1 Kandää, mə pa: alɔ ə̂në əyïnga aərə mandâ abä nə daka pə tə əgblə, tshə sə sə kpî tə̂ kanga ne, ə̂në tshə sə tə əyïnga aərə nɔ̂ kɔ. 2 Tshə sə kə sə gâ tshekudu aawobata ətshə də aawobata aərə nə̂ ye nə ʉrrr ndjɔ gâ tə̂ alɔ ə̂në abä nə dɨ̂ gâ ye kɔ. 3 Əzə̂ ndje, alɔ ə̂në a sə̂ pə mata aneshe kɔ, a sə tə akanga aawlra tshepashɔ. 4 Bale, ə̂në alɔ nə lî gâ ye kɔ, Ndjapä nə wlâ Ɨrɨ nə, ə̂në yashe kə zû ətshə, tshekudu âgbɔ̂ əpʉ nə̂ Mayïzə kɔ, 5 ndə kə pa tshə tshɔ azü ə̂në əndje sə tshekudu âgbɔ̂ əpʉ nə kɔ, kanika əzə̂ do tə̂ əzə̂ tə aləvu Ndjapä.

6 Â mbrə ə̂në e sə tə aləvu nə kɔ, Ndjapä nə wlâ Âgbɔ̂ Yîrə̂ nə̂ Ɨrɨ nə gâ tə̂ lɔsu əzə̂ nɔ̂, ə̂në tshə sə kə ta râwâ ə pa: «Abba! Abä!» 7 Rəkɔ, bə sə sə kwatə̂zə tə kanga ne, bale, bə sə tə ɨrɨ nə; â kədə bə sə tə ɨrɨ nə, Ndjapä ə ko aərə ə̂në tshə gâmba mbrə aləvu nə kɔ kə əbə je ndje.

8 Leme-e, e wûsə̂ Ndjapä wû ne â e sə̂ tə akanga nə̂ andjapä ə̂në əndje sə sə ngâ tə andjapä ne kɔ. 9 Bale, kpəsəye ə̂në e wûsə̂ Ndjapä nə gâ ye kɔ, wala ə̂në Ndjapä nə wûsə̂ e gâ ye kɔ, e lï ndə kə pa e do tə̂ e kwatə̂-e gu nə gâ tə̂ aəmbrʉ aawlra tshepashɔ sə̂ ə̂në ə sə sə də awlra ne kɔ, ə̂në ə tɔ tɔ gâ tə̂ ə̈bə̈ ərə ne kɔ atâ a? Â e yində kə sə kwatə̂-e tə akanga nə atâ a? 10 E pra äwä kə fʉ lə ala Ndjapä tə̂ äwä kə lʉ alabə̈ aəlo də ayipʉ də alɔ alabə̈ aərə gâ ndə aə̂ngû. 11 Awa mbrə əmə ndə kə pa mə wu əyo mbrə e kʉ tə ambanə.

12 Alaye əmə, mə tegbɔ ə̈nü e, e mbrə̈ tə̂ e mata əmə, mbrə ə̂në əmə ndje, mə sə mata e. E mbrə̂ ə̈bə̈ əmbrʉ ərə mbrə̂ bale kə əmə ne. 13 E wûsə̂ nə gâ ye, mbrə rəka də̂ mə mʉ̂ Ə̂rɔ̂ Əpʉ kə e angbʉlînə kɔ. 14 Â ə̂në tshekotə̂ əmə də rəka nə sə̂ sə̂ tə ə̂rɔ̂nə lə ala azü ne kɔ, e wû əmə wû tə amba ərə lə ala e wala e nêke əmə nêke ne. Bale, e mbrə̂ əmə tə ə̂rɔ̂nə mata ə̈bə̈ trawaya nə̂ Ndjapä, mata Jezu Kristə. 15 Rəkɔ, ə̂rɔ̂ kə sə e nə ətshinə kɔ sə kotâ a? Mbrə ə̂në mə pa ndə e tə ə̂rɔ̂nə ə pa, kədə äwä nə â sə̂ kəmə je, e sə̂ kəmə kə djɔ ala e ə kô kə əmə gâ ye. 16 Rəkɔ, mə dô tə̂ əmə tə əyïkowɔ nə̂ e gâ ye mbrə ə̂në mə sə kə pa djatra əpʉ kə e kɔ a?

17 Kə ma əgo e sə̂ ə̂në azü səkɔ ə ma kɔ sə sə tə ə̂rɔ̂nə ne; əndje yi kʉtə̂ ndə kə pa əndje sɔ e tə̂ əmə gashe gâ ye, kanika e ma əgo əndje. 18 Ə sə tə ə̂rɔ̂nə ndə kə pa əzü ma əgo ə̂rɔ̂ ərə, alɔnɔ̂, ə də̂ kʉ tə̂ alɔ ə̂në mə sə lə takpa tə̂ e də̂ ne. 19 Aneshe nə̂ əmə, mə sə kə wu əyo kwatə̂mə ndə kə pa mə zu e, ʉrrr ndjɔ ndə kə pa Kristə nə ne lə e gâ ye kane. 20 Mə yində kə pa mə sə je, ə̂në a ləye, lə takpa tə̂ e ə sɔtə̂ äwä əpʉ ə̂në mə lï ndə kə pa kə e, mbrə ə̂në mə wusə̂ əpʉ ə̂në mə pa gâ pâ əpʉ nə̂ e kɔ wu ne.

21 E pä kə əmə, e-e ə̂në e yində kə mbrə ərə ə lï də âgbɔ̂ əpʉ nə̂ Mayïzə nə kɔ, e dji əpʉ ə̂në âgbɔ̂ əpʉ nə pa kɔ dji ne a? 22 Mbrə ə̂në əndje tâ gâ lə nə ə pâ: «Abraamo sə̂ də aneshe koshe bishi, ə̈bə̈ nə sə̂ tə ətshə ənə̂ Agarə, yashe kanga â bale nə sə tə ətshə ənə̂ Sara, ə̂në tshə sə̂ sə̂ tə yashe kanga ne kɔ.» 23 Bale, əndje zû ətshə ənə̂ yashe kanga nə tə̂ äwä ərə ə̂në tshelə əzü kə yîndə nə kɔ â əndje zû ətshə nə ə̂në əyï nə sə̂ sə̂ tə kanga ne kɔ tə̂ äwä əpʉ ə̂në Ndjapä zâ ama də nə gâ ye kɔ.* 24 Tshelə əpʉ sə̂ kôto kɔ li ə li; mbrə ə̂në ayashe sə̂ bishi kɔ sə mata əpʉ mbʉkʉ bishi. Bale, angbʉlî mbʉkʉ nə kə də̂ ənə̂ sə̂ ə̂në Ndjapä mbrə̂ də azü əgɔ Isərayalə mâ pâ kaga Sinayi kɔ. Ə tə nə kə də̂ Agarə nə kɔ, tshə zû akanga. 25 Kandää, Agarə nə kə də̂ kaga Sinayi lə ashɔ əgɔ Arabi, â tshə sə̂ mata gala Jeruzalamə tshe kpəsəye, mbrə ə̂në ə sə lə ərə kanga də azü tshelə nə. 26 Bale, gala Jeruzalamə tshe lafɔ sə ndə tshelə ye, â ə tə nə kə sə tə əyï əzə̂ nə kɔ. 27 Mbrə ə̂në Fraka nə̂ Ndjapä nə pa:

«Ngɔ̈ tə̂ zə də ə̂rû, yashe märä, əbə ə̂në bə sə sə də aneshe ne kɔ!

Sɔ̈ râwâ də ə̂rû, əbə ə̂në bə wû əyo kə zu wû ne kɔ!

Mbrə ə̂në aneshe nə̂ yashe ə̂në əndje kâtə̂ ye gâ ye kɔ

ngba ə rô əndje nə̂ ətshə ə̂në äkɔ̈ nə sə je kɔ.»*

28 Ə də̂ ənə̂ e, alaye əmə, e sə mata Izakə, tə aneshe əpʉ ama ə̂në Ndjapä nə zâ gâ ye kɔ. 29 Bale, mata ə̂në, leme-e, ətshə ə̂në əndje zû ətshə tə̂ äwä ərə ə̂në tshelə əzü yində nə kɔ sə̂ kə gi əyo tə̂ ətshə ə̂në əndje zû ətshə tə̂ äwä Yîrə̂ kɔ, äwä bale ndje, kpəsəye ərə nə daka pə kʉ rə. 30 Bale, Fraka nə̂ Ndjapä nə pa atâ a? Ə pa: «Grɔ̈ yashe kanga nə də ɨrɨ nə, mbrə ə̂në ɨrɨ yashe kanga nə sə sə kə sə tə əyïnga aərə nə̂ abä nə gâ ndə ɨrɨ amba yashe nə ne.»* 31 Rəkɔ, alaye əmə, a sə sə tə aneshe nə̂ yashe kanga nə ne, bale, a sə tə əndje nə̂ amba yashe nə.