प्रसूता को शुद्धिकरन की विधि
1 फिर परमेश्वर न मूसा सी कह्यो, 2 इस्राएलियों सी कहो: जो बाई गर्भवती होय क बच्चा ख जनम देवय हय त वा सात दिन तक अशुद्ध रहेंन; जसी वा मासिक धर्म को समय अशुद्ध रह्य हय। 3 अऊर आठवों दिन बच्चा को खतना करयो जाय। 4 फिर वा बाई अपनो शुद्ध करन वालो रक्तस्राव म तैतीस दिन रहे; अऊर जब तक ओको शुद्ध होय जान को दिन पूरो नहीं होय जाये तब तक वा नहीं त कोयी पवित्र चिज ख छुयेंन, अऊर नहीं पवित्र जागा म जाय।
5 यदि वा टुरी ख जनम देवय हय, त वा चौदा दिन तक अशुद्ध रहेंन, जसी वा मासिक धर्म म रह्य हय, वा अपनो शुद्धिकरन को रक्तस्राव म छैसठ दिन तक रहेंन।
6 जब ओको शुद्ध होय जान को दिन पूरो होय जाये, तब ओख टुरा होय यां टुरी होय, वा होमबलि को लायी एक साल को मेंढा को बच्चा, अऊर पापबलि को लायी कबूत्तर को एक बच्चा यां पण्डुक मिलाप वालो तम्बू को फाटक पर याजक को जवर लाये। 7 तब याजक ओख परमेश्वर को सामने भेंट चढ़ाय क ओको लायी पश्चाताप करे; अऊर वा अपनो रक्तस्राव सी शुद्ध होय जायेंन। जो बाई ख टुरा यां टुरी पैदा होय ओको लायी याच व्यवस्था हय।
8 "अऊर यदि ओको जवर मेंढा यां शेरी देन लायी धन नहीं होना, त दोय पण्डुक यां कबूत्तर को दोय बच्चा, एक होमबलि को लायी अऊर दूसरो पापबलि को लायी दे; अऊर याजक ओको लायी पश्चाताप करेंन, तब वा शुद्ध ठहरेंन।"