1 Bakwaina pakuzha kwaTezi wedu Jesu Kristo akale nokubungana kwedu kuti tishangana naye, tomukumbila kasa, 2 kuti musikimbije kukatamuka kana kushantilwa mundangalilo kana nompepo kana iwhi, kana lukwalo lunota sokuti lumuva kwatili, luti izhuba lyaTezi lyaswika. 3 Kusibe nonhu unomuchenga kana neyipi nzila, nokuti yelo izhuba alitooswika, kuzhe kokuti kupanduka kube iko kunotanga, akale unhu usinotobeleja mulawo ebhisilwe pachena, iye wokupalajwa, 4 nokuzwikuja pezhulu pezwimwali zwose kana zwinhu zwinonamatwa, etole chigalo mutempele yaMwali, ezwisuma kuti ndiMwali.

5 Amuchinoyeya na, kuti ndichilinamwi ndakamubuja yezwi? 6 Akale munoziba zwikumumubhata ngweno kutila kuti oobhiswapachena nonshaji uwe ulokwelela. 7 Nezwo isiswa lokusowhisisika kokusogajikana kumukushinga kale, iye chete unotubula kuzwikabula unozwita alo kuswikila abhuda munzila. 8 Akale una bupenyu bokulundula unoobhiswa pachena, Tezi Jesu unombulaya nolufhemo lunobhuda mundomo akale nokuumpalaja kokupenya kokuzha kukwe. 9 Kuzha kombipisi zwinoba zwinokwendelana nenzila Satani yaanoshinga nayo masimba anazwitondejo zwokuniepa nezwishamiso, 10 nabose bubi nokuchengeja kunaabo bachapalajwa nokuti bakalamba kuda ichokomende kuti bechijwe. 11 Nokudalo Mwali unobatumila zwinesimba zwinobakanganisa mundangalililo, kuti bedimbwe munazwamaniepwa, 12 kutila kuti bose belashwe basijakabe dimbwa ichokomende koga beshantiswa nokusolulama.

13 Banakwaina banodika kuna Tezi, tilosungilwa kuti tipe kuboka kuna Mwali wose unshaji namwi, nokuti Mwali wakamushala kuva pokutanga kuti muchijwe nokupinda mukucheneswa noMpepo nokudimbwa muchokomende. 14 Kune zwi wakamushoba kuva nomundebo imbuya, kutila kuti muwane lukujo lwaTezi wedu Jesu Kristo. 15 Banakwaina nokudalo, galani mukasima akale bhatililani mumagalilo amwakalayijwa nasu, kungaba newhi lyondomo kana nolukwalo.

16 Ngana iye Tezi wedu Jesu Kristo, naMwali Tate bedu bakatida neshe bakatipa kuzwinyalaja kusinopela nolubimbo lubuya, 17 ngesungwaje myoyo yenu eyisimise mumishingo yose mibuya nomuwhi.