1 E-e də̂ alayïrishi, ə̂në a lə ye, e kɨ̈ əkɨ ə tä râwâ mbrə əyo ə̂në ə sə kə na gâ pâ e kɔ! 2 Aərə rishi nə̂ e fû gâ ye, aäkɔ̈ gbâ tshelə aləba nə̂ e gâ ye! 3 Ngbʉndji zâ lɔrə nə̂ e də ngendja nə̂ e gâ ye, â ngbʉndji lɔrə nə də ngendja nə ə za əpʉ gâ lə kumu e je, ə zɨ dɔ̂ngɔ̂ e mata əwo ə̂në ə ju ərə kɔ je. Bale aəlo tshepashɔ ndô trö gâ ye, bale e daka pə ndə kə ngbo aərə rishi gâ pâ nə gâ pâ nə! 4 Ngendja kosəra nə̂ alayïkosəra ə̂në əndje rɔ̂ angwa rəgo lə kəndɨ nə̂ e, ə̂në e gbɔ̂ tə̂ nə gâ ye kɔ sə kə ta râwâ. Â râwâ aaworɔ angwa rəgo nə lə kəndɨ nə kɨ ndjɔ gâ lə grotu Əyïlingû Âgbɔ̂ Əyïworɔgbɔ. 5 E sə pâ ashɔ lə ə̂rɔ̂ kə sə, lə rishi, əgo lɔsu e tshî kə də̂ kə zɨ rəgo ə gbro mata aagia ə̂në əndje bata əndje ndə kə wo əndje kɔ. 6 E wâ ngbanga gâ lə kumu ə̂rɔ̂ əzü ə wô ətshə; tshə mbrə̂ awlra mbrə̂ ətshi e ne.

7 Alaye əmə, rəkɔ, e känga lɔsu e ə kä tə̂ alɔ kə gu Âgbɔ̂ Əyïngerə. E wü awodjo kəndɨ. Tshə sə kə kânga lɔsu ye ə ka tə̂ ə̂rɔ̂ rəgo kəndɨ nə, ʉrrr ndjɔ ə sɔtə̂ angbʉlî angwa rəgo nə də bale angwa rəgo nə gâ ye kane. 8 E-e ndje, e känga lɔsu e ə kä ə kä, e gbɔ̈gbɔ lɔsu e, mbrə ə̂në alɔ kə gu Âgbɔ̂ Əyïngerə nə ndô trö gâ ye.

9 Alaye əmə, e kɨ̈ kɨ̈ də əɨrɨ angâ e lə takpa tə̂ e ne, ndə kə pa əndje wa ngbanga wa gâ lə kumu e ne: awowa ngbanga nə kə ka lə manda tə ye! 10 Alaye əmə, ə də̂ əpʉ kə wu əyo də əpʉ kə kânga lɔsu lə əyo nə, e wü kʉtə̂ aərə ə̂në ə mbrə̂ gâ tə̂ aawopandəma Ndjapä ə̂në əndje pâ əpʉ də əɨrɨ Əyïlingû leme-e kɔ. 11 A pa ənə̂ əndje tə ə̂rɔ̂nə, azü nə ə̂në əndje kânga lɔsu əndje gâ ye lə aərə əyo səkɔ. E djî ndə əpʉ kə kânga lɔsu Jɔbə lə aərə əyo gâ ye, â e wû aərə ə̂në Əyïlingû kô kə ətshə mandânə kɔ gâ ye, mbrə ə̂në Əyïlingû sə də ə̂rɔ̂ lɔsu tə bandanə â wu əyo azü ngbatshe.

12 Alaye əmə, angbʉlî ərə nɔ̂, e drä tə̂ e drä də əɨrɨ tshelafɔ wala də ashɔ wala də əɨrɨ ərə bale ne. Bale, kədə e pa ayî, ə daka pə ayî, wala a’awɔ̂, ə daka pə a’awɔ̂, kanika e te te gâ lə ngbanga gâ tshekudu Ndjapä nə ne.

13 Ə̈bə̈ əzü lə takpa tə̂ e sə kə wu əyo a? Tshə yü Ndjapä. Ə̈bə̈ əzü sə lə ə̂rû a? Tshə vï ətshi Ndjapä. 14 Ə̈bə̈ əzü lə takpa tə̂ e sə də rəka a? Tshə ë aâgbɔ̂ azü Laglizə, əndje nä ə yü Ndjapä mbrə ətshə ə göro ətshə də kâdâ də əɨrɨ Âgbɔ̂ Əyïngerə. 15 Kədə əndje yu Ndjapä nə â za lɔsu əndje gâ tə̂ əpʉ səkɔ, ə sə kə tshɔ əyïrəka nə, â Âgbɔ̂ Əyïngerə sə kə za ətshə gâ lafɔ. Kədə tshə mbrə̂ anyaka, tshelə anyaka nə sə kə gba nə. 16 Rəkɔ, e pä əpʉ anyaka nə̂ e gashu kə angâ e lə takpa tə̂ e, ə yü Ndjapä mbrə angâ e lə takpa tə̂ e, kanika arəka nə̂ e nglɔ. Kə yu Ndjapä nə̂ ə̂rɔ̂ əzü sə də awlra ngbatshe ndə kə pa ə mbrə ərə. 17 Eli sə̂ leme-e tə əzü mata əzə̂: tshə yû Ndjapä pə tə̂ nə pə tə̂ nə ndə kə pa yavrɨ ni ni ne, â yavrɨ nî nî gâ pâ ashɔ lə ə̂ngû vəta də yipʉ mindû amanə bale ne. 18 Mandânə, tshə yû Ndjapä kwatə̂ye; bale yavrɨ âfɔ mâ lafɔ â nî, â ashɔ lê arəgo.

19 Alaye əmə, kədə ə̈bə̈ əzü lə takpa tə̂ e kə djîngli äwä â tshî djatra əpʉ tʉ gâ ye â ə̈bə̈ əzü gu də ətshə gâ tə̂ ə̂rɔ̂ äwä nə, 20 e wüsə̂ nə ə pa əzü nə ə̂në tshə za ə̈bə̈ əyïnyaka tə̂ äwä ə̂në tshə djîngli tə̂ nə gâ ye kɔ â gu də ətshə gâ tə̂ ə̂rɔ̂ äwä, tshə sə kə tshɔ əzü nə lə kuzu, â tshelə anyaka ə̂në ə sə ngbatshe lə kumu ye kɔ sə kə gba nə.