1 Əbə, ə̂në bə wa ngbanga gâ lə kumu angâ zə kɔ, bə â sə kəmə tə əde, bə sə sə də ə̈bə̈ əpʉ ndə kə pa nə ne. Mbrə ə̂në, alɔ ə̂në bə sə kə wa ngbanga gâ lə kumu angâ zə nə kɔ, bə sə kə wa ngbanga nə gâ lə kumu zə də ə̂tə̂ zə, ə̂në bə sə kə mbrə kʉtə̂ ərə ə̂në əndje mbrə kɔ. 2 A wusə̂ nə ə pa Ndjapä sə kə wa ngbanga Lïndə̂ djatra əpʉ gâ pâ azü ə̂në əndje sə kə mbrə marä tə̂ aərə səkɔ. 3 Bə wu ənə̂ zə ə pa, əbə ə̂në bə wa ngbanga nə gâ lə kumu angâ zə nə mbrə aərə ə̂në əbə ndje bə sə kə mbrə nə kɔ, bə dɔ âdɔ̂ ngbanga nə̂ Ndjapä nə je a? 4 Wala bə wu âgbɔ̂ ə̂rɔ̂tə̂ Ndjapä də kə kânga tshelə ye gâ ndə äwä kə ka mbrə əbə tə amba ərə lə ala zə a? Bə wusə̂ nə wu ə pa ə̂rɔ̂tə̂ Ndjapä nə sə kə gi əbə ndə kə pa bə tshi äwä angbrɔ kə mbrə tə̂ zə tʉ ne a? 5 Bale, bə yi yində kə wusə̂ nə ne, bə sə sə də əgo ndə kə pa bə tshi äwä angbrɔ kə mbrə tə̂ zə nə tʉ ne. Âdârə ə̂në bə sə kə e âgbɔ̂ əkɔ ə̂në ə rô pâ nə gâ ye kɔ gâ pâ zə mbrə əlo ə̂në Ndjapä ə yisə̂ əkɔ nə̂ ye də kə wa ngbanga nə̂ ye ə̂në ə sə də äwänə kɔ gashu je 6 â tshə sə kə mbrə ərə kə əzü bale bale ə lï də ərə ə̂në tshə mbrə̂ gâ ye kɔ.*2.6 Wu Ətsh 62.13; Dame 24.12. 7 Tshə sə kə za sorô nə̂ alɔnɔ̂ kə azü ə̂në əndje za tə̂ əndje ndə kə mbrə ə̂rɔ̂ ərə â sə kə pra äwä kə mbe ətshe də kə lʉ ətshe gâ ndə äwä sorô ə̂në ə ro ro tə̂ ərə ne kɔ. 8 Bale, tshə sə kə yisə̂ âgbɔ̂ əkɔ nə̂ ye gashu gâ tə̂ azü ə̂në əndje wəra tə̂ əndje tə̂ ye, â wəra tə̂ əndje tə̂ djatra əpʉ â sə kə mbrə kʉtə̂ əmbrʉ ərə kɔ. 9 Âgbɔ̂ ərə əyo də âgbɔ̂ awa sə kə tə pâ azü nɔ̂ ə̂në əndje mbrə əmbrʉ ərə kɔ, Ajuwufu angbʉlînə, ndje də azü ə̂në əndje sə sə tə Ajuwufu ne kɔ. 10 Bale, Ndjapä sə kə za äwä kə mbe ətshe də kə lʉ ətshe gâ ndə blatshe kə azü nɔ̂ ə̂në əndje mbrə ə̂rɔ̂ ərə kɔ, kə Ajuwufu angbʉlînə, ndje kə azü ə̂në əndje sə sə tə Ajuwufu nə ne kɔ. 11 Mbrə ə̂në Ndjapä wu tshelə azü ə wu wu ne.

12 Azü nɔ̂ ə̂në əndje mbrə̂ nyaka ə wûsə̂ âgbɔ̂ əpʉ nə̂ Mayïzə wû ne kɔ, əndje sə kə tshu nə, ə̂në əndje wûsə̂ âgbɔ̂ əpʉ nə wû ne kɔ. Bale, azü nɔ̂ ə̂në əndje wûsə̂ âgbɔ̂ əpʉ nə gâ ye â mbrə̂ nyaka kɔ, əndje sə kə wa ngbanga əndje Lïndə̂ âgbɔ̂ əpʉ səkɔ. 13 Mbrə ə̂në ə də̂ azü ə̂në əndje dji kʉtə̂ âgbɔ̂ əpʉ nə ə dji kɔ də̂ kə sə tə aə̂rɔ̂ azü lə ala Ndjapä ne; bale azü ə̂në əndje sə tə ə̂rɔ̂nə lə ala Ndjapä nə kɔ kə də̂ azü ə̂në əndje mbrə ərə Lïndə̂ âgbɔ̂ əpʉ nə. 14 Alɔ ə̂në azü ə̂në əndje sə sə tə Ajuwufu ne kɔ, ə̂në əndje wusə̂ âgbɔ̂ əpʉ nə̂ Mayïzə wu ne kɔ, əndje sə kə mbrə ərə də ə̂tə̂ əndje Lïndə̂ âgbɔ̂ əpʉ səkɔ, ə sə a pa də âgbɔ̂ əpʉ səkɔ sə tə̂ lɔsu əndje, ə̂në əndje wusə̂ nə wu ne kɔ. 15 Əndje sə kə yisə̂ nə gashu rə ə pa əndje tâ əpʉ ərə ə̂në âgbɔ̂ əpʉ nə zâ ama də nə kɔ mâ tə̂ lɔsu əndje gâ ye â lɔsu əndje nə sə kə yisə̂ nə gashu ndje â kə tegbɔ kumu əndje sə kə lea əndje ndə ə̈bə̈ alɔ â sə kə te kɔkɔ̂ əndje ndə ə̈bə̈ alɔ ndje. 16 Ərə ə̂në ə wutu gashu tə̂ alɔ ə̂në Ndjapä ə wa ngbanga ərə nɔ̂ ə̂në ə zâ tə̂ ye wû lə ala azü kɔ je tə̂ äwä Jezu Kristə kɔ kə sə̂, mata ə̂në Ə̂rɔ̂ Əpʉ ə̂në mə mʉ kɔ yisə̂ əpʉ nə kɔ.

17 Bale əbə, bə za əɨrɨ Juwufu gâ pâ zə, bə ka gâ pâ ndəma âgbɔ̂ əpʉ â sə kə da əkro zə tə̂ Ndjapä nə̂ zə; 18 bə wusə̂ ərə ə̂në tshelə Ndjapä nə yində nə â bə wusə̂ kə ke ə̂rɔ̂ ərə mbrə ə̂në âgbɔ̂ əpʉ nə yîsə̂ äwä nə kə əbə gâ ye. 19 Bə wu ənə̂ zə ə pa bə sə tə awoyisə̂ äwä kə alayïbula, tə ə̂yîəwo mbrə azü ə̂në əndje sə lə əbutshe kɔ, 20 tə awoyisə̂ ərə kə azü ə̂në əndje wusə̂ ərə wu ne kɔ, ndje tə awoyisə̂ ərə kə aneshe, mbrə ə̂në bə wusə̂ nə ngâ ə pa bə sə kə sɔtə̂ djatra äwä əpʉ kə wusə̂ ərə də djatra əpʉ lə âgbɔ̂ əpʉ nə. 21 Rəkɔ, əbə ə̂në bə sə kə yisə̂ ərə kə angâ zə kɔ, bə yisə̂ ərə yi kə əbə də ə̂tə̂ zə ne. Bə pa azü zɨ angba zɨ ne, bale bə sə kə zɨ angba! 22 Bə pa azü pra alawɔ wala aläkɔ̈ angâ əndje pra ne, bə sə mbrə nə. Tshelə zə wəra tə̂ ye tə̂ aamba andjapä, bale bə sə kə ko aərə tə angbanə lə aanda nə̂ əndje! 23 Bə sə kə da əkro zə tə̂ âgbɔ̂ əpʉ, bale bə sə sə kə mbrə ərə Lïndə̂ âgbɔ̂ əpʉ nə ne â lʉ Ndjapä lʉ rə ne kɔ. 24 Mbrə ə̂në Fraka nə̂ Ndjapä pâ: «Mbrə e də̂ ə̂dû amarä ə do əɨrɨ Ndjapä tə ərə amɔ kɔ.»*2.24 Wu Eza 52.5.

25 Kədə bə sə kə mbrə ərə Lïndə̂ âgbɔ̂ əpʉ, əpʉ kə wa gandja sə tə ə̈bə̈ ə̂rɔ̂ ərə mbrə əbə. Bale, kədə bə mbrə ərə mbrə Lïndə̂ âgbɔ̂ əpʉ nə ne, ə sə a pa də bə wâ gandja wâ ne. 26 Â kədə əzü ə̂në tshə wâ gandja wâ ne kɔ kə sə kə mbrə ərə Lïndə̂ âgbɔ̂ əpʉ nə, Ndjapä ə wu ətshə wu lə ala ye mata əzü ə̂në tshə wâ gandja gâ ye kɔ ne a? 27 Əzü ə̂në tshə wâ gandja wâ ne kɔ â sə kə mbrə ərə Lïndə̂ âgbɔ̂ əpʉ kɔ, tshə wa ngbanga gâ lə kumu zə je, əbə ə̂në bə sə də fraka âgbɔ̂ əpʉ nə â wâ gandja gâ ye kɔ â mbrə ərə mbrə Lïndə̂ âgbɔ̂ əpʉ nə ne kɔ. 28 Mbrə ə̂në djatra Juwufu nə sə sə kʉ tə əzü ə̂në tshə sə kʉ də əɨrɨ nə kɔ ne â djatra gandja nə sə sə tə ənə̂ sə̂ azü ə wu ə wu tə̂ akwa əzü kɔ ne. 29 Bale, djatra Juwufu nə də̂ əzü ə̂në tshə sə tə Juwufu nə djoko lə ye, â djatra gandja nə də̂ ənə̂ lɔsu â gandja ənə̂ səkɔ sə sə tə̂ äwä fraka âgbɔ̂ əpʉ nə ne, bale ə sə tə ənə̂ Âgbɔ̂ Yîrə̂. Əzü rə sə sə kə sɔtə̂ kə mbe ətshe tə̂ äwä azü ne, bale Ndjapä kə mbe ətshə.