1 Banodikana yolu lukwalo lwabili lwandinomukwalila ngweno, akale munaijo jilimbili iwhalo ndanyandula mwamuli indangalilo yenu yechokomende nokumukumbuluja, 2 ndoda kuti mukumbulukwe kupolofita kwabapolofeti bachena akale nomulawo waTezi noNchiji wakapiwa kunamwi nomubapositoli benu. 3 Chokutanga, imwi mokwelela kuwhisisa yezwi, kuti banoheula banoozha mumazhuba okupejeleja, beheula besundwa nendakamilo jabo jimbi 4 akale beti, "Chibimbiso chokuzha kukwe, chipi? Nokuti kuvila matate ashaika, zwinhu zwose zwendilambeli sezwizwakabeli kuvila kulupatuko." 5 Banolekeja nomwaza kulinga chitiko yechi, kuti newhi lyaMwali matenga akabaipo kuvila ntolo, akale inyika yakabumbwa kuva muvula itiwa nevula, 6 Kupindila muvula, inyika yakabelipo noyo unshaji yakapalajwa nezhame lyevula yakaleyo. 7 Koga newhi limwempela lyakalelo matenga nenyika zwipo ngweno zwilolondotelwa moto, nezhuba lyontongo nokupalajwa kwabanhu basina bumwali.

8 Koga badikani musilekeje kulingisisa ichokomende yeli, kuti kunaTezi izhuba limwempela lingaba sechiulu chamakole, akale chiulu chamakole chingaba sezhuba limwempela. 9 Tezi aanedontela nechibimbiso chiche sokubona kwabamwe bezwitola sedontela, koga unamoyondefu kwamuli, aatoda kuti kube noumwe uchapalala, koga kuti banhu bwose beshanduke.

10 Koga izhuba lyaTezi linoozha sembava, akale pakalepo matenga anoopinda nonkuwaluzha unkulwana, akale zwinhu zwose zwinopalajwa nomoto, akale inyika zwose nezwimomukati zwinobwigwa pachena. 11 Sezwo zwinhu zwose yezwi zwichapalajwa, imwi mokwelela kubabanhu balichini? Bupenyu bwenu bunokwelela kuba buchena akale mwakazwipila kunaMwali, 12 somumwakamilila mukukambijisisa kuzha kwezhuba lyaMwali, nokuti idenga linoobangijilwa akale linyauswa, nezwinhu zwose nomoto! 13 Koga zwindila muchibimbiso chiche tomilila idenga ipya akale nenyika impya muliimo munogala bululami.

14 Nokudalo, badikani, mukamilila yezwi, sungwalani kuti muwanikwe musina kabata kana kubipisa, akale muli mulunyalalo naye. 15 Akale tolani mwoyondefu waTezi wedu soluchijo. Somwanakwaina wedu unodikana Paulu wakamukwalila nobuchenjevu bwaakapiwa naMwali, 16 elebeleka nezwi sezwaanota mumakwalo awe wose. Muna zwimwe zwinhu mukati mwamakwalo awe zwilemu kuwhisisa, zwokuti basinaluzibo nabasilojikama mukudimbwa kwabo banozwishandulila kova zwibapalaja, sezwabanota nejimwe iwhalo inchena.

17 Nokudalo, imwi badikani, mwazwiziba yezwi kuchinonshaji, chenjelani kuti musipepulwe nolukanganiso lwabanhu basina mulawo akale kova mulashikilwa nokujikama kwenu. 18 Koga kubukani muchipiwo nomuluzibo lwaTezi noNchiji wedu Jesu Kristo. Lukujo ngalube kunaiye, ngweno nokwe misiyose. Ameni.