1 Alaye əmə, kədə ə̈bə̈ əzü kə sə kə ma ə̈bə̈ əmbrʉ ərə â əndje sɔtə̂ ye də nə, e-e ə̂në e sə də Yîrə̂ Ndjapä nə kɔ, e pä əpʉ kə ətshə lə zɨtɨnə ə gü də ətshə gâ tə̂ ə̂rɔ̂ äwä. Bäta tə̂ zə, ndə kə pa, əbə ndje, bə te te lə afrɔ ərə nə ne. 2 E kö akongbɔ nə̂ angâ e lə takpa tə̂ e, â rə də̂ e sə kə mbrə ndəma âgbɔ̂ əpʉ ə̂në Kristə nə pâ kɔ. 3 Əzü ə̂në tshə wu tə̂ ye tə âgbɔ̂ əzü lə ala ye, ə̂në tshə sə sə tə ə̈bə̈ ərə bale ne kɔ, tshə frɔ tə̂ ye də ə̂tə̂ ye â frɔ kɔ. 4 Rəkɔ, əzü bale bale wü äwä kə mbrə kosəra nə̂ ye də ə̂tə̂ ye, â bale, tshə sə kə sɔtə̂ ə̈bə̈ ərə ə̂në tshə sə kə da əkro ye tə̂ nə də ə̂tə̂ ye, ə də̂ tə̂ äwä kə lï tə̂ ye gâ tə̂ ə̈bə̈ əzü də̂ ne. 5 Mbrə ə̂në əzü bale bale ə za kongbɔ aərə ə̂në tshə sə kə mbrə nə də ə̂tə̂ ye kɔ gâ lə kumu ye je.

6 Əzü ə̂në əndje sə kə yisə̂ Əpʉ Ndjapä kə ətshə, lï ndə kə pa tshə kru tshelə aərə nə̂ ye nɔ̂ ə ko alabə̈ nə kə awoyisə̂ əpʉ nə kə ətshə nə.

7 E frɔ̈ tə̂ e frɔ̈ ne: əndje mɔ Ndjapä mɔ ne. Ərə ə̂në əzü lû də̂ tshə sə kə kɔ kʉtə̂ angwa nə. 8 Əzü ə̂në tshə lu aərə ə̂në əndu əzü yində nə, tshə sə kə kɔ angwa ərə əndu əzü nə, ə̂në ə tə nə kə də̂ kuzu kɔ. Bale, əzü ə̂në tshə lu aərə mbrə Âgbɔ̂ Yîrə̂, tshə sə kə kɔ angwa ərə Âgbɔ̂ Yîrə̂ nə, ə̂në ə tə nə kə də̂ sorô nə̂ alɔnɔ̂ kɔ. 9 A mɔ̈ mɔ̈ tə̂ äwä kə mbrə ə̂rɔ̂ ərə ne, mbrə ə̂në, kədə alɔ nə kə lï, a sə kə kɔ angwa nə, kədə tshelə kəna əzə̂ kə tɔ tɔ tə̂ äwä nə ne. 10 Rəkɔ, alɔ ə̂në äwä nə â sə je tə̂ əzə̂, a mbrə̈ ə̂rɔ̂ nə kə azü nɔ̂, ə̂dû nə nɔ̂ kə alaye əzə̂ lə əpʉ lɔsu nə.

11 E wü əgbro aə̈nü ngrowô səye ə̂në mə ta kə e də kəna əmə də ə̂tə̂ əmə kɔ! 12 Azü ə̂në əndje ko e də awlra ndə kə pa əndje wa e də gandja nə kɔ, əndje yində nə ə pa azü wu alane tə aə̂rɔ̂ azü tə̂ äwä kə mbrə aərə nə̂ azü. Â ərə ə̂në əndje pra tshî kɔ kə də̂ kə pa azü gi əyo gi tə̂ alane mbrə masheyɔ nə̂ Kristə nə ne. 13 Mbrə ə̂në əndje də ə̂tə̂ əndje, ə̂në əndje yində nə â əndje wa əndje də gandja nə kɔ, əndje bata âgbɔ̂ əpʉ nə̂ Mayïzə nə bata ne; bale, əndje yində nə ə pa e yində nə əndje wa e də gandja nə ndə kə pa alane da əkro alane mbrə kə wa gandja nə̂ e nə. 14 Ənə̂ əmə, mə sə sə kə da əkro əmə bale tə̂ ə̈bə̈ ərə kpî tə̂ masheyɔ nə̂ Âgbɔ̂ Əyïngerə nə̂ əzə̂ Jezu Kristə nə ne, ə̂në tə̂ äwä nə də̂ tshepashɔ tshû tə̂ əmə gâ ye, mata ə̂në, əmə ndje, mə tshû tə̂ nə gâ ye kɔ! 15 Mbrə ə̂në ərə ə̂në ə sə tə âgbɔ̂ ərə nə kə də̂ kə sə tə tafa əzü ə̂në Ndjapä mbrə̂ ətshə gâ ye, ə də̂ əpʉ kə wa gandja wala kə wa gandja wa ne də̂ ne. 16 Azü nɔ̂ ə̂në əndje sə kə mbrə ərə ə lï də äwä əpʉ səke, mə pa: blatshe gâ ndə ə̂rɔ̂tə̂ Ndjapä sə̈ gâ pâ əndje, ndje gâ pâ azü nə̂ Ndjapä tshegege nɔ̂!

17 Mandânə səye, əzü bale zä zä əmə wu əyo ne! Mbrə ə̂në, əmə, mə sə də asheku tə̂ akwa əmə, ə̂në ə yisə̂ nə gashu ə pa mə sə tə əzü nə̂ Kristə.

18 Alaye əmə, ə̂rɔ̂tə̂ Âgbɔ̂ Əyïngerə nə̂ əzə̂ də Jezu Kristə sə̈ də e! Asərəmə!