1 Rəkɔ, e wə̈ra tə̂ e tə̂ adongo aəmbrʉ aərə nɔ̂, tə̂ əpʉ kə frɔ ətshe nɔ̂, də əpʉ ama bishi, də əpʉ kə za tshelə gâ tə̂ əzü gâ ndə əpʉ kə pa tə̂ ətshe nɔ̂. 2 Mata aə̂ngê aneshe, e mä əgo Əpʉ Ndjapä a pa də əgo djatra kʉtə̂ ə̂ngû angɔ, kanika, tə̂ äwä nə, e gerə ndə kə pa Ndjapä she e lə kuzu. 3 Mbrə ə̂në, «e djî atshɔ ə̂rɔ̂tə̂ Âgbɔ̂ Əyïngerə gâ ye»*, mata ə̂në Fraka nə̂ Ndjapä pâ gâ ye kɔ.

4 E gï tə̂ e trö tə̂ Âgbɔ̂ Əyïngerə nə, tə əkpʉ ə̂në ə sə tə sorô kɔ, ə̂në azü wə̂ra tə̂ əndje tə̂ nə gâ ye kɔ, bale ə̂në Ndjapä kê gâ ye â sə tə ə̈bə̈ əgerə ə̂rɔ̂ ərə lə ala ye gâ ye kɔ. 5 Bale, e-e də ə̂tə̂ e, mata aəkpʉ ə̂në ə sə də sorô kɔ, e mbrə̈ ndə kə pa Ndjapä ko e ə mbrə də anda nə̂ Âgbɔ̂ Yîrə̂. Rəkɔ, e sə kə do tə̂ e tə aangbɔ aawotokrɔ ə̂në əndje sə kpî kɔ, kanika e to aəkrɔ tə̂ äwä Yîrə̂ nə, ə̂në ə fʉ tə̂ Ndjapä nə, tə̂ äwä Jezu Kristə nə kɔ; 6 mbrə ə̂në əndje tâ gâ lə Fraka nə̂ Ndjapä ə pa:

«E lïshi-a! Mə sə kə za ə̈bə̈ əkpʉ tshelə ə̂ngʉ̂ anda tɔ mâ lə gala Siɔ,

əkpʉ ə̂në mə kê gâ ye â sə tə âgbɔ̂ ərə lə ala əmə kɔ,

â əzü ə̂në tshə za lɔsu ye kə ətshə,

gana sə sə kə ngɔ ətshə bale ne.»*

7 Rəkɔ, e sə kə lʉ lə ala azü, e-e ə̂në e za lɔsu e kə Ndjapä nə kɔ. Bale, ənə̂ əndje ə̂në əndje zâ lɔsu əndje zâ kə Ndjapä nə ne kɔ,

«əkpʉ nə ə̂në aawombrə anda nə wə̂ra tə̂ əndje tə̂ nə gâ ye kɔ,

kə dô tə̂ ye tə âgbɔ̂ əkpʉ ə̈nü anda nə.»*

8 Fraka nə pâ tə̂ ə̈bə̈ ətshe ə pa:

«Ə sə tə əkpʉ ə̂në azü sə kə ko aə̈nü əndje trɔ nə,

əkpʉ ə̂në azü sə kə te tə̂ nə.»*

Azü nə sə kə ko aə̈nü əndje trɔ nə mbrə ə̂në əndje wə̂ra tə̂ əndje ndə kə yində Əpʉ Ndjapä də lɔsu əndje gâ ye, â ərə ə̂në əndje gâmba əndje gâ ye mbrə nə kɔ kə sə̂.

9 Bale ənə̂ e, e sə tə angwa ə̂në Ndjapä kê gâ ye, tə aangbɔ aawotokrɔ nə̂ Əyïngerə, tə marä ə̂në ə sə kpî, tə azü ə̂në Ndjapä kô e tə ənə̂ ye gâ ye. Tshə kê e nə ndə kə pa e mʉ əpʉ aâgbɔ̂ aərə nə̂ ətshə ə̂në tshə ê e lə əbutshe ndə kə ro gâ tə̂ ə̂yîtshe nə̂ ye ə̂në kumu azü kpe pâ əndu əndje tə̂ nə kɔ. 10 E-e ə̂në, leme-e, e sə̂ sə̂ tə marä nə̂ ye ne kɔ, bale kpəsəye, e sə tə azü nə̂ Ndjapä; e-e ə̂në Ndjapä wû əyo e wû leme-e ne kɔ, bale kpəsəye, tshə wû əyo e gâ ye.

11 Alaye ə̂në mə yində e wââ kɔ, e sə mata ayirə də atshângâ pâ ashɔ səye. Âdârə ə̂në mə sə kə pa kə e ə pa e ru tshelə e tə̂ aəgo lɔsu əzü ə̂në ə sə kə mbrə awlra gâ tə̂ e kɔ. 12 E mbrə̈ tə̂ e də äwänə lə takpa tə̂ azü ə̂në əndje wusə̂ Ndjapä wu ne kɔ, ndə kə pa, ə̂në əndje sə kə lea e ə pa e sə kə mbrə əmbrʉ ərə kɔ, əndje wu aə̂rɔ̂ aərə ə̂në e sə kə mbrə nə kɔ ka ə mbe Ndjapä tə̂ alɔ ə̂në tshə sə kə yi kumu ye.

13 Mbrə Âgbɔ̂ Əyïngerə, e djï əpʉ ama əgbro azü əgɔ nɔ̂, e djï əpʉ ama əyïngerə əgɔ, ə̂në tshə sə gâ pâ azü nɔ̂ kɔ, 14 ə djï ndje əpʉ ama akomandâ əgɔ ə̂në əyïngerə nə wlâ əndje ndə kə wa ngbanga gâ pâ azü ə̂në əndje sə kə mbrə əmbrʉ ərə kɔ, bale ndə kə tra azü ə̂në əndje sə kə mbrə ə̂rɔ̂ ərə kɔ. 15 Mbrə ə̂në ərə ə̂në tshelə Ndjapä yində nə kɔ, kə də̂ ə pa e sə kə mbrə ə̂rɔ̂ ərə ka azü ə̂në kprangasha əndje sə sə tə̂ nə ne, ə̂në əndje wusə̂ ərə wu ne kɔ, əndje sə sə də əpʉ kə pa nə ne. 16 E mbrə̈ tə̂ e tə azü ə̂në əndje sə sə tə akanga ne kɔ, bale kə sə e tə aamba azü nə sə sə tə ə̈bə̈ ərə ndə kə pa e mbrə əmbrʉ ərə tshekudu nə ne; e mbrə̈ tə̂ e tə akanga nə̂ Ndjapä. 17 E lʉ̈ azü nɔ̂, ə yïndə alaye e; e kpë awa Ndjapä ə lʉ̈ əyïngerə əgɔ nə.

18 Alayïkosəra, e djï əpʉ ama aâgbɔ̂ azü nə̂ e ə kpë awa əndje rô pâ nə. E djï djï kʉtə̂ əpʉ ama əndje nə sə̂ ə̂në əndje sə tə aə̂rɔ̂ azü â sə kə yində e kɔ ne, bale e djï ndje əpʉ ama əndje nə sə̂ ə̂në əndje gbɔ ə gbɔ kɔ. 19 Mbrə ə̂në ə sə tə ə̈bə̈ ə̂rɔ̂ ərə ndə kə pa e kânga tshelə e lə kə wu aəyo, mbrə rawa Ndjapä, alɔ ə̂në âdâ aəyo nə sə sə tə̂ nə ne kɔ. 20 Rəkɔ, kədə e mbrə ə̈bə̈ nyaka â əndje da e mbrə nə â e ru ə ru lə nə, əde kə tra e? Bale kədə e mbrə ə̂rɔ̂ ərə â sə kə wu əyo mandânə â ru ə ru, ə sə tə ə̂rɔ̂ ərə lə ala Ndjapä. 21 Mbrə ərə səkɔ də̂ Ndjapä ê e kɔ, mbrə ə̂në Kristə ndje wû əyo mbrə e gâ ye, ə yisə̂ äwä nə kə e, kanika e za kʉtə̂ tshelə əndʉ ye. 22 Tshə mbrə̂ ə̈bə̈ nyaka mbrə̂ bale ne, â əndje sɔ̂tə̂ ə̈bə̈ əpʉ kə frɔ ətshe sɔ̂ lə ama ye bale ne. 23 Azü gû ətshə, tshə gû ə̂gû gû mandânə ne; əndje gî əyo tə̂ ye, tshə ngâ ngâ bale ne, bale tshə zâ tə̂ ye gâ lə kəna ətshə ə̂në tshə wa ngbanga də äwänə kɔ. 24 Tshə kô anyaka nə̂ əzə̂ də ə̂tə̂ ye gâ pâ ye, tə̂ tshekotə̂ ye, la masheyɔ gâ ye, kanika, ə̂në a tshû tə̂ nyaka gâ ye kɔ, a sə də sorô mbrə kə mbrə ərə də äwänə. Tə̂ äwä aəku nə̂ ye də̂ arəka nə̂ e nglɔ̂ gâ ye kɔ. 25 Mbrə ə̂në e sə̂ leme-e mata andalimi ə̂në əndje yû gâ ye kɔ, bale kpəsəye, e dô tə̂ e gu nə gâ tə̂ awoyisə̂ äwä kə e də awobata e gâ ye.*