1 Imi Pita, umpositoli waJesu Kristo,

kunaabo bakwendi balomwayikana muPontusi, Galatiya, Kapadosia, Ezhiya, nomuBhitiniya, bakashalwa naMwali, 2 bakaponchwa noluzibo lwambeli lwaMwali Tate, nokucheneswa nonshingo woMpepo unchena kuti bewhilile Jesu Kristo, nokushashailwa nelopa lilye.

Chipiwo nolunyalalo zwipamijwe kwamuli.

3 Lukujo ngalube kunaMwali naTate baTezi weduJesu Kristo! Mushe jije ihulwana takazwalwa bupya mulubimbo lupenyu mukumuka kwaJesu Kristo kunabakafa, 4 akale mushabo isinopalajika, isiloswibhiswa, isinokulumpala ilolondotelwa imwi kudenga, 5 imwi mulolindwa nesimba lyaMwali mukudimbwa pezhulu poluchijo lulomilila kutondejelwa nonshaji opejeleja.

6 Muna zwose yezwi munooshanta kasa, kojoba ngweno konshaji unshomanana munokwelela kujiijwa mukukwejwa kulosiyanasiyana. 7 Yezwi zwakezhila kuti kudimbwa kwenu kwechokomende, kutondejelwe pachena kuti kukulwana kupinda indalama ilopiswa nomoto, iyo inopalajika, yezwi zwingata, mutambule lukujo, kungaima akale nokulemekeja Jesu Kristo paachatondejelwa. 8 Kojoba musanu moombona monda, akale kojoba musinombona ngweno, modimbwa mwaali akale mulizhele lushanto lusinolebelekeka nokutunhumwija, 9 nokuti mumutambula imbuyilwa yokudimbwa kwenu, luli luchijo lwemyoyo yenu.

10 Yezwi zwili zwoluchijo yolu bapolofeti zwabakalebeleka, chipiwo chichezha kwamuli, chakashakisiswa kunakunika kukulwana, 11 bakabhuzisisa kuti unhuni kana unshajini wakatondejelwa noMpepo waKristo munaibo akale kuti wakaba utondejelani paakalebambeli nokuyabula kwaKristo nokungaima kwalutobela. 12 Zwakatondejelwa kwabali kuti abajakabezwishingila ibo koga imwi, pabakalebeleka nezwinhu zwakazibiswa imwi naabo bakabhaunula indebo imbuya kunamwi noMpepo uNchena wakatumilwa kuva kudenga. Nengilozi jinodisisa kuzwilinga zwinhu yezwi.

13 Nokudalo, nendangalilo jenu, jilomuka akale jili jilogajikana, bigani lubimbo lwenu zwizhele pe chichabuzwa kwamuli pakutondejelwa kwaJesu Kristo. 14 Sabana banowhilila, musitobele zwilakamilo zwenu zwobubi zwamazhuba akapinda okuswoziba kwenu Mwali. 15 Koga sezwo iye wakamushoba elinchena, nokudalo ibani bachena muzwito zwenu zwose, 16 nokuti zwilokwalwa kuti, "Ibani bachena, nokuti imi ndinchena."

17 Sezwo mushoba Tate banotonga umwenoumwe nemishingo iye besineshalulo, galani bupenyu bwenu mulutyo unshaji wenu wose musili beeyo nyika. 18 Nokuti moziba kuti mwakatengwa kuva munzila jisina lubhancho jimwakawana kumatategulu enu, amujakatengwa nezwinhu zwinopalala zwinanga isiliva kana indalama, 19 koga nelopa linokosha lyaKristo, imhwizana isiloswibhiswa kana. kabata. 20 Wagala wakabakashalwa inyika isanu yabumbwa, koga wakatondejelwa munshaji opejeleja zwitilwa imwi. 21 Kupindila munaiye modimbwa munaMwali, wakoomusa mubafi akompa kungaima, nokudalo kudimbwa nolubimbo lwenu zwimo munaMwali.

22 Ngweno sezwo mwazwichenesa nokuwhilila ichokomende noludo luliilo kuna umwe noumwe, dananani zwechokomende zwiva mumwoyo. 23 Mwakazwalwa bupya, kusikwembeyu inopalala, koga isinopalala, kupindila muwhi ibhenyu lisinopela lyaMwali, 24 Sezwinoleba iwhalo inchena kuti,

"Bwose banhu bananga sobuhwa,

akale kungaima kwabo kunanga sama maluba omuminda,

Buhwa bunohwihwinyala, akale maluba anombwela,

25 koga iwhi lyaTezi linogala kwemisi isinopela."

Yelyo iwhi ndilyo iNdebo iMbuya yakabhaunulilwa imwi.