लैव्यव्यवस्था 8

हारून अऊर ओको टुरावों को अभिषेक

1 फिर परमेश्वर न मूसा सी कह्यो, 2 "तय हारून अऊर ओको टुरावों को कपड़ावों, अऊर अभिषेक को तेल, अऊर पापबलि को बईल, अऊर दोयी मेंढावों, अऊर अखमीरी रोटी की टोकनी ख, 3 मिलाप वालो तम्बू को फाटक पर ले आव, अऊर वहांच पूरी मण्डली ख जमा कर।"

4 परमेश्वर की या आज्ञा को अनुसार मूसा न करयो; अऊर मण्डली मिलाप वालो तम्बू को फाटक पर जमा भयी। 5 तब मूसा न मण्डली सी कह्यो, "जो काम करन की आज्ञा परमेश्वर न दी हय वा या आय।"

6 फिर मूसा न हारून अऊर ओको टुरावों ख जवर लाय क पानी सी नहलायो। 7 तब ओन हारून ख कुरता पहिनायो, अऊर कुरता ख कमर पट्टा सी कस दियो। ओख अंगरखा पहिनायो। अऊर एपोद*8:7 याजक को कपड़ा डाल्यो, अऊर कलात्मक ढंग सी बुन्यो हुयो एपोद को पट्टा सी ओख बान्ध क कस दियो। 8 अऊर ओन चपरास लगाय क सिनाबन्ध म ऊरीम अऊर तुम्मीम रख दियो। 9 तब ओन ओको मुंड पर फेटा बान्ध क फेटा को आगु सोना की पट्टी ख मतलब पवित्र मुकुट ख लगायो, जो तरह परमेश्वर न मूसा ख आज्ञा दी होती।

10 तब मूसा न अभिषेक को तेल ले क निवास को अऊर जो कुछ ओको म होतो उन सब को भी अभिषेक कर क् उन्ख पवित्र करयो। 11 अऊर ऊ तेल म सी कुछ ओन वेदी पर सात बार छिड़क्यो, अऊर पूरो सामान सहित वेदी को अऊर पाया समेत गंगार को अभिषेक कर क् उन्ख पवित्र करयो। 12 अऊर ओन अभिषेक को तेल म सी कुछ हारून को मुंड पर डाल क ओको अभिषेक कर क् ओख पवित्र करयो। 13 तब मूसा न हारून को टुरावों ख जवर लाय क, अंगरखा पहिनाय क, अऊर कमर पट्टा बान्ध क उन्को मुंड पर टोपी रख दियो, जो तरह परमेश्वर न मूसा ख आज्ञा दी होती।

14 तब ऊ पापबलि को बईल ख जवर लाय क; अऊर हारून अऊर ओको टुरावों न अपनो अपनो हाथ पापबलि को बईल को मुंड पर रखे। 15 तब मूसा न ओख बलि करयो, अऊर मूसा न खून ले क बोट सी वेदी को चारयी सींगो पर लगाय क पवित्र करयो, अऊर खून ख वेदी को पाया पर कुड़ाय दियो, अऊर ओको पाप झाके अऊर ओख पवित्र करयो। 16 अऊर मूसा न अतड़ियां पर की चरबी, अऊर कलेजा पर की झिल्ली, अऊर चरबी समेत दोयी गुड़दावो ख ले क वेदी पर जलायो। 17 पर बईल म सी जो कुछ बच्यो रह्य गयो ओख, मतलब गोबर समेत ओकी खाल, मांस अऊर मांस ख छावनी सी बाहेर आगी म जलायो, जो तरह परमेश्वर न मूसा ख आज्ञा दी होती।

18 तब मूसा न होमबलि लायी मेंढा ख लायो, हारून अऊर ओको टुरावों न ऊ मेंढा को मुंड पर अपनो हाथ रखे। 19 मूसा न ओख बलि करयो, अऊर येको खून ख वेदी को चारयी तरफ छिड़क दियो। 20 उन्न यो मेंढा को तुकड़ा तुकड़ा करयो अऊर मूसा न ओको मुंड, ओको टुकड़ावों अऊर चरबी ख जलाय दियो। 21 मूसा न अतड़ियां अऊर पाय ख पानी सी धोय क पूरो मेंढा ख वेदी पर जलायो; अऊर ऊ सुखदायक सुगन्ध देन लायी होमबलि अऊर परमेश्वर लायी बलिदान भय गयो, जो तरह परमेश्वर न मूसा ख आज्ञा दी होती।

22 तब मूसा न दूसरो मेंढा ख जो अभिषेक को मेंढा होतो जवर लायो, अऊर हारून अऊर ओको टुरावों न अपनो अपनो हाथ मेंढा को मुंड पर रख्यो। 23 तब ऊ बलि करयो गयो, अऊर मूसा न ओको खून म सी कुछ ले क हारून को दायो कान को कोना पर अऊर ओको दायो हाथ अऊर दायो पाय को अंगूठा पर लगायो। 24 अऊर ऊ हारून को टुरावों ख जवर ले गयो, अऊर खून म सी एक-एक को दायो कान को कोना पर अऊर दायो हाथ अऊर दायो पाय को अंगूठा पर लगायो; अऊर मूसा न खून ख वेदी पर चारयी तरफ छिड़क्यो। 25 अऊर ओन चरबी, अऊर चरबीदार पूछ, अऊर अतड़ियों पर की सब चरबी, अऊर कलेजा पर की झिल्ली समेत दोयी गुड़दा, अऊर दियो जांघ, हि सब ले क अलग रखे। 26 अऊर अखमीरी रोटी की टोकनी जो परमेश्वर को आगु रखी गयी होती ओको म सी एक अखमीरी रोटी, अऊर तेल सी सान्यो हुयो मैदा को एक सुवारी, अऊर एक सुवारी ले क अऊर चरबी दायो जांघ पर रख दियो। 27 अऊर या सब चिजे हारून अऊर ओको टुरावों को हाथों पर रख दी गयी, इन्ख परमेश्वर ख चढ़ावन की भेंट मान क परमेश्वर को आगु हिलायी गयी। 28 तब मूसा न उन्ख फिर उन्को हाथों पर सी ले क उन्ख वेदी पर जलायो, यो सुखदायक सुगन्ध देन लायी अभिषेक की भेंट अऊर परमेश्वर लायी अग्निबलि होती। 29 तब मूसा न छाती ख ले क हिलावन की भेंट को रूप म परमेश्वर को सामने हिलायो। अभिषेक को मेंढा म सी मूसा को हिस्सा होतो; जसो परमेश्वर न मूसा ख आज्ञा दी होती।

30 तब मूसा न अभिषेक को तेल अऊर वेदी पर को खून, दोयी म सी कुछ ले क हारून अऊर ओको कपड़ा पर, अऊर ओको टुरावों अऊर उन्को कपड़ा पर भी छिड़क्यो; अऊर ओन कपड़ा समेत हारून ख भी पवित्र करयो।

31 तब मूसा न हारून अऊर ओको टुरावों सी कह्यो, "मांस ख मिलाप वालो तम्बू को फाटक पर पकावों, अऊर वा रोटी ख जो अभिषेक की टोकनी म हय उतच खावो, जसो मय न आज्ञा दी हय कि हारून अऊर ओको टुरा ओख खाये। 32 अऊर मांस अऊर रोटी म सी जो बच्यो हुयो ख आगी म जलाय देवो। 33 अऊर जब तक तुम्हरो अभिषेक को दिन पूरो नहीं होय जाये तब तक, मतलब सात दिन तक मिलाप वालो तम्बू को फाटक को बाहेर मत जाजो, कहालीकि ऊ सात दिन तक तुम्हरो अभिषेक करतो रहेंन। 34 जो तरह अज करयो गयो हय वसोच करन की आज्ञा परमेश्वर न दी हय, जेको सी तुम्हरो पाप झाक्यो जायेंन। 35 येकोलायी तुम मिलाप वालो तम्बू को फाटक पर सात दिन अऊर सात रात ठहरे रहजो, ताकि तुम मर नहीं जावो; कहालीकि असीच आज्ञा मोख दी गयी हय।" 36 तब परमेश्वर की याच सब निर्देश आज्ञावों को अनुसार जो ओन मूसा सी दी होती हारून अऊर ओको टुरावों न करयो।