1 Kwakabeli nabapolofeti boniepa somumwakabeli balayiji boniepa bakabhuka bo mukati mwabanhu, sezwichooba balayiji boniepa mukati mwenu, bachabuza indayijo ilosisika inopalaja, belamba Tezi wakabatenga, bezwikokela kupalajwa nokukambijisa. 2 Banji banootobela zwobuhungu bwabo, akale inzila yechokomende inootukwa pezhulu pabo. 3 Mubupazwi bwabo banoomuchenga namawhi abo okuniepa, kuvila ntolo kulashwa kwabo kwakabeshinga pakati pabo, nokupalajwa kwabo akujakalekejwa.

4 Kana Mwali asakalekejela ngilozi jabo pajakachinya akajisunga namaketani, akajiposela mugehena, akajibiga mumatizwa anomila anenhilima kujichalondotwa kuswikila kutongwa kwajo, 5 kana asakalekejela inyika yantolo, koga akalondota Nowa, umbhaunuli wobululami, nabamwe bashanu banababili, paakabuza izhame pasi lyose lyabasina bumwali, 6 kana akalasha makuta eSodoma neGomola nokuwapisa kubelota, akaata chibonelo cheezwo zwichatikana kunaabo basina bumwali, 7 akale kana akachija Loti ulolulama, wakabejiijwa kasa nobusangu bwababi, 8 nokuti zwaakabona unhu yoyu ulolulama akale nezwaakawha eligele mukati mwabo, wakayangata mumwoyo uwe ulolulama izhuba nezhuba nezwito zwabo zwisilolulama, 9 kana zwili alo Tezi unoziba kuchija banabumwali mukukwejwa, akale nokulondota basakalulama mukulangwa kuswikila izhuba lyontongo, 10 akale kasa yabo banongwina mululakamilo lwoluchibo lunoswibhisa akale belingila pasi butongi.

Basinotya akale beli bamachinzebe, basinotya kutuka banongaima, 11 kojoba ingilozi jilihulwana akale jilinesimba, ajitobapa milandu ina kutuka mbeli kwaTezi. 12 Koga yaba banhu, semhuka jisinoyeya, zwibumbwa zwinota zwinhu zwisayeya, zwakazwalilwa kubhatwa zwibulayiwa, banotukana munyaya jibasinoziba, nenzila imwempelabo banoopalajwa semhuka, 13 beyabulila luchinyo lubakata. Ibo banozwibona kuli kunakilijwa kuzwishantisa nezhoba masikati. Ibo bananga zwiswibhiso namabata eshambwa, mukunakilijwa kwabo kwezhoba, bezwishantisa namwi. 14 Banamesho azhele bupomboli, besinogunchikana noluchinyo, banochengela bana butela mumyoyo, myoyo yabo ilolayijwa bupazwi, bana balofhizhwa! 15 Basiya inzila iliiyo bakalashika, betobela inzila yaBhalamu, mwananhulumyana waBhiyo, wakabeda ingwano muzwito zwibi, 16 koga wakakalalilwa muluchinyo lulwe, idonki chimumu lyakalebeleka newhi lyonhu zwakapeja imhengo jije umpolofeti.

17 Yaba bananga mashawi asine vula akale ifulele limupungwa nebhepo, ibo balolonganyilwa bugalo mu nhilima ihulwana. 18 Nokuti banozwitunha zwobulema namawhi apezhulu, bechenga nokushobela lulakamilo lwezwito zwombili zwobunhu bachinova mukupujumuka kunayabo banogala muluchinyo. 19 Banobabimbisa lusununguko, koga ibo nokwabo beli balanda bobubi, nokuti yezwo zwinokoma unhu, kunaizwo iye undanda. 20 Kana, bapujumuka mukuswibhiswa nenyika muluzibo lwaTezi noNchiji wedu Jesu Kristo, bangoobhatwa mububi, bakomwa, chimilo chabo chopejeleja chinooba chibi kasa kupinda chokutanga. 21 Nokuti zwalubazwibuya kwabali ngana basakaziba inzila yobululami kuna kuti bebwilile mushule beva mundawo unchena ubakapiwa. 22 Zwakatikana kwabali sezwinolebwa nechichimbe chechokomende, kuti, "Imbwa inobwilila kumafho ayo," akale, "Ingulube yashambiswa inobwilila kunobumbuluka mumatope."