1 Mə zâ kobɔ əzə̂ də Fɔbe, ə̂në tshə sə tə diakrə lə Laglizə əgɔ Sanəkre kɔ, gâ lə kəna e. 2 E zä ətshə gâ tə̂ e, mata əzü nə̂ Âgbɔ̂ Əyïngerə, ə lï də äwä ə̂në azü nə̂ Ndjapä ə mbrə alɔnɔ̂ kɔ, ə yï kəna e kə ətshə lə aərə nɔ̂ ə̂në tshə ma əgo nə kɔ, mbrə ə̂në tshə tɨ̂ azü ngbatshe gâ lafɔ, gâ ndə əmə ndje nɔ̂.

3 E blä Prisilə*16.3 Prisilə: Lə alabə̈ afraka əndje ê ə pa Prisəka. də Akilasə, agbɔbəngâ kosəra nə̂ əmə lə Jezu Kristə kɔ, kə əmə; 4 əndje ə̂në əndje kâ tə̂ əndje â shê əmə lə kuzu kɔ. Ə də̂ kʉtə̂ əmə də̂ kə za mərshe kə əndje kɔ ne, azü Alaglizə nɔ̂ ə̂në ə sə sə tə ənə̂ Ajuwufu nə kɔ za ndje mərshe kə əndje. 5 E blä ndje azü Laglizə ə̂në əndje ngbo tə̂ əndje lə anda nə̂ əndje nə kɔ kə əmə. E blä Epayinatə ə̂në mə yîndə ye wââ kɔ kə əmə, ə̂në tshə sə tə angbʉlî əzü ə̂në tshə zâ lɔsu ye kə Kristə lə ashɔ Azi kɔ. 6 E blä Marə̂, ə̂në tshə mbrə̂ kosəra ngbatshe mbrə e kɔ, kə əmə. 7 E blä Andronikusə də Juniasə, alayɔ əmə də agbɔbəngâ əmə lə kânga ndje kɔ, kə əmə. Əndje ə̂në, lə takpa tə̂ azü-awla, azü nə lʉ əndje ngbatshe kɔ, ə̂në əndje zâ tə̂ əndje kə Kristə angbʉlînə tə̂ əmə kɔ.

8 E blä Apliatusə kə əmə, ə̂në mə yîndə ye ngbatshe lə Âgbɔ̂ Əyïngerə kɔ. 9 E blä Urəba, gbɔbəngâ kosəra nə̂ əzə̂ lə Kristə, gâ ndə Sətakisə, ə̂në mə yîndə ye wââ kɔ, kə əmə. 10 E blä Apelesə kə əmə, ə̂në tshə yîsə̂ nə ngâ gashu ə pa əne sə tə əzü nə̂ Kristə gâ ye kɔ. E blä azü tshelə anda nə̂ Arisətɔbulə kə əmə. 11 E blä əyɔ əmə də Erɔdiɔ kə əmə. E blä azü tshelə anda nə̂ Narəsisə, ə̂në əndje sə tə azü nə̂ Âgbɔ̂ Əyïngerə kɔ kə əmə. 12 E blä Trifanə gâ ndə Trifɔzə ə̂në əndje mbrə̂ kosəra mbrə Âgbɔ̂ Əyïngerə kɔ kə əmə. E blä Perəsidə, ə̂në mə yîndə ye wââ kɔ, kə əmə, ə̂në tshə mbrə̂ kosəra ngbatshe mbrə Âgbɔ̂ Əyïngerə kɔ. 13 E blä Rufusə, ə̂në Âgbɔ̂ Əyïngerə kê ətshə gâ ye kɔ, gâ ndə əyï nə, ə̂në tshə sə ndje mata əyï əmə kɔ, kə əmə. 14 E blä Asikritə də Flegɔ də Erəmesə də Patrɔbasə də Erəmasə gâ ndə alaye ə̂në əndje sə ngotə̂ əndje kɔ kə əmə. 15 E blä Filɔlɔgə gâ ndə Juli, də Nere gâ ndə kobɔ nə, də Ɔlapə gâ ndə azü nə̂ Ndjapä nɔ̂ ə̂në əndje sə ngotə̂ əndje kɔ kə əmə.

16 E blä tə̂ e lə takpa tə̂ e tə̂ äwä kə ɔ ama e tə alaye azü. Azü Alaglizə nə̂ Kristə nɔ̂ bla e.

17 Alaye, mə sə kə mʉ əpʉ kə e ndə kə pa ala e gbɔ tə̂ azü ə̂në əndje na də əpʉ kə sɔ tshelə takpa tə̂ azü ə gi azü gâ tə̂ äwä nyaka kɔ â wəra tə̂ əndje tə̂ əpʉ ə̂në əndje yîsə̂ nə kə e kɔ gâ ye. E gï tə̂ e gashe ngrʉ̂ tə̂ əndje. 18 Mbrə ə̂në marä tə̂ azü rə sə sə kə mbrə kosəra kə Kristə Âgbɔ̂ Əyïngerə nə̂ əzə̂ nə ne, bale əndje sə kə mbrə kosəra nə mbrə ə̈vü əndje də ə̂tə̂ əndje; â tə̂ äwä aəpʉ ə̂në ə to ə to kɔ də aə̂rɔ̂ aəpʉ, əndje sə kə frɔ azü ə̂në ala əndje nê nê ne kɔ. 19 Ənə̂ e, azü nɔ̂ wûsə̂ nə gâ ye ə pa e sə kə dji əpʉ, â rəkɔ, tshelə əmə sə də ə̂rû mbrə e, bale mə yində nə ə pa e sə tə aawowusə̂ âdâ ərə gâ pâ əpʉ ə̂rɔ̂ ərə ə wəra tə̂ e tə̂ äwä əmbrʉ ərə. 20 Ndjapä nə ə̂në tshə za blatshe kɔ ə shi tshelə Sataa katshä katshä səye tshekudu ə̈nü e je.

Ə̂rɔ̂tə̂ Âgbɔ̂ Əyïngerə nə̂ əzə̂ də Jezu nə sə̈ də e!

21 Timɔte, gbɔbəngâ kosəra nə̂ əmə, bla e; alayɔ əmə də Lusiyusə də Jasɔ gâ ndə Sɔsipatarə bla ndje e.

22 Əmə Terətiwusə, ə̂në mə tâ ngrowô nə kɔ, mə bla e də əɨrɨ Âgbɔ̂ Əyïngerə.

23 Gayusə, ə̂në tshə za əmə tə yirə mâ ndə ye, ə̂në Laglizə nɔ̂ sə mâ ndə ye kɔ, bla e. Erasətə, awobata ngendja tshelə gala nə, gâ ndə aye əzə̂ də Karətusə bla e. [24 Âgbɔ̂ Əyïngerə nə̂ əzə̂ də Jezu Kristə nə mbrə̈ ə̂rɔ̂tə̂ ye kə e nɔ̂! Asərəmə!]*16.24 Əpʉ səke sə sə lə alabə̈ aangbrɔ afraka Ndjapä də ama grakə ne.

25 A mbë Ndjapä! Tshə sə də awlra ndə kə pa tshə gbɔgbɔ e lə əpʉ lɔsu, ə lï də Ə̂rɔ̂ Əpʉ ə̂në mə mʉ kɔ, ə̂në ə sə tə əpʉ nə̂ Jezu Kristə kɔ, ə̂në ə sə kə pa ndə ərə ə̂në Ndjapä gâmba gâ ye ə zâ wû də ə̂ngû də ə̂ngû kɔ gashu. 26 Kpəsəye ndəma nə sə kə mbrə nə â azü nɔ̂ sə kə wu nə kɔ. Mata ə̂në Ndjapä nə ə̂në tshə sə piii kɔ zâ ama â azü aəgɔ nɔ̂ wusə̂ nə, tə̂ äwä afraka ə̂në aawopandəma Ndjapä nə tâ kɔ, ndə kə pa azü nə za lɔsu əndje kə ətshə ə dji əpʉ ama ye.

27 A mbë Ndjapä nə, tshî tə awowusə̂ âdâ ərə, də ə̂ngû də ə̂ngû piii, tə̂ äwä Jezu Kristə! Asərəmə!