Gênesis 25

अब्राहम को दूसरो वंशज

1 तब अब्राहम न एक अऊर बाई सी बिहाव करयो जेको नाम कतूरा होतो। 2 ओन जिम्रान, योक्षान, मदना, मिद्यान, यिशबाक, अऊर शूह पैदा भयो। 3 योक्षान सी शबा अऊर ददान पैदा भयो; अऊर ददान को वंश म अश्शूरी, लतूशी, अऊर लुम्मी लोग भयो। 4 मिद्यान को बेटा एपा, एपेर, हनोक, अबीदा, अऊर एल्दा भयो, हि सब कतूरा की सन्तान भयो।

5 इसहाक ख त अब्राहम न अपनो सब कुछ दियो 6 पर अपनी रखेलियों*25:6 हाजिरा अऊर कतुरा सी पैदा भयो बेटा ख केवल उपहार दे क अपनो जीतो जी अपनो बेटा इसहाक को जवर सी पूर्व देश म भेज दियो।

अब्राहम की मृत्यु

7 तब अब्राहम की पूरी उमर एक सौ पचहत्तर साल की भयी 8 अब्राहम की लम्बी उमर म पूरो बुढ़ापा की स्थिति तक जीव छूट गयो; अऊर ऊ अपनो मरयो हुयो पूर्वजों म जाय क मिल्यो। 9 ओको बेटा इसहाक अऊर इश्माएल न, ओख मम्रे की पूर्व दिशा म मकपेला को गुफा म माटी दी, जो हित्ती सोहर को बेटा एप्रोन की जमीन म होती; 10 ✝25:10 उत्पत्ति 23:16या वाच जमीन आय, जेक अब्राहम न हित्तियों सी मोल ले लियो होतो; ओको म अब्राहम, अऊर ओकी पत्नी सारा, दोयी ख माटी दी गयी। 11 अब्राहम को मरन को बाद परमेश्वर न ओको बेटा इसहाक ख आशीष दी, जो लहैरोई नाम को कुंवा को जवर रहत होतो।

इश्माएल की वंशावली

12 अब्राहम को बेटा इश्माएल जो सारा की मिस्री दासी हाजिरा सी पैदा भयो होतो, ओकी वंशावली यो तरह हय। 13 इश्माएल को बेटावों को नाम यो तरह हय : इश्माएल को बड़ो बेटा नबायोत, फिर केदार, अद्बेल, मिबसाम, 14 मिश्मा, दूमा, मस्सा, 15 हदद, तेमा, यतूर, नापीश, अऊर केदमा। 16 इश्माएल को बेटा हिच भयो, अऊर इन्कोच नामो को अनुसार इन्को गांवो, अऊर छावनियों को नाम भी पड़्यो; अऊर हिच बारा अपनो अपनो कुल को प्रधान भयो। 17 इश्माएल की पूरी उमर एक सौ सैंतीस साल को हुयो; तब ऊ मर गयो, अऊर ऊ अपनो मरयो हुयो पूर्वजों म जाय क मिल्यो। 18 अऊर ओको वंश हवीला सी शूर तक, जो मिस्र देश को पूर्व म अश्शूर की रस्ता म हंय, बस गयो; अऊर उन्को भाग उन्को सब भाऊ-बन्धुवों को जवर पड़्यो।

इसहाक को टुरावों की उत्पत्ति को वर्नन

19 अब्राहम को टुरा इसहाक की वंशावली यो आय : अब्राहम सी इसहाक पैदा भयो; 20 अऊर इसहाक न चालीस साल को होय क रिबका सी, जो पद्दनराम को वासी, बतूएल की टुरी अऊर अरामी लाबान की बहिन होती, बिहाव कर लियो। 21 इसहाक की पत्नी रिबका बांझ होती, येकोलायी ओन रिबका लायी परमेश्वर सी बिनती करी; अऊर परमेश्वर न ओकी प्रार्थना सुनी, यो तरह ओकी पत्नी गर्भवती भयी। 22 ओको गर्भ म बच्चा आपस म लिपट क एक दूसरो ख मारन लग्यो। तब रिबका न कह्यो, "मोरी जो असीच दशा रहेंन त मय कसी जीन्दी रहूं?" अऊर वा यहोवा की इच्छा पूछन ख गयी।

23 ✝ 25:23 रोमियों 9:12 तब परमेश्वर न रिबका सी कह्यो,

"तोरो गर्भ म दोय जातियां हंय,

अऊर तोरी कोख सी निकल क दोय राज्य को लोग अलग अलग होयेंन,

अऊर एक राज्य को लोग दूसरो सी शक्तिशाली होयेंन,

अऊर बड़ो बेटा छोटो की सेवा करेंन।"

24 जब रिबका को जनम देन को समय आयो, तब मालूम भयो कि रिबका को गर्भ म जुड़वा बच्चा हंय। 25 पहिलो जो बच्चा पैदा भयो ऊ लाल निकल्यो, अऊर ओको पूरो शरीर बालों सी भरयो होतो; येकोलायी ओको नाम एसाव रख्यो गयो। 26 तब ओको पीछू ओको भाऊ अपनो हाथ सी एसाव की एड़ी पकड़्यो हुयो पैदा भयो; अऊर ओको नाम याकूब*25:26 अड़ंगा मारन वालो रख्यो गयो। जब रिबका न उन्ख जनम दियो तब इसहाक साठ साल को होतो।

एसाव द्वारा बड़ो टुरा होन को अधिकार बेचनो

27 तब हि टुरा बढ़न लग्यो, अऊर एसाव त जंगल म रहन वालो चतुर शिकारी होय गयो, पर याकूब सीधो आदमी होतो अऊर तम्बुवों म रहत होतो। 28 इसहाक एसाव द्वारा लायो शिकार को मांस खातो रहत होतो, येकोलायी ऊ ओको सी प्रेम रखत होतो; पर रिबका याकूब सी प्रेम रखत होती।

29 एक दिन याकूब जेवन लायी कुछ दार पकात होतो; अऊर एसाव जंगल सी थक्यो हुयो आयो। 30 तब एसाव न याकूब सी कह्यो, "ऊ जो लाल चीज हय, उच लाल चीज म सी मोख कुछ खिल्ला, कहालीकि मय थक्यो हय।" योच वजह ओको नाम एदोम भी पड़्यो।

31 याकूब न कह्यो, "अपनो बड़ो होन को अधिकार अज मोरो हाथ बेच दे।"

32 एसाव न कह्यो, "देख, मय त अभी मरन पर हय : येकोलायी यो अधिकार सी मोरो का भलो होयेंन?"

33 ✝ 25:33 इब्रानियों 12:16 याकूब न कह्यो, "मोरो सी अभी कसम खा," येकोलायी एसाव न ओको सी कसम खायी,

अऊर अपनो बड़ो होन को अधिकार याकूब को हाथ बेच डाल्यो 34 तब याकूब न एसाव ख रोटी अऊर पकायी हुयी मसूर की दार दी; अऊर ओन खायो पियो, अऊर उठ क चली गयो। यो तरह एसाव न अपनो बड़ो होन को अधिकार ख बेकार जान्यो।