1 Imi Paulu, naSilivanosi naTimoti.

Kugubungano lyeTesalonika munaMwali Tate bedu nomuna Tezi Jesu Kristo.

2 Chipiwo nolunyalalo zwiva kunaMwali Tate nokuna Tezi Jesu Kristo.

3 Banakwaina tilosungilwa kupa kuboka kuna Mwali pezhulu penu unshaji wose, somwazwilokwelela, akale kudimbwa kwenu kumukubuka kasa. Akale ludo lupo pakati penu lwamunopana lukumukubuka. 4 Nokudalo isu bomene tozwifufumula namwi muma kubungano aMwali nokusimatila akale kudimbwa mukushungulujwa kwenu, nokuyabuliswa kwamumutilwa mukashingilila.

5 Yechi ndicho chitondejo chobululami bontongo waMwali, kuti mube balokwelela mubushe bwaMwali ibo bwamumuyabulila. 6 Mwali ulolulama, unobwiliza kunakulwaja kunabo bakumumulwajisa. 7 Akale etipa kunyetutuka kunamwi pamwempela nasu kunaabo balolwajilwa, yezwi zwinootikana kanaTezi Jesu atondejelwa eva kudenga nengilozi jije jinesimba, 8 mumoto unovilima unoobuza kulwaja kunaabo basinoziba Mwali akale nokunaabo basino tobeleja indebo imbuya yaTezi wedu Jesu. 9 Banooba nechilango chokuyangata kusinopela kunopalaja nokushalujwa kwabo mukubayipo kwaTezi nolukujo lwamasimba awe, 10 pakuzha kukwe yelyo izhuba kokujwa, kubanhu babe bachena akale nokuba chishamiso kunabo bose balodimbwa, nokuti mwakadimbwa busumikiji bwedu kunamwi.

11 Pezhulu pezwi ngweno togala timunamatila, kuti Mwali wedu emutile balokwelela mukushobwa kukwe, akale namasimba awe ezhajikije ishungu jenu jose jobuya bwemishingo yokudimbwa, 12 kutila izina lyaTezi wedu Jesu libe nokukujwa munamwi, namwi munaiye, mushe jaMwali naTezi Jesu Kristo.