1 Afariza djî ə pa Jezu sə̂ kə mbrə azü ngbatshe tə atrawaya nə̂ ye â sə̂ kə za batamo kə azü ə rô ənə̂ Zââ. 2 Alɔnɔ̂ ə də̂ Jezu də ə̂tə̂ ye də̂ kə za batamo nə kə azü nə kɔ ne, bale, atrawaya nə̂ ye kə za batamo nə kə azü nə kɔ. 3 Bale, alɔ ə̂në Jezu djî əpʉ ə̂në azü sə̂ kə pa də əɨrɨ ye kɔ, tshə kâtə̂ əgɔ Jude ə kwâtə̂ye ə gû mâ lə əgɔ Galile. 4 Kandää, ə lî kəmə ndə kə pa tshə ro sɔ lə ashɔ əgɔ Samari.

5 Rəkɔ, tshə yî kumu ye lə ə̈bə̈ gala ashɔ əgɔ Samari nə ə̂në əndje e ə pa Sisharə kɔ, trö də kəndɨ ə̂në Jakɔbə zâ kə ɨrɨ nə də Jozafu kɔ.* 6 Kudû ə̂ngû nə̂ Jakɔbə nə sə̂ kôto. Jezu mɔ̂ mandâ ə̈ngrʉ̈ ana nə gâ ye; tshə sə̂ gâ tʉ gâ tə̂ ama kudû ə̂ngû nə. Kandää alɔ nɔ̂nɔ tə̂ ye ə wûtu gâ ə̂grû nə gâ ye. 7 Ə̈bə̈ yashe əgɔ Samari nə nâ ndə kə to ə̂ngû. Jezu pâ kə ətshə ə pa: «Tö ə̂ngû kə əmə mə ndju.» 8 Mbrə ə̂në atrawaya nə̂ ye nə nâ na ye gâ lə gala ndə kə yɔ rəgo gâ ye. 9 Yashe əgɔ Samari nə pâ kə ətshə ə pa: «Ə mbrə atâ â əbə ə̂në bə sə tə Juwufu kɔ, bə yu tshuku ə̂ngû kə ndju nə kə əmə ə̂në mə sə tə yashe əgɔ Samari kɔ?» Mbrə ə̂në, Ajuwufu nə də azü əgɔ Samari nə djî tə̂ əndje djî ne. 10 Jezu kîrə əpʉ kə ətshə ə pa: «Kədə bə wusə̂ kəmə ərə ə̂në Ndjapä sə kə za kə əzü kɔ, â wusə̂ əzü ə̂në tshə sə kə pa əpʉ kə əbə ə pa: "Tö ə̂ngû kə əmə mə ndju"! Əbə kəmə kə sə kə yu ətshə tə ə̂ngû kə ndju nə, â tshə sə kə za kəmə ə̂ngû ə̂në sorô sə lə nə kɔ kə əbə.» 11 Yashe nə pâ kə ətshə ə pa: «Âgbɔ̂ Əzü, bə sə sə də ərə kə to də ə̂ngû nə ne, bale, kudû ə̂ngû nə li ə li. Rəkɔ, bə sə kə sɔtə̂ ə̂ngû sə̂ ə̂në sorô sə lə nə kɔ kotâ a? 12 Bə sə tə âgbɔ̂ əzü ə rô abä ä də Jakɔbə, ə̂në tshə zâ ə̂ngû səye kə ä kɔ, ə̂në ətshə də ə̂tə̂ ye tshə ndjû, ndje gâ ndə aləvu nə də aagia nə̂ ye kɔ a?» 13 Jezu kîrə əpʉ kə ətshə ə pa: «Əzü nɔ̂ ə̂në tshə ndju ə̂ngû səye, əgo ə̂ngû sə kə mi ətshə kwatəndje. 14 Bale, əzü ə̂në tshə sə kə ndju ə̂ngû ə̂në mə sə kə za kə ətshə kɔ, əgo ə̂ngû sə sə kə mi ətshə bale ne, bale, ə̂ngû nə ə̂në mə sə kə za kə ətshə kɔ, ə sə kə do tə̂ ye mâ lə ye tə kumu ə̂ngû ə̂në ə sə kə vɔ gola gola ʉrrr ndjɔ gâ tə̂ alɔ sorô nə̂ alɔnɔ̂.» 15 Yashe nə pâ kə ətshə ə pa: «Âgbɔ̂ Əzü, zä ə̂ngû sə̂ kə əmə, kanika əgo ə̂ngû mi əmə mi kwatəndje ne ka mə na na kwatə̂mə ə to ə̂ngû kotəye ne.» 16 Jezu pâ kə ətshə ə pa: «Nä ə ë äkɔ̈ zə, ə dö tə̂ zə ə gü mâtəye.» 17 Yashe nə kîrə əpʉ kə ətshə ə pa: «Mə sə sə də koshe ne.» Jezu pâ kə ətshə ə pa: «Bə pa əpʉ nə də äwänə â pa: "Mə sə sə də koshe ne kɔ." 18 Mbrə ə̂në bə sə̂ də akoshe mindû, bale, ətshə nə ə̂në bə sə də ətshə kpəsəye kɔ sə sə tə äkɔ̈ zə ne. Əpʉ nə ə̂në bə pâ kɔ ə sə tə djatra əpʉ.» 19 Yashe nə pâ kə ətshə ə pa: «Âgbɔ̂ Əzü, mə wu ə pa, əbə, bə sə tə awopandəma Ndjapä. 20 Alätä ä vrɔ̂ Ndjapä pâ kaga səye. Â e-e də̂ Ajuwufu, e pa ənə̂ e ə pa, ətshe ə̂në azü lï ndə kə vrɔ Ndjapä tə̂ nə kɔ sə mâ Jeruzalamə.» 21 Jezu pâ kə ətshə ə pa: «Yashe, yïndə əpʉ nə̂ əmə, alɔ sə kə na gu nə, ə̂në ə də̂ pâ kaga səye wala mâ Jeruzalamə kwatəndje də̂ e sə kə vrɔ Abä ne. 22 E-e də̂ azü əgɔ Samari, e sə kə vrɔ ərə ə̂në e wusə̂ nə wu ne kɔ. Bale, ä-ä də̂ Ajuwufu, ä sə kə vrɔ ərə ə̂në ä wusə̂ nə, mbrə ə̂në əpʉ kə she lə kuzu to mâ ndə Ajuwufu. 23 Bale, alɔ nə sə kə na gu nə, â ə tə nə kə sə̂ kpəsəye, ə̂në adjatra aawovrɔ Ndjapä sə kə vrɔ Abä tə̂ äwä Âgbɔ̂ Yîrə̂ də djatra əpʉ kɔ. Mbrə ə̂në marä tə̂ aawovrɔ Ndjapä rə də̂ Abä sə kə pra əndje kɔ. 24 Ndjapä sə tə Yîrə̂, bale, azü ə̂në əndje sə kə vrɔ ətshə kɔ, ə lï ndə kə pa əndje vrɔ ətshə tə̂ äwä Yîrə̂ də djatra əpʉ.» 25 Yashe nə pâ kə ətshə ə pa: «Mə wusə̂ nə ə pa Mesi nə sə kə na nə, ətshə ə̂në əndje e ətshə ə pa Kristə nə kɔ. Alɔ ə̂në, ətshə, tshə â na, tshə sə kə yisə̂ tshelə âdâ aərə nɔ̂ kə ä.» 26 Jezu pâ kə ətshə ə pa: «Mə də̂ ətshə, əmə ə̂në mə pa əpʉ kə əbə kɔ.»

27 Kpə pâ əpʉ səkɔ, atrawaya nə̂ ye nə tô ə gû, kumu əndje kpê pâ əndu əndje ə̂në tshə sə̂ kə pa əpʉ kə ə̈bə̈ yashe kɔ. Bale, ə̈bə̈ əzü bale yû ətshə yû ə pa: «Bə yində yekɔ?» wala ə pa: «Əpʉ yekɔ də̂ e də ətshə sə kə pa nə kɔ?»

28 Rəkɔ, yashe nə kâtə̂ ləsû ə̂ngû nə̂ ye nə tʉ kôto ə nâ mâ lə gala nə ə pâ kə azü ə pa: 29 «E nä gâ əmə ə wü ə̈bə̈ koshe ə̂në tshə pâ ndə əpʉ aərə nɔ̂ ə̂në mə mbrə̂ gâ ye kɔ kə əmə kɔ. Ə də̂ Kristə nə də̂ kə sə̂ ne a?» 30 Azü nə wûtu lə gala nə gashu ə nâ gâ ngotə̂ Jezu nə.

31 Tə̂ alɔ nə səkɔ, atrawaya nə kâ pâ Jezu nə ə kâ ə pa: «Awoyisə̂ ərə, zɨ̈ rəgo!» 32 Bale, tshə pâ kə əndje ə pa: «Əmə, mə sə də ə̈bə̈ rəgo kə zɨ nə ə̂në, e-e, e wusə̂ nə wu ne kɔ.» 33 Rəkɔ, atrawaya nə pâ lə takpa tə̂ əndje ə pa: «Ə̈bə̈ əzü nâ kəmə də rəgo kə ətshə, tshə zɨ̂ a?»

34 Jezu pâ kə əndje ə pa: «Rəgo nə̂ əmə kə də̂ kə mbrə ərə ə̂në tshelə ətshə ə̂në tshə wlâ əmə kɔ yində nə gâ ndə kə mbrə kosəra ə̂në tshə zâ kə əmə kɔ ʉrrr ə nglɔ. 35 E pä pä, e-e, ə pa: "Ə daka pə yipʉ vəna ndə kə pa tshekɨ kə kɔ angwa rəgo lï ne a?" Bale, mə pa kə e, e kö ala e gâ lafɔ ə wü akəndɨ, aə̂lê arəgo nə drô ndə kə pa əndje kɔ nə gâ ye. 36 Awokɔ aə̂lê arəgo nə vɔtə̂ kə sɔtə̂ ərə tshemandâ kosəra nə̂ ye nə gâ ye â vɔtə̂ kə ngbo aə̂lê rəgo gâ tə̂ nə gâ ye mbrə sorô nə̂ alɔnɔ̂, kanika tshelə awolu angwa rəgo nə gâ ndə awokɔ aə̂lê rəgo nə mɔ äwä bale. 37 Mbrə ə̂në dame ə̂në ə pa: "Ə̈bə̈ əzü lû ərə, ə̈bə̈ ata nə kɔ angwa rəgo nə" kɔ, ə sə tə djatra əpʉ. 38 Əmə, mə wlâ e ndə kə pa e na ə kɔ angwa rəgo tə̂ ətshe ə̂në, e-e, e mbrə̂ kosəra mbrə̂ tə̂ nə ne kɔ. Alabə̈ azü mbrə̂ kosəra nə, â e-e, e nâ ndə kə ko ərə tshemandâ kosəra nə̂ əndje nə.»

39 Azü əgɔ Samari nə ngbatshe lə gala səkɔ zâ lɔsu əndje kə Jezu nə mbrə əpʉ nə ə̂në yashe nə pâ kə əndje ə pa: «Koshe sə̂ pâ əpʉ aərə nɔ̂ ə̂në mə mbrə̂ gâ ye kɔ kə əmə.» 40 Alɔ ə̂në azü əgɔ Samari nə nâ gâ tə̂ Jezu nə kɔ, əndje shêra ətshə ə pa tshə sə pə gâ ngotə̂ alane kôto, â tshə dâka kôto ə mâ əlo bishi. 41 Azü nə ə̂në əndje zâ lɔsu əndje kə Jezu nə mbrə əpʉ ə̂në tshə pâ kə əndje kɔ ngbâ kwatəndje ə rô pâ nə gâ ye. 42 Â əndje pâ kə yashe nə ə pa: «Ə də̂ kʉ mbrə əpʉ nə̂ zə nə də̂ ä za lɔsu ä kə ətshə kɔ ne, ä za lɔsu ä kə ətshə mbrə ə̂në ä-ä də ə̂tə̂ ä, ä djî ətshə, â ä wusə̂ nə ə pa tshə sə, tə djatra əpʉ, tə Awoshe azü tshepashɔ.»

43 Mandâ aəlo bishi səkɔ, Jezu âfɔ kôto ə nâ mâ Galile. 44 Mbrə ə̂në ətshə də ə̂tə̂ ye tshə pâ azü lʉ lʉ awopandəma Ndjapä lə əgɔ nə̂ ye də ə̂tə̂ ye ne. 45 Alɔ ə̂në tshə yî kumu ye mâ Galile nə je kɔ, azü əgɔ Galile nə wə̂ra ətshə tə ə̂rɔ̂nə, mbrə ə̂në əndje wû aərə nɔ̂ ə̂në tshə mbrə̂ mâ Jeruzalamə tə̂ alɔ sandaga kɔ gâ ye. Mbrə ə̂në əndje nâ ndje ndə sandaga nə.

46 Rəkɔ, tshə dô tə̂ ye ə gû mâ Kana, lə ashɔ əgɔ Galile, tə̂ ətshe ə̂në tshə dô ə̂ngû tə duva kɔ. Ə̈bə̈ âgbɔ̂ əzü sə̂ je mâ Kaprənayɔmə, ə̂në tshə sə̂ kə mbrə kosəra kə əyïngerə əgɔ nə, ə̂në ɨrɨ nə sə̂ də rəka kɔ. 47 Tshə djî ə pa Jezu âfɔ mâ Jude, ə gû mâ Galile gâ ye. Tshə âfɔ ə nâ ə tə̂ ətshə ə kɨ̂ kə ətshə ndə kə pa tshə na ə grɔ rəka tə̂ ɨrɨ əne, ə̂në tshə ndô trö də kuzu kɔ. 48 Jezu nə pâ kə ətshə ə pa: «Kədə e wu wu aərə ə̈lü də aərə ə̂në ə za awa gâ lə azü kɔ ne, e sə sə kə yində əpʉ nə rə də lɔsu e ne.» 49 Âgbɔ̂ əzü nə ə̂në tshə sə̂ kə mbrə kosəra kə əyïngerə nə kɔ pâ kə ətshə ə pa: «Âgbɔ̂ Əzü, nä gâ əmə, angbʉlînə ndə kə pa əgblə nə̂ əmə nə tshu!» 50 Jezu nə pâ kə ətshə ə pa: «Gü na ye, ɨrɨ zə sə tə sorô.»

Koshe nə zâ lɔsu ye gâ pâ əpʉ nə ə̂në Jezu nə pâ kə ətshə kɔ ə gû na ye. 51 Ə̂në koshe nə dô tə̂ ye ə sə̂ kə gu na ye kɔ, alayïkosəra nə̂ ye nâ ə tê ətshə ə pâ kə ətshə ə pa: «Əgblə nə̂ zə nə sə tə sorô gâ ye.» 52 Tshə yû əndje tə̂ alɔ nə ə̂në tshelə akwa ye nə mbrə̂ tə ə̂rɔ̂nə kɔ. Əndje pâ kə ətshə ə pa: «Wɔlumə, də ə̈nü alɔ bale mandânə ə̂në alɔ kâ kpə ə̂grûtshe kɔ də̂ tshelə akwa ye nə ə̂në ə sə̂ kədji kədji kɔ ə kâtə̂ nə kɔ.» 53 Rəkɔ, abä əgblə nə wûsə̂ nə ə pa kʉ də alɔ nə səkɔ ə̂në Jezu pâ kə əne ə pa: «Ɨrɨ zə sə tə sorô gâ ye» kɔ kə sə̂. Â ətshə, tshə zâ lɔsu ye kə Jezu nə gâ ndə azü tshelə anda nə̂ ye nɔ̂ ndje.

54 Bishi ərə ə̈lü ə̂në Jezu kwâtə̂ye ə mbrə̂ mandânə ə̂në tshə âfɔ mâ Jude ə gû mâ Galile kɔ kə sə̂.