लैव्यव्यवस्था 1

होमबलि की विधि

1 परमेश्वर न मूसा ख बुलाय क मिलाप वालो तम्बू म सी ओको सी कह्यो, 2 इस्राएलियों सी कह्य कि तुम म सी यदि कोयी आदमी परमेश्वर को लायी पशु को चढ़ावा चढ़ाये,

त ओको बलिपशु पालतु जनावर यां मेंढा-शेरियों को झुण्ड म सी एक को हो। 3 "यदि ऊ गाय-बईलों म सी होमबलि करे, त निर्दोष नर मिलाप वालो तम्बू को द्वार पर चढ़ाये कि परमेश्वर ओख स्विकार करे। 4 ऊ अपनो हाथ होमबलिपशु को मुंड पर रखे, अऊर ऊ ओको लायी प्रायश्चित कर क् स्विकार करे। 5 तब ऊ बछड़ा ख परमेश्वर को आगु बलि करे; अऊर हारून को टुरा जो याजक हंय हि खून ख वेदी को जवर लिजाय क ऊ वेदी को चारयी तरफ छिड़के जो मिलाप वालो तम्बू को फाटक पर हय।" 6 फिर ऊ होमबलिपशु की खाल निकाल क ऊ पशु ख तुकड़ा-तुकड़ा करे; 7 तब हारून याजक को टुरा वेदी पर आगी रखे, अऊर आगी पर लकड़ी सजाय क रखे; 8 अऊर हारून को टुरा जो याजक हय हि मुंड अऊर चरबी समेत पशु को टुकड़ा ख ऊ लकड़ी पर जो वेदी की आगी पर होना सजाय क रखे; 9 अऊर ऊ ओकी आंतड़ियों अऊर पाय ख पानी सी धोये। तब याजक सब ख वेदी पर जलाये कि ऊ होमबलि परमेश्वर को लायी सुखदायक सुगन्ध वालो बलिदान ठहरे।

10 यदि ऊ झुण्ड म सी मेंढी यां शेरियों की होमबलि चढ़ाये त पूरो तरह सी स्वस्थ नर जनावर ख चढ़ाये; 11 अऊर ऊ ओख परमेश्वर को आगु वेदी को उत्तर को तरफ बलि करे; अऊर हारून को टुरा जो याजक हंय हि ओको खून ख वेदी को चारयी तरफ छिड़के। 12 अऊर ऊ ओख तुकड़ा-तुकड़ा करे, अऊर मुंड अऊर चरबी ख अलग करे, अऊर याजक इन सब ख ऊ लकड़ी पर सजाय क रखे जो वेदी की आगी पर होना; 13 अऊर ऊ ओकी आंतड़ियों अऊर पाय ख पानी सी धोये। अऊर याजक सब ख जवर लिजाय क वेदी पर जलाये कि ऊ होमबलि अऊर यहोवा को लायी सुखदायक सुगन्ध वालो बलिदान ठहरे।

14 यदि ऊ परमेश्वर को लायी पक्षियों की होमबलि चढ़ाये, त पण्डुकों यां कबूतरों को चढ़ावा चढ़ाये। 15 याजक ओख वेदी को जवर लिजाय क ओको गलो मुरकट क मुंड ख धड़ सी अलग करे, अऊर वेदी पर जलाये; अऊर ओको पूरो खून ऊ वेदी को बाजू म गिरायो जाये; 16 अऊर ऊ ओकी गल-थैली ख पंखों क वेदी को पूर्व को तरफ राख डालन को जागा पर फेंक दे; 17 अऊर ऊ ओख पंखा को बीच सी फाड़े, पर अलग-अलग नहीं करे। तब याजक ओख वेदी पर ऊ लकड़ी को ऊपर रख क जो आगी पर होना जलाये कि ऊ होमबलि अऊर परमेश्वर को लायी सुखदायक सुगन्ध वालो बलिदान ठहरे।