Marcos 3

Jezu grɔ̂ rəka tə̂ ə̈bə̈ koshe ə̂në kəna ye tshû gâ ye kɔ

1 Jezu nâ kwatə̂ye mâ lə anda aangbɔ nə. Ə̈bə̈ koshe sə̂ je mâ lə anda aangbɔ nə ə̂në kəna ye tshû gâ ye kɔ. 2 Afariza sə̂ kə shekɔ Jezu ndə kə wu ərə ə̂në tshə sə kə mbrə nə ndə kə grɔ rəka tə̂ koshe nə tə̂ əlo saaba kɔ, kanika alane sɔtə̂ ə̈bə̈ əpʉ kə lea ətshə tə̂ nə. 3 Jezu pâ kə koshe nə ə̂në kəna ye nə tshû gâ ye kɔ ə pa: «Äfɔ ə kä kpə lə ə̂grû tə̂ azü nə kotəye.» 4 Mandânə, tshə pâ kə əndje ə pa: «Âgbɔ̂ əpʉ zâ äwä ndə kə mbrə ə̂rɔ̂nə wala əmbrʉnə, ndə kə tshɔ əzü lə kuzu wala ndə kə wo əzü tə̂ əlo saaba a?» Bale, əndje â ama əndje â bale ne. 5 Jezu shêkɔ əndje nɔ̂ ʉrrr də əkɔ. Əyo sə̂ tə̂ lɔsu ye mbrə ə̂në kumu əndje gbɔ̂ wââ kɔ. Tshə pâ kə koshe nə ə pa: «Yërɔ tshelə kəna zə!» Koshe nə yêrɔ tshelə kəna ye nə, kəna ye nə gâmba tə̂ ye gâ mandânə. 6 Afariza nə wûtu lə anda aangbɔ nə gashu ə tê azü tshelə aangbɔ nə̂ Erɔdə diawû. Əndje ngbô tə̂ əndje gâ tə̂ nə ndə kə pra äwä ndə kə wo Jezu nə.

Ə̂kpû azü nâ ə tê Jezu

7 Jezu də atrawaya nə̂ ye gbə̂tɔ tə̂ əndje ə nâ mâ tə̂ ama dala ə̂ngû əgɔ Galile. Ə̈bə̈ ə̂kpû azü zâ äwä ye. Azü nə âfɔ lə ashɔ əgɔ Galile nə gâ ndə ashɔ əgɔ Jude â nâ kɔ. 8 Alabə̈ əndje âfɔ mâ Jeruzalamə, ndje lə ashɔ əgɔ Idume də azü əgɔ djoko ətshî ə̂ngû Jurda, ndje lə ashɔ aəgɔ Tirə gâ ndə Sidɔ. Ə̂kpû azü nə nâ gâ tə̂ Jezu nə mbrə ə̂në əndje djî ndə əpʉ aərə ə̂në tshə mbrə̂ kɔ. 9 Tshə pâ kə atrawaya nə̂ ye ə pa əndje pra ə̈bə̈ əgerə âgbâ mbrə əne kanika azü nə za tə̂ əndje za trɔ əne ne. 10 Alayïrəka nɔ̂ sə̂ kə gbugbru tə̂ əndje ndə kə goro ətshə mbrə ə̂në tshə sə̂ kə grɔ arəka tə̂ azü ngbatshe. 11 Ənə̂ azü ə̂në əndje sə̂ də aafrɔ ayirə̂ lə əndje kɔ, alɔ ə̂në əndje wû ətshə, əndje tê gâ tshekudu ye ə tâ râwâ ə pa: «Bə sə tə Ɨrɨ Ndjapä!» 12 Bale, Jezu ngâ kə əndje tə bandanə ndə kə pa əndje pa ndə ye pa gashu ne.

Jezu kê azü-awla morofo amanə bishi

13 Mandânə, tshə nâ na ye mâ tə̂ kumu kaga. Tshə ê azü ə̂në tshelə ye yîndə əndje kɔ â əndje nâ gâ tə̂ ye. 14 Tshə kê azü morofo amanə bishi lə takpa tə̂ əndje ə̂në tshə djî əɨrɨ əndje ə pa azü-awla kɔ ndə kə pa əndje sə gâ ngotə̂ ye alɔnɔ̂, ka tshə wla əndje, əndje na na ye ə mʉ Ə̂rɔ̂ Əpʉ. 15 Tshə zâ awlra kə əndje ndə kə pa əndje grɔ aafrɔ ayirə̂. 16 Azü-awla nə morofo amanə bishi nə ə̂në tshə kê əndje kɔ kə də̂: Shemɔ ə̂në tshə djî əɨrɨ ye ə pa Piarə kɔ; 17 də Zake gâ ndə aye nə də Zââ ə̂në əndje sə̂ tə aləvu Zebede kɔ, ə̂në tshə djî əɨrɨ əndje ə pa Bwanarəjasə ə̂në ə yində kə pa nə ə pa: «Aneshe kə sɔ yavrɨ»; 18 də Andre, də Flipə, də Bartalami, də Matiɔ, də Toma, də Zake ɨrɨ Alfe, də Tade, də Shemɔ ə̂në tshə sə̂ kə mbrə awlra ndə kə pa əgɔ nə̂ ye wutu lə kanga kɔ, 19 gâ ndə Judasə Isəkariɔtə, ətshə ə̂në tshə ka Jezu je kɔ.

Alayɔ Jezu yîndə kə ro də ətshə ngrʉ̂ tə̂ ə̂kpû azü

20 Mandânə, Jezu dô tə̂ ye ə gû gâ lə manda. Ə̂kpû azü nə ngbô tə̂ əndje kwatəndje gâ tə̂ nə ə rô pâ nə â äwä ndə kə pa tshə zɨ ərə də atrawaya nə̂ ye gûta gû ne. 21 Alɔ ə̂në alayɔ nə djî ndə ye kɔ, əndje nâ ndə kə za ətshə mbrə ə̂në əndje wû ənə̂ əndje ə pa yïrə̈ mbrə̂ ətshə gâ ye.

Jezu kîrə əpʉ kə aawolea ətshə

22 Alabə̈ aawoyisə̂ âgbɔ̂ əpʉ nə̂ Mayïzə ə̂në əndje tô mâ Jeruzalamə â nâ kɔ pâ əpʉ ə pa: «Jezu sə də Beləzebulə lə ye, makɔndji nə̂ aafrɔ ayirə̂, ətshə kə za awlra kə ətshə ndə kə pa tshə grɔ də aafrɔ ayirə̂ səkɔ.» 23 Bale, Jezu ê aawoyisə̂ âgbɔ̂ əpʉ nə̂ Mayïzə nə ə pâ əpʉ kə əndje lə əpʉ kəwû ə pa: «Sataa lï ndə kə grɔ tə̂ ye də ə̂tə̂ ye atâ a? 24 Kədə azü tshelə ə̈bə̈ əgɔ kə sə kə mbrə awlra lə takpa tə̂ əndje, əgɔ nə ə sə sə pə je ne. 25 Kədə azü tshelə ə̈bə̈ bəngʉ kə sə kə mbrə awlra lə takpa tə̂ əndje, azü tshelə bəngʉ nə ə sə sə pə je ne. 26 Kədə Sataa kə sə kə mbrə awlra gâ tə̂ ye də ə̂tə̂ ye â tshelə əgɔ nə̂ ye kə ndjɔ, ngerə nə̂ ye ə sə sə pə je ne ə sə kə nglɔ nə.

27 «Ə̈bə̈ əzü â yində kə li gâ lə anda nə̂ ə̈bə̈ əyïworɔgbɔ ndə kə ko aərə nə̂ ye tə̂ ye, tshə lï ndə kə i ətshə angbʉlînə gâ ye kane â gâ mandânə, tshə lï ndə kə ko aərə tshelə anda nə̂ ye nə nɔ̂ ndə kə ro də nə.

28 «Djatra əpʉ, mə pa kə e, anyaka ə̂në azü mbrə də ə̂gû ə̂në əndje gu tə̂ Ndjapä kɔ, Ndjapä sə kə gba tshelə nə lə akrɔ əndje. 29 Bale, əzü nɔ̂ ə̂në tshə gu Âgbɔ̂ Yîrə̂, Ndjapä sə sə kə gba tshelə nyaka nə̂ ye nə bale ne. Nyaka nə sə kə sə pə piii lə kumu ye.»

30 Jezu pâ əpʉ sə̂ rə mbrə ə̂në azü pâ tshə sə̂ də afrɔ yîrə̂ lə ye.

Djatra alayɔ Jezu

31 Əyï Jezu də alaye nə nâ. Əndje kâ mashu â wlâ ə̈bə̈ əzü ndə kə pa tshə e ətshə. 32 Ə̈bə̈ əgerə ə̂kpû azü sə̂ ngotə̂ ye. Əndje pâ kə ətshə ə pa: «Əyï zə də alaye zə gâ ndə alakobɔ zə sə mashu, əndje sə kə pra əbə.» 33 Jezu kîrə əpʉ ə pa: «Əyï əmə də alaye əmə kə də̂ aəde?» 34 Mandânə, tshə lîshi ə wû azü nə ə̂në əndje sə̂ gâ tʉ dji ətshə kɔ ə pâ: «E lïshi-a! Əyï əmə də alaye əmə kə səye. 35 Əzü ə̂në tshə mbrə ərə ə̂në tshelə Ndjapä yində nə kɔ, tshə sə tə aye əmə, tə kobɔ əmə wala tə əyï əmə.»