1 Banakwaina pakupejeleja, tinamatileni, kuti iwhi lyaTezi likambije kuzhalilana,akale likujwa somulyakabeli pakati penu, 2 kuti tichijwe kuva mubuhungu nobubi bwabanhu, nokuti atoba bose banodimbwa.

3 Koga Tezi ulobimbika, unomusimisa akale emutabilije kumbi. 4 Akale tinalubimbo munaTezi nomunamwi, kuti mumuta akale muchata zwinhu zwatinomubuja.

5 Tezi ngana atungamija myoyo yenu muludo lwaMwali akale nokusimilila kwaKristo.

6 Banakwaina, ngweno tomulaya nomuzina lyaTezi wedu Jesu Kristo, kuti musosolokele kule naye wose mwanakwaina umukulalama bupenyu bobusimbe zwisinokwendelana namagalilo amwakatambula kuva kunasu. 7 Imwi nokwenu moziba kuti mokwelela kuti mutikwejejele chini, atijakabaka galilila maboko patakabeli namwi, 8 atijakalya kulya chonhu tisalipa, koga takabeshinga nesimba masikati nobusiku kuti tisipe untolo kuna umwe wenu. 9 Akutoba kuti atina indulamo yeyo, koga tibe unkwejaniso kutila kuti mutikwejejele. 10 Nokuti patakabeli namwi takamupa undayo yoyu, "kana umwe wenu esashinga, esilye".

11 Tiwhile kuti bamwe benu bamulalama nobusimbe, beli banongwinila nyaya jabamwe, besinoshinga. 12 Ngweno banhu bakadayi tobalaya nokubasungwaja munaTezi Jesu Kristo kuti bete unshingo wabo mulunyalalo akale kuti bewane zwingabachija.

13 Koga banakwaina musinyale kuta zwinhu zwakalulama. 14 Kana umwe wenu angolamba kutobeleja zwatimuleba munolu lukwalo, ziba yoyo unhu musilyijane, kutila kuti ebe neshoni. 15 Musuundinge sombengi koga muundaye somwanakwaina.

16 She wolunyalalo nokukwe emupe lunyalalo muna wose unshaji munzila jose. Tezi ngaabe namwi mwose.

17 Imi, Paulu, ndokwala yezwi noluboko lwangu ndimumusa. Yeyi imhande muwhalo jangu jose, ndiwo nkwalilo wangu.

18 Ishe jaTezi wedu Jesu Kristu ngejibe namwi mwose.