी ख गाड़ दे।" 16 अब्राहम न एप्रोन की बात मान क ओख उतनो रूप्या की चांदी तौल क दे दियो, जितनो ओन हित्तियों को सुनतो म कह्यो होतो : चार सौ चांदी को सिक्का जो ऊ समय व्यापारियों को बीच म चलत होतो।

17 येकोलायी एप्रोन को ऊ जमीन अऊर गुफा, जो मकपेला म मम्रे को जवर होतो, अऊर जमीन को पूरो झाड़ जो ओको म अऊर ओको चारयी तरफ सीमा को अन्दर होतो, 18 ✝23:18 प्रेरितों 7:16सब अब्राहम ख दे दियो, जितनो हित्तियों नगर की फाटक पर जमा भयो होतो, उन पूरो को आगु वा सम्पत्ति अब्राहम को अधिकार म पक्की रीति सी आय गयी।

19 ओको बाद अब्राहम न अपनी पत्नी सारा ख मकपेला को जमीन की गुफा म गाड़ दियो, जो कनान देश को मम्रे मतलब हेब्रोन नगर म होतो। 20 यो तरह हित्तियों को द्वारा ऊ जमीन अऊर ओको म की गुफा मरघट को रूप म अब्राहम को अधिकार म दे दी गयी।