1 Rəkɔ, əpʉ yekɔ də̂ a sə kə pa nə gâ pâ əpʉ nə̂ ätä əzə̂ də Abraamo? Yekɔ də̂ tshə sɔ̂tə̂ nə? 2 Kədə Abraamo nə kə mbrə̂ alabə̈ aə̂rɔ̂ aərə â sə̂ tə ə̂rɔ̂ əzü lə ala Ndjapä mbrə nə, tshə sə kə da əkro ye tə̂ nə. Bale ətshi Ndjapä ə sə sə rə ne. 3 Mbrə ə̂në Fraka nə̂ Ndjapä pâ: «Abraamo zâ lɔsu ye kə Ndjapä â mbrə nə Ndjapä nə wû ətshə tə ə̂rɔ̂ əzü lə ala ye.»*4.3 Wu Vɔtə̂ 15.6. 4 Kandää, əzü ə̂në tshə sə kə mbrə kosəra, əndje piyi ye ə pi â kə piyi ye nə sə sə tə âkrâ ne, bale ə sə tə ərə dje ye kə sə̂. 5 Bale, kədə ə̈bə̈ əzü kə mbrə ə̈bə̈ ərə mbrə ne â za kʉtə̂ lɔsu ye kə Ndjapä ə̂në tshə wu əyïnyaka tə ə̂rɔ̂ əzü lə ala ye kɔ, Ndjapä nə sə kə ga ndə əpʉ lɔsu ye nə â wu ətshə tə ə̂rɔ̂ əzü lə ala ye je. 6 Ə sə rə də̂ Davidə pâ ndə əpʉ ə̂rɔ̂ kə sə əzü ə̂në Ndjapä wu ətshə tə ə̂rɔ̂ əzü lə ala ye â wa wa ndə aərə ə̂në tshə mbrə kɔ ne â pâ:

7 «Ənə̂ əndje tə ə̂rɔ̂nə

azü ə̂në Ndjapä gbâ tshelə aəpʉ lə kumu əndje

â tshelə anyaka nə̂ əndje gbâ gâ ye kɔ!

8 Ənə̂ ye tə ə̂rɔ̂nə

əzü ə̂në Əyïlingû wa ndə nyaka nə̂ ye wa ne kɔ!»*4.7-8 Wu Ətsh 32.1-2.

9 Ə̂rɔ̂ kə sə səkɔ sə kʉ mbrə azü ə̂në əndje wâ gandja gâ ye wala ə sə ndje mbrə azü ə̂në əndje wa gandja wa ne kɔ a? Mbrə ə̂në ä pâ: «Ndjapä gâ ndə əpʉ lɔsu Abraamo â wû ətshə tə ə̂rɔ̂ əzü lə ala ye.» 10 Gorɔ də̂ Ndjapä nə wû ətshə tə ə̂rɔ̂ əzü nə kɔ? Tshə wâ gandja gâ ye wala tshə wâ gandja wâ ne a? Ə sə̂ ətshinə ndə kə pa tshə wa gandja nə, ə də̂ djoko mandâ nə də̂ ne. 11 Abraamo nə wâ gandja nə gâ mandânə mata ə̈bə̈ ərə ndə kə yisə̂ nə ə pa Ndjapä wû ətshə tə ə̂rɔ̂ əzü lə ala ye mbrə əpʉ lɔsu ye nə gâ ye, alɔ ə̂në tshə tê tê pa ə wa gandja ne kɔ. Rəkɔ, Abraamo nə dô tə̂ ye tə abä azü nɔ̂ ə̂në əndje za lɔsu əndje kə Ndjapä, alɔ ə̂në əndje wâ gandja wâ ne kɔ, â Ndjapä nə wu əndje ndje tə aə̂rɔ̂ azü lə ala ye. 12 Tshə sə ndje tə abä azü ə̂në əndje wâ gandja gâ ye kɔ, azü ə̂në əndje wâ kʉtə̂ gandja nə wâ lə akwa əndje nə ne kɔ, bale ə̂në əndje sə kə mbrə ndje ərə mata abä əzə̂ də Abraamo nə ə̂në tshə zâ lɔsu ye kə Ndjapä nə ətshinə ndə kə pa tshə wa gandja nə kɔ.

13 Ndjapä nə zâ ama kə Abraamo nə də alätä nə ə pa tshepashɔ ə sə tə ərə nə̂ əndje je. Bale, əpʉ ama səkɔ ə̂në Ndjapä nə zâ kɔ, tshə zâ zâ mbrə ə̂në Abraamo nə mbrə̂ ərə Lïndə̂ âgbɔ̂ əpʉ ne. Tshə zâ ama səkɔ mbrə ə̂në tshə wû Abraamo nə tə ə̂rɔ̂ əzü lə ala ye mbrə əpʉ lɔsu ye. 14 Kədə aərə səkɔ ə̂në Ndjapä zâ ama də əpʉ nə kɔ kə sə kʉ mbrə azü ə̂në əndje sə kə mbrə ərə Lïndə̂ âgbɔ̂ əpʉ nə kɔ, əpʉ lɔsu nə sə kə sə kəmə tə amba ərə â âdâ əpʉ ama Ndjapä nə ə sə sə je ne. 15 Mbrə ə̂në âgbɔ̂ əpʉ nə sə kə mbrə ndə kə pa əkɔ nə̂ Ndjapä afɔ, bale tə̂ ətshe ə̂në âgbɔ̂ əpʉ nə sə sə je ne kɔ, əpʉ kə mbrə ərə mbrə̂ Lïndə̂ âgbɔ̂ əpʉ nə ne sə sə kə sə je ndje ne.

16 Rəkɔ, azü ə̂në əndje za lɔsu əndje kə Ndjapä kɔ kə sɔtə̂ aərə ə̂në tshə zâ ama də əpʉ nə kɔ, ndə kə pa ə sə tə amba âkrâ ka ə sə mbrə aləvu Abraamo nə nɔ̂. Ə də̂ kʉ mbrə əndje ənə̂ sə̂ ə̂në əndje sə kə mbrə ərə Lïndə̂ âgbɔ̂ əpʉ nə kɔ ne, bale ndje mbrə əndje ə̂në əndje za lɔsu əndje kə Ndjapä nə mata Abraamo nə kɔ. Abraamo nə sə tə abä əzə̂ nə nɔ̂, 17 mata ə̂në Fraka nə̂ Ndjapä pâ: «Mə mbrə̂ əbə tə abä ə̂kpû amarä»*4.17 Wu Vɔtə̂ 17.5. kɔ. Tshə sə tə abä əzə̂ nə lə ala Ndjapä nə ə̂në tshə zâ lɔsu ye kə ətshə kɔ, Ndjapä nə ə̂në tshə za sorô kə akuzu â ê ərə ə̂në ə wû tsheshu wû nə kɔ â wû tsheshu kɔ. 18 Abraamo nə yîndə əpʉ nə də lɔsu ye â zâ lɔsu ye nə gâ pâ nə, ə̂në ərə kə za lɔsu gâ pâ əpʉ nə sə mata amba ərə kɔ, â rəkɔ tshə dô tə̂ ye tə «abä ə̂kpû amarä», Lïndə̂ əpʉ ə̂në Ndjapä nə pâ kə ətshə kɔ ə pa: «Aləvu zə ə sə rə je.»*4.18 Wu Vɔtə̂ 15.5. 19 Tshə sə̂ də ə̂ngû mata ngbangbo bale, bale lɔsu ye mɔ̂ mɔ̂ ne, alɔ ə̂në tshə lî tshelə ye gâ pâ əndu ye də ə̂tə̂ ye ə̂në tshə ndô də kuzu gâ ye, ndje gâ pâ əwɔ nə də Sara ə̂në tshə sə tə märä kɔ. 20 Əpʉ lɔsu ye nə kə Ndjapä nə kâ kâ ne â tshə shêra əpʉ ama Ndjapä nə ə̂në tshə zâ kɔ shêra ne; bale lɔsu ye nə gbɔ̂gbɔ ətshə â tshə mbê Ndjapä nə. 21 Tshə wûsə̂ nə ngâ ə pa Ndjapä nə sə də awlra ndə kə pa tshə mbrə ndəma əpʉ ə̂në tshə zâ ama də nə gâ ye kɔ. 22 Âdârə ə̂në Ndjapä pâ Abraamo nə sə tə ə̂rɔ̂ əzü lə ala əne, mbrə əpʉ lɔsu ye, kɔ kə sə̂. 23 Bale əpʉ sə̂ ə̂në əndje tâ ə pa «Ndjapä wû ətshə tə ə̂rɔ̂ əzü» kɔ, sə sə kʉ mbrə ətshə bale ne. 24 Əndje tâ əpʉ səkɔ ndje mbrə əzə̂ ə̂në a lï ndə kə pa a sə tə aə̂rɔ̂ azü lə ala Ndjapä nə mbrə lɔsu əzə̂ nə, əzə̂ ə̂në a za lɔsu əzə̂ kə Ndjapä nə ə̂në tshə shê Jezu Âgbɔ̂ Əyïngerə nə̂ əzə̂ lə takpa tə̂ akuzu gâ ye kɔ. 25 Əndje kâ ətshə mbrə anyaka nə̂ əzə̂ â Ndjapä nə shê ətshə mbrə ndə kə pa tshə mbrə əzə̂ tə aə̂rɔ̂ azü lə ala ye.