1 Nenzila imwempela bakaji, zwidelejeni kubalume benu, kutila kuti bamwe, kojoba besinowhilila iwhi, bangashandulwa nezwito zwabakaji babo pesina iwhi, 2 pabachabona zwito zwenu zwoloshambijika akale nobubuya bobupenyu bwenu. 3 Kuzwinakisa kwenu kusibe kokuzhe, kokuluka masusu, kuzwilemba nendalama, akale nokumbala zwimbalo zwibhodo, 4 koga ngekube komumwoyo, bubhodo businopalajika bompepo unalunyalalo nobunyolonyolo, zwili izo zwilokosha kasa mumesho aMwali. 5 Nokudalo noumwe unshaji banhukaji bachena bakabebimba naMwali bakabezwishonga akale bezwideleja kubalume babo, 6 saSara ewhilila Abhulahamu, onshoba eti tezi. Akale ngweno imwi mubana babe, kana muta zwibuya akale pesina zwamunotya.

7 Nenzila imwempela, balume galani zwibuya nabakaji benu, mupe lukujo kubanhukaji sabakwaina basinesimba, sezwo muli balyifuma pamwempela bechipiwo chobupenyu, kutila kuti minamato yenu isikonejwe.

8 Nezwo kumapejelejo, imwi mwose mubhatane, muwhilane ishe, muludo nobubwanakwaina, nomwoyo unyolo akale nendangalilo yokuzwininipisa. 9 Musibwilizile bubi nobubi kana kutukana nokutukana, koga muneyimwe inzila kombolelani, nokuti yezwi ndizwo zwimwakashobelwa, kuti muwane kukombolelwa. 10 Nokuti,

"Iye unoda bupenyu

akale kuti ebone mazhuba mabuyanana,

ngebhise lulimi lulwe mububi

akale nondomo uwe esilebeleke zwochengeja,

11 ngesiye bubi akale ete zwilolulama,

ngeshake lunyalalo akale elutobelele.

12 Nokuti chiso chaTezi aipo pabalolulama,

akale unowha minamato yabo.

Koga chiso chaTezi achitobonana nabanota bubi."

13 Ngweno ndiyani angamulwajisa kana mwakasungwalila zwibuya? 14 Kojoba mungooyabiswa pezhulu pobululami mokombolelwa. Musitye zwabanotya kana kujiijika, 15 koga mumyoyo yenu ikujani Kristo saTezi. Unshaji wose zwibambanyileni kuzwitabilija kunhu wose unota kuti upe chisoko cholubimbo lwimo munamwi, 16 muzwite nobunyolo akale nolukujo. Londotani luyeyo lwenu luliluchena, kutila kuti, mungolebelekwa bubi, naabo banomutukila zwito zwenu zwibuya munaKristo beswabiswe. 17 Nokuti zwibuya kuyabisilwa kuta zwilolulama, kana chili chido chaMwali, pana kuta chibi. 18 Nokuti Kristo neebo wakafila luchinyo kamwempela zwachose, ulolulama etila basilolulama, kuti pamwe angatibuza kunaMwali. Wakabulayiwa mumbili koga etiwa umpenyu mumpepo, 19 muliimo mwaakenda kunobhaunula kumipepo yabanhu muntolongo, 20 basakabewhilila mumazhuba apinda, yopo moyondefu waMwali puwakamilila mumazhuba aNowa nonshaji wokubakwa kobwato, bashoma chete ndibobakachijwa muvula, banhu bashanu banabatatu chete bakachijwa. 21 Umbhabhatizo yoyu unkwejaniso nezwi, ngweno ndiwo unomuchija, kusikubhisa ishambwa pambili koga chili chibweteso kunaMwali choluyeyo lubuya, nomukumuka kwaJesu Kristo, 22 iye wakenda kudenga akale ukokuluboko lolulyi lwaMwali. Ingilozi, butongi akale namasimba zwipo pasi pape.