1 Rəkɔ mə yu tə̂ əmə ə pa: Ndjapä nə wə̂ra tə̂ ye tə̂ azü nə̂ ye nə gâ ye a? Bale ne! Mbrə ə̂në, əmə ndje, mə sə tə əzü əgɔ Isərayalə nə, tə angwa Abraamo, lə marä Bejama. 2 Ndjapä nə wə̂ra tə̂ ye wə̂ra tə̂ azü nə̂ ye nə ə̂në tshə kê əndje ətshinə gâ ye kɔ ne. E wusə̂ əpʉ ə̂në Fraka nə̂ Ndjapä pâ lə əpʉ ə̂në Eli pâ kə Ndjapä ə kɨ əyo tə̂ ye də əɨrɨ azü əgɔ Isərayalə nə kɔ ne a? 3 Tshə pâ əpʉ ə pa: «Əyïlingû, əndje wô aawopandəma zə ə ngɔ̂ agblaka nə̂ zə gâ tʉ gâ ye. Mə daka pə kʉtə̂ əmə tshî, â əndje sə kə pra äwä ndə kə pa əndje wo əmə.»* 4 Bale, əpʉ yekɔ də̂ Ndjapä nə pâ kə ətshə? Ndjapä nə pâ: «Mə kô azü sake mindû amanə bishi (7 000) ə bâta əndje kpî gashe gâ ye mbrə əmə, ə̂në əndje gbə̂ gbə̂te də matshi kota əndje ətshi Baalə alɔ bale ne kɔ.»* 5 Äwä bale ndje, kpəsəye, ə̈bə̈ ə̂dû azü daka pə teashe ə̂në Ndjapä kê əndje lə ə̂rɔ̂tə̂ ye gâ ye kɔ. 6 Bale, Ndjapä nə kê əndje lə ə̂rɔ̂tə̂ ye, ə də̂ mbrə aərə ə̂në əndje mbrə̂ kɔ də̂ tshə kê əndje kɔ ne, də̂ nə ə̂rɔ̂tə̂ Ndjapä nə sə sə kə sə kəmə ngâ tə̂ ə̂rɔ̂tə̂ ne.

7 Âdâ əpʉ sə̂ kə də̂ yekɔ? Azü əgɔ Isərayalə nə sɔ̂tə̂ ərə ə̂në əndje sə̂ kə pra nə kɔ sɔ̂ ne. Kʉtə̂ azü nə ə̂në Ndjapä nə kê əndje kɔ kə sɔ̂tə̂ ərə nə. Bale, ə̂dû azü nə kumu əndje gbɔ̂ gâ ye. 8 Mbrə ə̂në Fraka nə̂ Ndjapä pâ:

«Ndjapä zâ ə̈bə̈ yîrə̂ əlo kə əndje

ə ko ala kə wu ərə wû də nə ne kə əndje

ə ko aətu kə dji əpʉ dji də nə ne kə əndje,

ndjɔ kpəsəye.»*

9 Â Davidə pâ ndje əpʉ ə pa:

«Arəgo nə̂ əndje dö tə̂ ye tə ə̂kû tə̂ əndje,

tə gbânda ətshi əndje,

tə kudû ə̂në əndje te lə nə,

tə ngbanga gâ pâ əndje!

10 Tshelə ala əndje bü,

ndə kə pa əndje wu ərə wu ne!

Këwle yerɔvrɔ əndje alɔnɔ̂!»*

11 Rəkɔ, mə yu tə̂ əmə ə pa: Ajuwufu nə kô aə̈nü əndje trɔ ərə kɔ, əndje tê ngâ gâ ye? Bale ne! Bale, mbrə kə dji əpʉ dji tə̂ əndje ne, ə̂dû amarä sɔ̂tə̂ äwä kə she lə kuzu, ndə kə pa manda mbrə Ajuwufu nə. 12 Â kədə kə dji əpʉ ə̂në Ajuwufu nə djî djî nə kɔ kə nâ də ə̂rɔ̂ ərə kə azü tshepashɔ â kə te əndje kə nâ də ə̂rɔ̂ ərə kə azü ə̂në əndje sə sə tə Ajuwufu ne kɔ, rəkɔ kə gu əndje nɔ̂ gâ tə̂ äwä kə she lə kuzu ə sə ənə̂ ye kwatə̂ye atâ a!

13 Mə sə kə pa kə e, e-e ə̂në e sə sə tə Ajuwufu ne kɔ, ə pa mə sə tə əzü-awla mbrə azü ə̂në əndje sə sə tə Ajuwufu nə ne kɔ, â mə sə kə da əkro əmə tə̂ kosəra nə ə̂në mə sə kə mbrə nə kɔ, 14 kanika, äwä nə â sə je, manda mbrə azü nə lə marä nə̂ əmə nə, ka alabə̈ əndje she lə kuzu. 15 Mbrə ə̂në, alɔ ə̂në Ndjapä nə gî əndje gashe gâ ye kɔ, tshelə takpa tə̂ Ndjapä nə də azü tshepashɔ shê gâ mandânə gâ ye. Bale, alɔ ə̂në Ndjapä nə ə ko əndje gâ tə̂ ye kwatə̂ye je kɔ, ərə nə sə kə sə kwatə̂ye atâ a? Ə sə kə sə tə kə tɔ lə kuzu ndə kə sə də sorô.

16 Kandää, kədə angbʉlî kumu mapa kə sə kpî mbrə Ndjapä, ə̂dû nə tshegege sə ndje kpî mbrə Ndjapä nə; â kədə əshe ayɔ kə sə kpî mbrə Ndjapä, ayana ayɔ nə nɔ̂ sə ndje kpî mbrə Ndjapä nə. 17 Bale, azü əgɔ Isərayalə nə sə tə ayɔ ɔlivə tshelə kəndɨ ə̂në əndje dê alabə̈ ayana nə gâ ye. Â əbə, ə̂në bə sə tə marä kpî, ə̂në bə sə tə yana ayɔ ɔlivə tshelə güsü kɔ, əndje zâ əbə ə yî əbə gâ lə klʉda ayɔ nə gâ mandâ aənə̂ sə̂ ə̂në əndje dê gâ ye kɔ. Â bə sə kə sɔtə̂ ə̂ngû tshelə əshe ayɔ ɔlivə nə ə̂në bə tɔ̂ gâ pâ nə kɔ äwä bale də ayana ayɔ nə. 18 Dä əkro zə dä ə pa bə rô ayana ayɔ nə ə̂në əndje dê gâ ye kɔ ne. Kədə bə da əkro zə, wüsə̂ nə ə pa ə də̂ əbə də̂ kə za əshe ayɔ nə ne, bale əshe ayɔ nə kə za əbə kɔ.

19 Rəkɔ, bə sə kə pa nə ə pa: «Əndje dê alabə̈ ayana ayɔ nə gâ ye, ndə kə pa əndje za əmə ə yi əmə gâ lə əndu ayɔ nə.» 20 Ə sə də äwänə. Əndje dê əndje nə mbrə kə gbɔ lɔsu əndje, â əbə, mbrə lɔsu zə də̂ bə daka pə je kɔ. Rəkɔ, mbrə̈ wuma mbrə̈ ne, mbrə̈ awa tə̂ zə! 21 Mbrə ə̂në, kədə Ndjapä nə kə kâtə̂ djatra ayana ayɔ nə kâ tʉ ne kɔ, tshə sə sə kə katə̂ zə tʉ ndje ne. 22 Rəkɔ, wü äwä ə̂në Ndjapä ə mbrə ə̂rɔ̂tə̂ ye tə̂ nə də äwä ə̂në tshə nga də nə kɔ! Tshə ngâ kə azü nə ə̂në əndje tê gâ ye kɔ, â mbrə̂ ə̂rɔ̂tə̂ ye kə əbə, kədə bə daka pə kpirə̂ lə ə̂rɔ̂tə̂ ye nə; də̂ ne, əndje sə kə de əbə ndje. 23 Azü əgɔ Isərayalə nə ndje, kədə əndje da daka pə ndə kə gbɔ lɔsu əndje nə ne, əndje sə kə ko əndje ə yi əndje kwatəndje gâ lə əndu ayɔ nə. Mbrə ə̂në Ndjapä nə sə də awlra ndə kə pa tshə ko əndje ə yi əndje kwatə̂ye gâ lə əndu ayɔ nə. 24 Əbə, kədə əndje dê əbə pa djatra ayɔ ɔlivə tshelə güsü, â yî əbə gâ lə ayɔ ɔlivə tshelə kəndɨ kɔ, ərə ə̂në ə də̂ äwä kə ma nə də̂ kə sə̂ ne kɔ; ənə̂ əndje də̂ Ajuwufu nə ə̂në əndje sə tə ayana ayɔ ɔlivə tshelə kəndɨ nə kɔ, kə ko əndje ə yi əndje gâ lə ayɔ ɔlivə kəndɨ nə sə sə kə sə tə ə̂rɔ̂nə ə ro ne a!

25 Alaye, mə yində kə pa e wusə̂ âdâ əpʉ lengerə səye, kanika e wu tə̂ e wu tə aawowusə̂ âdâ ərə ne. Əpʉ səkɔ kə də̂ alabə̈ azü əgɔ Isərayalə nə sə kə gbɔ lɔsu əndje ʉrrr ə̂dû amarä nɔ̂ ə̂në əndje sə sə tə Ajuwufu ne kɔ ə li gâ lə takpa tə̂ azü nə̂ Ndjapä gâ ye kane. 26 Â rə də̂ azü əgɔ Isərayalə nə nɔ̂ sə kə she lə kuzu, ə lï də əpʉ ə̂në Fraka nə̂ Ndjapä pâ:

«Awodjɔ azü lə kanga ə afɔ mâ Siɔ â na,

â tshə sə kə djɔ aəmbrʉ aərə nə̂ azü lə marä nə̂ Jakɔbə gashe tə̂ əndje.

27 Â mbʉkʉ nə̂ əmə də aəndje sə kə sə rə,

alɔ ə̂në mə sə kə gba tshelə anyaka nə̂ əndje.»*

28 Gâ pâ Ə̂rɔ̂ Əpʉ, əndje sə tə alayïkowɔ nə̂ Ndjapä mbrə ə̂rɔ̂ ərə nə̂ e. Bale, gâ pâ əpʉ kə ke azü, əndje sə tə azü ə̂në Ndjapä yîndə əndje mbrə alätä əndje. 29 Mbrə ə̂në Ndjapä do tshelə əpʉ ama ye do tə̂ aâkrâ nə̂ ye də əpʉ kə e ətshe nə̂ ye ne. 30 Leme-e, e wə̂ra tə̂ e tə̂ əpʉ ama Ndjapä, bale kpəsəye Ndjapä nə mbrə̂ ə̂rɔ̂tə̂ ye kə e gâ ye, mbrə kə dji əpʉ ama Ndjapä dji ne tə̂ azü əgɔ Isərayalə nə. 31 Äwä bale ndje, kpəsəye əndje dji əpʉ ama Ndjapä dji ne, kanika, tə̂ äwä ə̂rɔ̂tə̂ Ndjapä nə ə̂në tshə mbrə̂ kə e kɔ, Ndjapä nə mbrə ndje ə̂rɔ̂tə̂ ye kə əndje. 32 Mbrə ə̂në Ndjapä nə kânga azü nɔ̂ lə kə dji əpʉ dji ne, ndə kə pa tshə mbrə ə̂rɔ̂tə̂ ye kə azü nə nɔ̂.

33 Ə̂rɔ̂ ərə nə̂ Ndjapä də kə wusə̂ ərə nə̂ ye gâ ndə âdâ kə mbrə aərə nə̂ ye lî atâ a! Ə̈bə̈ əzü bale lï lï ndə kə pa tshə wusə̂ âdâ kə wu aərə lə ala ye ne, ka ə dji tshelə âdâ kə mbrə aərə nə̂ ye ne! 34 Mbrə ə̂në Fraka nə̂ Ndjapä pâ:

«Əde kə yêrɔ əpʉ ə̂në ə sə tə̂ lɔsu Əyïlingû kɔ?

Əde kə sə tə awomʉ əpʉ kə ətshə ə?*

35 Əde kə zâ ərə kə ətshə angbʉlînə,

ndə kə pa tshə za ərə nə gâ mandânə ə?»*

36 Aərə nɔ̂ to mâ ndə ye, aərə nɔ̂ wu tsheshu tə̂ äwä ye â sə mbrə ətshə. Aərə nɔ̂ mbë ətshə də ə̂ngû də ə̂ngû! Asərəmə!