1 Patakabona kuti atingazwitubule, takazwipila kuti tisale mushule yokuno kuAtene, 2 takatuma mwanakwaina wedu Timoti unshingi nkwaina waMwali mundebo imbuya yaKristo, kuti emusimise akale emusungwaje mukudimbwa kwenu, 3 kutila kuti kusibe umwe wenu unonyajwa nenjabulo yeji. Imwi nokwenu munoziba kuti kuyangatiswa kwedu yoku kumo mumabambo aMwali. 4 Nokuti patakabeli namwi, takamubuja kale kuti tinooswikilwa nenjabulo, hezwo zwatikana sokuziba kwenu. 5 Nokuda kwezwi, pandakabona kuti andichinozwitubula kuzwimila, ndakontuma kuti ndibe noluzibo lwokudimbwa kwenu, nditya kuti posa unkweji wamukweja, akale wose nshingo wedu waluba usina nshingo.

6 Koga ngweno Timoti wezha eva kwamuli, etibuzila indebo imbuya yokudimbwa kwenu noludo lwenu, etibuja kuti mosogala mushantilwa nokutiyeya, akale mwazwimba kutibona nasubo tazwimba kumubona. 7 Nokudalo banakwaina mukusheta kwose nenjabulo, takanyalajwa namwi zwiva mukudimbwa kwenu, 8 feno tolalama kana imwi mukama mukasima munaTezi. 9 Toomboka chini Mwali nokushanta kwatiwhile pezhulu penu, mbeli kwaMwali wedu? 10 Tinamata nesimba masikati nobusiku kutila kuti tibonane chiso nechiso namwi, kuti timupe zwisiimo mukudimbwa kwenu?.

11 Ngana ngweno Mwali wedu Tate bedu ibo, naTezi wedu Jesu betondeja inzila yokuzha kwamuli. 12 Ngana Tezi batakuti kupamijwe ludo lwenu luzhale lufushuke, mudanane akale nabanhu bose, somutinota kwamuli, 13 kuti esimise myoyo yenu isina chibi mubuchena, mbeli kwaMwali Tate bedu, ponshaji wokuzha kwaTezi Jesu wedu eli nabachena babe bose.