1 Mandâ ərə səkɔ, Jezu mâ tə̂ ye kwatə̂ye gashu kə atrawaya nə̂ ye mâ tə̂ ama ə̂ngû Tiberiadə. Äwä ə̂në tshə mâ tə̂ ye də nə gashu kɔ kə səke. 2 Shemɔ Piarə, də Toma, ə̂në əndje ê ətshə ə pa Mêya kɔ, də Natanayalə, əzü tshe Kana lə ashɔ əgɔ Galile, də aləvu Zebede gâ ndə alabə̈ atrawaya nə̂ ye bishi, əndje sə̂ nɔ̂ kpə ə̂sə̂ nə bale. 3 Shemɔ Piarə nə pâ kə əndje ə pa: «Mə sə kə na ndə kə pra asungû.» Əndje pâ kə ətshə ə pa: «A də a-e kə na.»

Əndje âfɔ ə rô ə ô gâ lə əgerə âgbâ. Bale, də tsheləbu nə səkɔ, əndje zâ ə̈bə̈ ərə zâ bale ne. 4 Alɔ ə̂në ətshe vɔ̂tə̂ kə kra nə gâ ye kɔ, Jezu kâ gâ tə̂ ama ə̂ngû nə, bale atrawaya nə wûsə̂ nə wû ə pa Jezu kə sə̂ ne. 5 Jezu nə yû əndje ə pa: «Aneshe! E sɔtə̂ asungû nə a?» Əndje kîrə əpʉ kə əndje ə pa: «Bale ne!» 6 Tshə pâ kə əndje ə pa: «E wlï gbânda nə djoko tə̂ əgerə âgbâ nə ndə ndəkɔ, e sə kə sɔtə̂ asungû.» Rəkɔ, əndje wlî gbânda nə, â əndje lî lî ndə kə gbətɔ gbânda nə gashu ne, mbrə ə̂në asungû nə ngbâ lə nə ə rô pâ nə gâ ye. 7 Bale, trawaya nə ə̂në Jezu yîndə ye kɔ pâ kə Piarə nə ə pa: «Âgbɔ̂ Əyïngerə kə sə̂!»

Pa nə ə̂në Shemɔ Piarə nə djî ə pa Âgbɔ̂ Əyïngerə kə sə̂ kɔ, tshə yî ləba gâ tə̂ ye, mbrə ə̂në tshə vêrə ləba tə̂ ye gâ tʉ angbʉlînə gâ ye, ə tê gâ lə ə̂ngû nə. 8 Ə̂dû atrawaya nə gbə̂tɔ gbânda nə ə̂në asungû nə sû tshelə nə gâ ye kɔ gu nə â gû də əgerə âgbâ nə gâ tə̂ ama ə̂ngû nə, mbrə ə̂në tshe tə̂ ama ə̂ngû nə dɨ̂ dɨ̂ tə̂ əndje ne, ə sə̂ mata matrə ngbangbo bale. 9 Alɔ ə̂në əndje jêrə gâ tə̂ ə̈kü ashɔ gâ ye kɔ, əndje wû ə̈bə̈ əwo yeee kôto ə̂në giangû sə̂ la nə kɔ, gâ ndə mapa. 10 Jezu nə pâ kə əndje ə pa: «E gü də alabə̈ agiangû nə ə̂në e kô əndje katshä katshä səye kɔ gâ əmə.»

11 Shemɔ Piarə nə ô gâ lə əgerə âgbâ nə ə gbə̂tɔ gbânda nə gashu, ə̂në əgbro agiangû ngbangbo bale də tshepa nə zazü bishi də morofo amanə vəta (153) tɔ̂ tshelə nə kɔ, â ə̂në agiangû nə rô pa nə gâ ye kɔ, tshelə gbânda nə sɔ̂ sɔ̂ ne. 12 Jezu nə pâ kə əndje ə pa: «E nä gâ əmə ə zɨ̈ rəgo!» Ə̈bə̈ trawaya bale lə takpa tə̂ əndje â â ama də əpʉ ne, ndə kə yu ətshə ə pa: «Əbə də̂ əde kə sə̂?» Mbrə ə̂në əndje wûsə̂ nə ə pa Âgbɔ̂ Əyïngerə kə sə̂. 13 Jezu nə nâ ə zâ mapa nə ə zâ kə əndje, ə zâ ndje giangû nə kə əndje. 14 Äwä vəta nə kə sə̂ ndə kə pa Jezu nə mâ tə̂ ye kə atrawaya nə̂ ye nə mandâ tə̂ ə̂në tshə shê lə takpa tə̂ akuzu gâ ye kɔ.

15 Mandânə ə̂në əndje zɨ̂ rəgo nə gâ ye kɔ, Jezu nə pâ kə Shemɔ Piarə nə ə pa: «Shemɔ, ɨrɨ Zââ, bə yində əmə ə rô pâ əndje ənə̂ səye a?» Tshə kîrə əpʉ kə ətshə ə pa: «Ayî, Âgbɔ̂ Əyïngerə, əbə, bə wusə̂ nə ə pa mə yində zə.» Jezu nə pâ kə ətshə ə pa: «Bäta aaya andalimi nə̂ əmə.» 16 Tshə yû ətshə tə bishi nə kwatə̂ye ə pa: «Shemɔ, ɨrɨ Zââ, bə yində əmə a?» Piarə nə kîrə əpʉ kə ətshə ə pa: «Ayî, Âgbɔ̂ Əyïngerə! Əbə, bə wusə̂ nə ə pa mə yində zə.» Jezu nə pâ kə ətshə ə pa: «Bäta andalimi nə̂ əmə.» 17 Jezu nə yû ətshə tə̂ äwä vəta nə ə pa: «Shemɔ, ɨrɨ Zââ, bə yində əmə a?» Əyo zâ Piarə nə mbrə ə̂në tshə yû ətshə tə vəta nə kɔ ə pa: «Bə yində əmə a?» Bale, tshə kîrə əpʉ kə ətshə ə pa: «Âgbɔ̂ Əyïngerə, əbə, bə wusə̂ aərə nɔ̂, bə wusə̂ nə ə pa mə yində zə.» Jezu nə pâ kə ətshə ə pa: «Bäta andalimi nə̂ əmə. 18 Djatra əpʉ, mə pa kə əbə, alɔ ə̂në bə dâka pə tə djatra mɔdɔ kɔ, əbə də ə̂tə̂ zə kə î ə̂wû tshepa ləba nə̂ zə â nâ ana tə̂ ətshe ə̂në tshelə zə yîndə nə kɔ. Bale, alɔ ə̂në bə sə kə gbɔ nə, bə sə kə yerɔkpɔ tshelə kəna zə â ə̈bə̈ əzü kpî kə sə̂ â i ə̂wû tshepa ləba nə̂ zə nə, â na də əbə tə̂ ətshe ə̂në tshelə zə yində nə yi ne kɔ.» 19 Tshə pâ əpʉ səkɔ ndə kə pa tshə yisə̂ äwä ə̂në Piarə nə sə kə tshu də nə â mbe Ndjapä də nə kɔ. Mandânə ə̂në tshə pâ əpʉ nə rə kɔ, tshə pâ kə ətshə ə pa: «Zä äwä əmə!»

20 Piarə nə dô tə̂ ye ə wû trawaya nə ə̂në Jezu yîndə ye kɔ, tshə sə̂ kə na mandâ əndje, ətshə ə̂në, tə̂ alɔ kə zɨ rəgo, tshə têrə gâ ala əkro Jezu nə, ə̂në ə yû ətshə ə pa: «Âgbɔ̂ Əyïngerə, əde kə sə kə ka əbə?» 21 Alɔ ə̂në Piarə nə wû ətshə kɔ, tshə yû Jezu nə ə pa: «Âgbɔ̂ Əyïngerə, kâ ətshə ənə̂ koye, ərə yekɔ kə sə kə wutu gâ tə̂ ye?» 22 Jezu nə pâ kə ətshə ə pa: «Kədə mə yində nə ə pa tshə daka pə tə sorô ʉrrr ndjɔ mə gu kane, ənə̂ zə lə nə də yea? Əbə, zä äwä əmə.» 23 Gâ pâ əpʉ səkɔ, azü sə̂ kə pa əpʉ na na ye lə takpa tə̂ azü ə̂në əndje zâ lɔsu əndje kə Jezu kɔ ə pa trawaya səkɔ sə sə kə tshu nə ne. Kandää, Jezu nə pâ pâ kə Piarə nə ə pa tshə sə sə kə tshu nə ne, bale tshə pâ tshî ə pa: «Kədə mə yində nə ə pa tshə daka pə tə sorô ʉrrr ndjɔ mə gu kane, ənə̂ zə lə nə də̂ yea?»

24 Trawaya səkɔ kə pâ əpʉ aərə səkɔ â tâ əpʉ nə gâ lə fraka kɔ. Â a wusə̂ nə ə pa əpʉ ə̂në tshə pâ kɔ sə tə djatra əpʉ.

25 Jezu nə mbrə̂ alabə̈ aata aərə ngbatshe kwatəndje. Kədə əndje tâ kəmə aəpʉ nə bale bale nɔ̂, mə wusə̂ nə ə pa ə̈bə̈ ətshe pâ ashɔ nɔ̂ ə̂në ə lï ndə kə ko afraka nə ə̂në əndje ta kəmə je kɔ sə sə je ne.