1 Kumapejelejo, banakwaina, tinomukumbila timubweta munaTezi Jesu, sobumwakalayijwa kuva kunasu kuti mokwelela kulalama chini akale nokushantisa Mwali. Somwamukumuta, ndilani mbeli muta alo. 2 Mwoziba chilayilo chatakamupa zwiva mumasimba aTezi Jesu. 3 Nokuti yoku kuda kwaMwali, kuti mucheneswe kuti muzwibhate mubusangu, 4 Kuti umwe nomwe ezibe kubhata umbili uwe munzila ina buchena nokulemekeja, 5 musi mukukubukilwa nokulakamila kuneshungu sezwabanota bokuzhe basinoziba Mwali, 6 kusibe noumwe unochinyila mwanakwaina uwe muna yechi, kana kubhatila mwanakwaina uwe nokuti Tezi ndiye unolanga pazwibi zwakadai, sezwa takamuchenjeja kale. 7 Nokuti Mwali ajakatishoba kuti tibe neshambwa, koga kuti tibe mubuchena. 8 Nokudalo ani azwe usinotobeleja yezwi, aatobaalamba unhu, koga Mwali, unopa umpepo unchena kunamwi.

9 Ngweno penyaya joludo lwabanakwaina akutokwelela kuba noomwe unokwala kunamwi, nokuti imwi bomene mwakalayijwa naMwali kuti mudanane, 10 akale ndimo banakwaina moda bose bamomu Masedoniya. Koga tomusungwaja, banakwaina, mundilembeli muzwita kasa yezwi, 11 kuba nechido chokugala mulunyalalo, musinani nozwabwamwe, mushinga namaboko enu, sobutakamulaya, 12 kutila kuti mube banolemekejwa nabo pazhe, akale mube balozwimilila boga.

13 Banakwaina, atidi kuti mushayiwe luzibo, pezhulu paabo balele mulufu, kuti musiwhe kulwajilwa saabo bamwe basina lubimbo. 14 Nokuti tinodimbwa kuti Jesu wakafa akamuka akale, zwinooba alo nomuna Jesu. Mwali unoomusa yabo bakafila muna iye.

15 Toleba yezwi newhi lyaTezi, kuti isu bapenyu, bakasala kuswikila kuzha kwaTezi, atitoobatangila yabo bakafa, 16 nokuti Tezi emene unoobheluka eva kudenga pakushomeja kunootiwa newhi lyengilozi iwhulwana nopakulijwa kwewhamanda yaMwali, yaabo bakafa muna Kristo banootanga kumuka. 17 Kova isu bapenyu, basala tinoonyamulwa pamwempela naabo mumakole kunoshangamija Tezi mumpepo, nezwo toogala naTezi kusinopela. 18 Nokudalo nyalajanani mogamoga namawhi yaya.