1 Imi Simoni Pita, unshingi akale noMpositoli waJesu Kristo,

Kunaabo bakawana kudimbwa kulokosha nokwedu mubululami bwaMwali noNchiji wedu Jesu Kristo.

2 Chipiwo nolunyalalo zwiwande munamwi muluzibo lwaMwali nolwaJesu Tezi wedu.

3 Masimba awe obumwali akatipa zwinhu zwose zwobupenyu nobumwali, zwipindila muluzibo lwoyo wakatishobela kukungaima kukwe nobubuya. 4 Nomunaizwo wakatipa lubimbo lulwe lukulwana akale lunokosha, kuti neezwi mupuluke mububi bumomunyika bunobuzwa nolulakamilo, akale kuti mushanganile zwolubumbo bobuMwali. 5 Nechisoko yechi ikwejani nesimba lyenu kupamija kudimbwa, nobubuya, akale bubuya noluzibo. 6 akale luzibo nokuzwibhata, nokuzwibhata kunakusungwala akale kusungwala nobumwali, 7 akale bumwali nobubwanakwaina bunaludo, akale nobubwanakwaina bunaludo, noludo. 8 Nokuti kana yezwi zwinhu zwili munamwi akale zwili zwinji, zwinomubhata kuti musibe banokonwa kana kusoba nemichelo muluzibo lwaTezi wedu Jesu Kristo. 9 Nokuti yoyo usina nazwo yezwi, ibhofu akale unobonela pafupi nokukanganwa kuti wakashampulujwa muluchinyo lulwe lwantolo.

10 Nokudalo, banakwaina, sungwalani kasa kusimitija kushobwa nokushalwa kwenu, nokuti mungota yezwi amutofa mwawa, 11 nezwo motambulwa nokungwina kukulwana, mubushe businopela bwaTezi noNchiji wedu Jesu Kristo.

12 Nokudalo ndilonanga kumukumbuluja yezwi zwinhu unshaji wose, kojoba muzwiziba akale zwakazikatila muchokomende chamunanacho. 13 Ndoyeya kuti zwilolulama, kana ndichili mumbili yoyu, kumunyandula nokumukumbuluja, 14 nokuti ndoziba kuti kufa kwangu kwabapelyo, sezwo Tezi wedu Jesu Kristo akanditondeja. 15 Akale ndota kuti mushule mokushayika kwangu, mutubule nonshaji wose kukumbulukwa zwinhu yezwi.

16 Atijakatobela ingano jakabumbwa nobusoso patakamuzibisa masimba nokuzha kwaTezi wedu Jesu Kristo, koga tibasumikiji bakabona namesho edu bukulwana bubwe. 17 Nokuti paakatambula lukujo nokungaima kunaMwali Tate akale iwhi lyakezha kwaali nokuNgaima kuKulwana, "Yoyu Mwananhulumyana wangu unodikana, munaiye ndiloshanta kasa," 18 iwhi yeli takaliwha isu liva kudenga, nokuti takabeli naye mudunhu ijena.

19 Tinanalyo iwhi lyechipolofita lilosimatijwa. Mungata zwibuyanana kuwhilila iwhi yeli sezwamunota kuchimuniko chimumunika munhilima, kujine kube kumijelo intanda ibhude mumyoyo yenu. 20 Chokutanga mokwelela kuwhisisa yezwi, kuti apana chipolofita chomuWhalo inchena chinotolokwa muchido chonhu, 21 nokuti apana chipolofita chakezha nokuda konhu, koga banhu besundwa noMpepo uNchena bakalebeleka zwinova kunaMwali.