1 Alɔ ə̂në Jezu sə̂ kə wutu lə Anda Ndjapä nə kɔ, ə̈bə̈ trawaya nə̂ ye bale pâ kə ətshə ə pa: «Awoyisə̂ ərə, wü ərə səye a! Aəkpʉ səye fʉ wââ! Anda səye fʉ wââ!» 2 Jezu kîrə əpʉ kə ətshə ə pa: «Bə wu əgerə anda səye a? Ə̈bə̈ əkpʉ bale sə sə kə sə pə gâ pâ ə̈bə̈ ngâ nə ne, ə sə kə ngɔ nə nɔ̂ gâ tʉ.»

3 Jezu sə̂ gâ tʉ mâ pâ kaga aayɔ ɔlivə ə̂në ə sə̂ ətshi Anda Ndjapä nə kɔ. Piarə də Zake də Zââ gâ ndə Andre ə̂në əndje sə̂ kʉtə̂ əndje gâ ndə ye kɔ yû ətshə ə pa: 4 «Pä kə ä: ərə səkɔ sə kə wutu nə gorɔ? Azü sə kə wusə̂ nə tə̂ yekɔ ə pa tshekɨ aərə tshepashɔ nɔ̂ ndə kə nglɔ nə kə sə̂?» 5 Bale, Jezu vɔ̂tə̂ kə pa əpʉ kə əndje ə pa: «Ala e në ka ə̈bə̈ əzü bale frɔ e frɔ ne. 6 Mbrə ə̂në azü ngbatshe sə kə na də əɨrɨ əmə â əzü bale bale sə kə pa nə ə pa: "Əmə də̂ Kristə nə!" Əndje sə kə frɔ ə̂kpû azü. 7 Alɔ ə̂në e sə kə dji ndə əpʉ akowɔ trö gâ ndə əpʉ akowɔ ə̂në ə sə kə na gu nə kɔ, awa mbrə̈ e mbrə̈ ne. Aərə səkɔ lï ndə kə wutu nə, bale, ə də̂ alɔ kə nglɔ tshepashɔ də̂ kə sə̂ ne. 8 Ə̈bə̈ marä sə kə tɔ kowɔ də ə̈bə̈ ata marä â ə̈bə̈ əgɔngerə sə kə tɔ kowɔ də ə̈bə̈ ata əgɔngerə. Ashɔ sə kə meme tə̂ ye tə̂ aətshe na na ye, əgo sə kə mi azü tə bandanə. Aərə nə sə kə wutu mata kə ka tshelə yashe ə̂në əgblə sə kə ka ətshə ndə kə pa tshə zu kɔ.»

9 «Bale, ənə̂ e, ala e në. Əndje sə kə na də e gâ ətshi aangbɔ ngbanga nə̂ Ajuwufu ə sə kə da e də djakwa lə aanda aangbɔ. E sə kə ka gâ ətshi əgbro azü də alayïngerə mbrə əmə ndə kə pa e pa əpʉ nə̂ əmə kə əndje. 10 Ə lï ndə kə pa əndje mʉ Ə̂rɔ̂ Əpʉ kə amarä nɔ̂ angbʉlînə gâ ye kane. 11 Alɔ ə̂në əndje sə kə na də e ndə kə ko e gâ lə kəna azü nə, e lï tshelə e lï əlînə ə pa əpʉ yekɔ də̂ e sə kə pa nə ne. Bale, e pä kʉtə̂ əpʉ ə̂në Ndjapä sə kə za gâ lə ama e kɔ kʉ tə̂ alɔ nə səkɔ, mbrə ə̂në ə də̂ e də̂ kə sə kə pa əpʉ nə ne, Âgbɔ̂ Yîrə̂ kə sə kə pa əpʉ nə. 12 Əzü sə kə ka aye nə ndə kə pa əndje wo ətshə; abä əgblə sə kə ka əgblə nə̂ ye ndə kə pa azü wo ətshə; aneshe sə kə afɔ də awlra tə̂ alabä əndje də alayï əndje ə ka əndje ndə kə pa azü wo əndje. 13 Tshelə azü nɔ̂ sə kə wəra tə̂ əndje tə̂ e mbrə əmə. Bale, əzü ə̂në tshə gbɔgbɔ tə̂ ye lə aərə səkɔ ʉrrr ndjɔ gâ tə̂ ama nə, Ndjapä sə kə she ətshə lə kuzu.»

14 «Alɔ ə̂në e sə kə wu "Əmbrʉ awondɨ ərə" ə̂në tshə sə gâ tə̂ ətshe ə̂në tshə lï lï ndə kə pa tshə sə tə̂ nə ne kɔ – əzü ə̂në tshə sə kə dɨ əpʉ səye, tshə djï tshelə âdâ nə – bale, azü ə̂në əndje sə kə sə lə ashɔ Jude kɔ, əndje kpë gâ pâ akaga. 15 Əzü ə̂në tshə sə gâ pâ anda, tshə jë jërə ə lï gâ lə anda nə̂ ye ndə kə pa tshə za ə̈bə̈ ərə ne. 16 Əzü ə̂në tshə sə kə sə mâ lə kəndɨ, tshə dö tə̂ ye dö gu nə gâ lə manda ndə kə pa tshə za əgerə ləba nə̂ ye ne. 17 Əyo gâ pâ ayashe ə̂në əndje sə kə sə də əndu gâ ndə əndje ə̂në aneshe sə kə ɔ angɔ əndje tə̂ tshekɨ nə səkɔ. 18 E yü Ndjapä ndə kə pa aərə səkɔ wu wutu tə̂ tshekɨ əzɨ ne. 19 Mbrə ə̂në azü sə kə wu əyo tə bandanə tə̂ alɔ nə səkɔ ə ro ə̂dû aəyo ə̂në azü vɔ̂tə̂ kə wu nə mâ tə̂ amanə alɔ ə̂në Ndjapä mâ tshepashɔ kɔ ʉrrr ndjɔ kpəsəye kɔ. Mandânə, marä tə̂ əyo səkɔ sə sə kə sə je kwatəndje bale ne. 20 Kədə Əyïlingû tə Ndjapä kə gî gî kəmə aəlo səkɔ gâ tə̂ nə ne, ə̈bə̈ əzü bale sə sə kə tshɔ lə kuzu ne. Bale, tshə gî aəlo səkɔ gâ tə̂ nə gâ ye mbrə azü ə̂në tshə kê əndje gâ ye tə azü nə̂ ye kɔ. 21 Kədə ə̈bə̈ əzü kə pa kə e ə pa: "Kristə nə sə mâtəye!" wala "Tshə sə mâ koye!", e yï yïndə əpʉ nə̂ ye nə ne. 22 Mbrə ə̂në aafrɔ akristə də aafrɔ aawopandəma Ndjapä sə kə yi kumu əndje. Əndje sə kə mbrə aərə ə̈lü də aərə ə̂në ə sə kə za awa gâ lə azü je kɔ, ndə kə pa əndje frɔ azü, äwä nə â sə je, əndje sə kə frɔ ndje azü ə̂në Ndjapä kê əndje gâ ye kɔ. 23 Ala e në, mə pâ əpʉ nɔ̂ kə e angbʉlînə gâ ye.»

24 «Bale, tə̂ alɔ nə səkɔ, mandâ kə wu əyo nə, tshela alɔ sə kə bu nə, yipʉ sə sə kə tɔ kwatə̂ye ne, 25 aambrepe sə kə afɔ mâ lafɔ ə yɔ gâ tə̂ ashɔ, Ndjapä sə kə meme aawlra tshelafɔ. 26 Bale, azü sə kə wu Əgblə nə̂ Əzü ə̂në tshə sə kə gu nə lə andra də awlra nə̂ ye nɔ̂ də ə̂yî ye nɔ̂ kɔ. 27 Bale, tshə sə kə wla atrawaya nə̂ Ndjapä ndə kə pa tshə ngbo azü nə̂ ye ə̂në tshə kê əndje pâ ashɔ nɔ̂ gâ ye kɔ gâ tə̂ nə, ə vɔ̂tə̂ nə mâ tə̂ ama ashɔ ʉrrr ndjɔ gâ tə̂ budu nə.»

28 «E wüsə̂ ərə kpə tə̂ əpʉ kəwû gâ pâ ayɔ figə: alɔ ə̂në amato nə vɔtə̂ kə tɔ tə̂ nə â atafa akako nə vɔtə̂ kə tɔ nə, e wüsə̂ nə ə pa tshekɨ ngû yavrɨ ndô trö gâ ye. 29 Äwä bale ndje, e-e, alɔ ə̂në e wu aərə səkɔ â wutu, e wüsə̂ nə ə pa Əgblə nə̂ Əzü* ndô trö gâ ye, tshə sə lə manda. 30 Djatra əpʉ, mə pa kə e: azü tshe kpəsəye sə sə kə tshu nɔ̂ ne â aərə səkɔ nɔ̂ sə kə wutu nə. 31 Tshelafɔ də ashɔ sə kə ro nə, bale, aəpʉ ama əmə sə sə kə ro bale ne.»

32 «Əzü bale wusə̂ əlo nə də alɔ nə wu ne. Atrawaya nə̂ Ndjapä ə̂në əndje sə mâ lafɔ kɔ wusə̂ əlo nə wu bale ne wala Ɨrɨ Ndjapä nə bale ne, kʉtə̂ Abä tshî kə wusə̂ nə. 33 Ala e gbɔ̈, e lö lö ne mbrə ə̂në e wusə̂ alɔ nə wu ne. 34 Ə sə kə sə mata ə̈bə̈ koshe ə̂në tshə na ana lə ə̈bə̈ əgɔ ngrʉ̂. Tshə kâtə̂ anda nə̂ ye nɔ̂ tʉ gâ lə kəna alayïkosəra nə̂ ye, əzü bale bale də kosəra nə̂ ye â zâ ama kə awolishi tə̂ manda nə ə pa tshə sə də ə̈kü ala ye. 35 Rəkɔ, ala e në, mbrə ə̂në e wusə̂ alɔ ə̂në əyïnga anda nə ə gu də nə kɔ wu ne: əte də lɔkədɨ, wala də tsheləbu kpə ə̂grûtshe, wala ndə əkɨ kɔngatə, wala də əzɨ. 36 Tshə â yi kumu ye də əlo yekɔ wala də alɔ yekɔ, ə lï ndə kə pa tshə sɔtə̂ e sɔ lə əlo ne. 37 Əpʉ ə̂në mə sə kə pa kə e kɔ, mə pa kə azü nɔ̂: e lö lö ne.»