1 Ngweno pane zwemisi nonshaji wegole, banakwaina azwitodikana kuti tikwale chimwe chinhu kwamuli. 2 Nokuti imwi mwoziba zwanana kuti izhuba lyaTezi linoozha sembava busiku. 3 Kana banhu beti, "Kuna lunyalalo nokugajikana," pakalepo ndipo pakunotika kupalajika kunoswika kwabali sokulwaja kwemimba yonhukaji wabulochila, akale apana uchopujumuka. 4 Banakwaina imwi, amwimwo munhilima kuti yelyo izhuba lingamushamisa sembava, 5 nokuti imwi mwose mubana bechimuniko akale mubana bamasikati. Atitoba bobusiku kana benhilima. 6 Nokudalo tisilale sezwinota bamwe, koga tibhwazule, tibe balojikama. 7 Yabo banolala, banolala busiku, naabo banokolwa, banokolwa busiku. 8 Zwatili bamasikati, tigontame, timbale chitabilijo chope chifuba sechitabilijo chokudimbwa noludo, akale sechibimbo choluchijo ili inhulu yechitabilijo. 9 Nokuti Mwali ajakatishala kuti tibemubukali, koga kuti tiwane luchijo munaTezi wedu Jesu Kristo, 10 wakatifila, kutila kuti kojoba tikabhwazula kana tililele tingalalama tili naye. 11 Nokudalo sungwajanani, bakanani, somukuta kwenu.

12 Banakwaina tinomukumbila, kuti mulemese yabo banoshinga pakati penu, banomutungamilila munozwa Tezi akale bemulaya, 13 nokubalemekeja kulwana muludo pezhulu pemishingo yabo. Gajikanani mulunyalalo muli mose.

14 Akale timubweta, banakwaina, kalalilani banojitaila, sungwajani balolengwala, bhanchani banabutela, ibani nomoyondefu kunaibo bose. 15 Lingani kuti kusibe noumwe wenu unobwilizila chibi nechibi koga, nshaji wose pyangani kutilana zwinhu zwibuyanana nokubanhu bose.

16 Shantani unshaji wose, 17 namatani unshaji wose, 18 pani kuboka kunaMwali muna zwose, nokuti yezwi ndizwo zwaanoda Mwali kuti muzwite munaKristo Jesu.

19 Musijime moto woMpepo, 20 musishunde kupolofita, 21 koga kwejani zwose, bhatisani pana chibuya, 22 lekani zwibi zwose,

23 ngana Mwali wolunyalalo angomuchenesa mubulile, akale ngana umpepo wenu nemyoyo nombili wenu zwalondotwa pesina chibi ponshaji wokubuya kwaTezi Jesu Kristo. 24 Iye unomushoba ulobimbika, akale unoozwita.

25 Banakwaina, tinamatileni.

26 Mumuse bose banakwaina nokumyonta kuchena.

27 Ndinomulaya munaTezi kuti lukwalo yolu lubalwe kubanakwaina bose.

28 Chipiwo jaTezi wedu Jesu Kristo ngajibe namwi.