1 Me čhave, pišinava tumenge akava te na grešinen. Ama ako nekoj grešingja isi amen Zastapniko ko Dad, o Isus Hristos o pravedniko. 2 Ov tano žrtva bašo oprostiba amare grevija hem na samo amare nego bašo celo svetoskere grevija.

3 A palo akava džanaja deka pendžaraja le, ako ikeraja leskere zapovedija. 4 Koj phenela: "Pendžarava le," a leskere zapovedija na ikerela, ov tano hovavno hem o čačipe nane ki leste. 5 Ama, ako nekoj ikerela leskoro lafi, o mangipe prema o Devel čače tano celosno ki leste. Palo akava džanaja deka sijem leskere. 6 Sekoj so vakerel deka ačhola ki leste, ov mora te živinel agjar sar so živingja o Isus.

7 Me mangle, na pišinava tumenge nevi zapoved, nego purani zapoved so sine tumen taro početok. Adaja zapoved tano o lafi so šungjen. 8 A palem, pišinava tumenge nevi zapoved, soske o čačipe tari akaja zapoved dikhola pe ko Hristos hem ki amende, adaleske so i temnina nakhela, a i čačutni svetlina više svetinela.

9 Sekoj so vakerela deka tano ki svetlina, a mrzinela pe phrale, panda tano ki temnina. 10 Sekoj so mangela pe phrale, ačhola ki svetlina hem nane so te čhivel le ko grevo. 11 A sekoj so mrzinela pe phrale, ov tano ki temnina hem ki temnina phirela hem na džanela kaj džala, soske i temnina kojlargja leskere jakha.

12 Pišinava tumenge, čhavalen,

soske tumare grevija tane oprostime baši leskoro anav.

13 Pišinava tumenge, dadalen,

soske pendžargjen okole soj tano taro početok.

Pišinava tumenge, ternalen,

adaleske so pobedingjen okole soj tano lošno.

14 Pišinava tumenge, čhavalen,

soske pendžargjen e Dade.

Pišinava tumenge, dadalen,

soske pendžargjen okole soj tano taro početok.

Pišinava tumenge, ternalen,

soske sijen zorale

hem deka e Devleskoro lafi živinela ki tumende

hem so pobedingjen okole soj tano lošno.

15 Ma mangen akava sveto ni adava soj ki leste. Ako nekoj mangela o sveto, ki leste nane e Dadeskoro mangipe. 16 Soske, sa soj ko sveto tani želba e teloskiri, i želba e jakhengiri hem o baripe bašo o barvalipe. Adava na avela e Dadestar, nego e svetostar. 17 O sveto hem leskere želbe nakhena, ama koj kerela e Devleskiri vojla, živinela večno.

18 Me čhave, akavaj posledno vreme, hem sar so šungjen, avela o antihrist. Hem panda akana pojavisalile but antihristija hem palo adava džanaja deka tano posledno vreme. 19 Ola cidinge pe amendar, ama na sine čače amare. Soske ako sine čače amare, ka ačhoven sine amencar. Ama adaleja sikavge pe deka ola nane amare.

20 Ama tumen isi tumen pomazanie e Svetonestar, i sarinen džanena soj o čačipe. 21 Na pišinava tumenge adaleske so na džanena o čačipe, nego adaleske so džanena le hem adaleske so nijekh hovajbe na avela e čačipastar. 22 Koj tano hovavno? Okova so na priznajnela deka o Isus tano Hristos. Koj na priznajnela e Dade hem e Čhave – ov tano o antihrist. 23 Sekoj so na priznajnela e Čhave, nane le ni e Dade. Sekoj so priznajnela e Čhave, isi le e Dade da.

24 Okova so šungjen taro početok, neka ačhol ki tumende. Ako ačhilo ki tumende adava, i tumen da ka ačhoven ko Čhavo hem ko Dad. 25 A akavaj o vetiba so dengja amen: o večno životo.

26 Akava pišinava tumenge bašo okola so mangena te hovaven tumen. 27 Ama o pomazanie so primingjen le lestar, ačhola ki tumende hem na trebela nekoj te sikavel tumen. A leskoro pomazanie sikavela tumen bašo sa, hem akavaj čačipe, a na hovajbe. Agjar ačhoven ko Hristos, sar so sikavgja tumen.

28 Akana, me čhave, ačhoven ki leste, te šaj te ovel amen hrabrost anglo leste koga ov ka sikavel pe, te na ladžan koga ka avel. 29 Ako džanena deka o Hristos tano pravedno, džanen deka sekoj so kerela adava soj pravedno tano bijamo lestar.