1 Banakwaina imwi nokwenu, munoziba kuti kushanya kwedu kwamuli akujakaba madhana. 2 Kojoba takabayaba akale nokubhatwa zwinopisa inshoni kuFilipi, sokuziba kwenu, koga Mwali wakatipa moyo unsimu wokubhaunula iNdebo iMbuya iye kwamuli pakati pokunyenyejwa kukulwana. 3 Kusungwaja kwedu akujakava mukulunduka kana mushambwa kana mukuchenga. 4 Koga sezwa takashalwa naMwali tikabimbwa kuti tibhate unshingo weNdebo iMbuya, nokudalo atitobhaunula tishaka kushantisa unhu, koga kushantisa Mwali, iye unokweja mwoyo yedu. 5 Nokuti atijakashingisa mawhi okushantisa, kana kusisa luchibi, Mwali ndiye unsumikiji. 6 atijikumupyanga kukujwa nabanhu, kanamwi, kana aani azwe, 7 kojoba takaba tili nesimba lyokumukakatila kuna zwakadai, sozwitili bapositoli baKristo. Koga takabeli banyolonyolo pakati penu sonzwele unolondota bana babe. 8 Nokumuda kasa kwedu, takadisisisa kuti tikobane namwi isiNdebo chete yaMwali koga nobupenyu bwedu nasubo, nokuti mwakaba mwaba banodikana kunasu. 9 Banakwaina muchinoyeya kushinga kwedu kukukutu, tishimbilika busiku namasikati, kutila kuti tisipe untolo panamwi, ponshaji tibhaunula iNdebo iMbuya yaMwali kwamuli.

10 Imwi mubasumikiji akale naMwali nayiye, bobuchena bwedu nobululami pesina chibi muntilo wedu kunamwi banodimbwa. 11 Nokuti mwoziba kuti umwe nomwe satate nabana babo, 12 takamusungwaja chini, tikamunyalaja, akale tikamusungilija, mugale bupenyu bunodiwa naMwali iye unomushoba kubuShe bubwe nokulukujo.

13 Akale toboka Mwali nshaji wose pana yezwi, nokuti pamwakatambula iwhi lyaMwali lyamwakawha kunasu, amujakalitambula sewhi lyava kunhu koga mwakalitambula sobulili kasa sewhi lyaMwali limukushinga pakati penu, imwibavumili 14 Imwi banakwaina mwakaba bakwejejeli bamakubungano aMwali munaKristo Jesu, iwo ayimo muJudiya, imwi mwakayangatiswa nabanhu beshango yenu sobubakayangatiswa ibo nabaJuda, 15 belibo bakabulaya Tezi Jesu nabapolofita bakatitatila pazhe, besinoshantisa bo Mwali besinovumilana nabanhu bose, 16 nokuti koneja kuti tilebeleke nabokuzhe kuti bechijwe. Yezwi bezwita misi yose kuti bezhaje luchinyo lwabo. Koga bukali bwaMwali bwabaswikila neebo pakujiba.

17 Koga isu, patakabapambukana namwi banakwaina munshaji fupi mumbili, musi mumwoyo, takadisisa kasa nechido chikulwana kuti tibonane chiso nechiso. 18 Nokuti, takabeda kuzha kwamuli, imi Paulu, kanjinji koga Satani wakati binda. 19 Nokuti ngolupi lubimbo lwedu, nolushanto, nenhulu yokuzwikuja, mbeli kwaTezi Jesu pakubuya kukwe? Amutoba mwi na? 20 Chokomende imwi mulukujo nolushanto lwedu.