1 Nokudalo ndosungwaja bakulwana pakati penu, sonkulukwaina akale sonsumikiji wokujiila kwaKristo akale ndili umwe wabaimo mukungaima kuchafumulwa, 2 chejani idanga lyaMwali limunolinga. Tani kusikokubhatwa nesimba koga mukasungunuka, koga sokuda kwaMwali kusi kwendipo imbi koga nokudisisisa. 3 Musikome baipo pasi penu, koga mulimikwejaniso kudanga. 4 Akale pachaboneswa uNdyisi unkulwana, moowana chilemba cholukujo chisinokulumpala.

5 Nokudalo imwi batukutuku, zwidelejeni kubakulwana. Imwi mwose mbalani kuzwideleja umwe noumwe nokuti, "Mwali unonyenyejana nabanoshiya, koga unopa chipiwo kunabo banozwideleja." 6 Nokudalo imwi zwidelejeni pasi poluboko lunesimba lwaMwali, kuti nonshaji ulokwelela emunyamule. 7 Iposelani kubibila kwenu kose panaiye, nokuti unchengeti wenu.

8 Gajikakanani mundangalilo, bhwazulani. Chita chenu guluzhanje umunyangija seshumba imukuluma, ipota wayichalya. 9 Undambeni, mukasima mukudimbwa kwenu, muziba kuti yezwiya zwamwakaba shangana nozwo zwokuyabula zwinodikana somububwanakwaina bwenu mupasi lyose. 10 Akale mushule mokuyabula konshaji umfupi, Mwali wechipiwo chose, wakamushoba kukungaima kukwe kwemisi isinopela munaKristo, iye nokukwe unoobwiliza, ezikatija, akale emusimisa. 11 Isimba ngelibe kunaiye kwemisi isinopela. Ameni.

12 Nolubhancho lwaSilivanasi, wandinobona somwanakwaina ulobimbika, ndamukwalila mubufupi, ndimusungwaja akale ndileba kuti yechi ndichochipiwo chechokomende chaMwali, imani mwakasima munaicho.

13 Bhabhiloni iloshalwa pamwempela namwi nomwananhulumyana wangu Mako bakumumusa. 14 Mumusane nolumyonto loludo.

Lunyalalo kwamuli mose mumo munaKristo.