1 Sekoj so verujnela deka o Isus tano o Hristos, bijamo tano e Devlestar. I sekoj so mangela e Dade, mangela hem okole soj bijamo lestar. 2 Palo akava džanaja deka mangaja e Devleskere čhaven: koga mangaja e Devle hem ikeraja leskere zapovedija. 3 Adaleske, akavaj o mangipe prema o Devel: te ikera amen ko leskere zapovedija. A leskere zapovedija nane phare. 4 Soske, sekoj soj bijamo taro Devel, pobedinela o sveto. A akaja tani i pobeda so pobedingja o sveto: amari vera. 5 A koj pobedinela o sveto? Samo okova so verujnela deka o Isus tano o Čhavo e Devleskoro.

6 Ov, o Isus Hristos, alo preku o pani hem o rat – ov na alo samo preku o pani, nego preku pani hem rat. Hem o Duho tano adava so svedočinela, soske o Duho tano čačipe. 7 Adaleske so trin tane so svedočinena: 8 o Duho, o pani hem o rat – hem akala trin dena jekh svedoštvo. 9 Ako prifatinaja o svedoštvo e manušengoro, sar togaš te na prifatina o svedoštvo e Devleskoro soj tano pobaro, soske adava tano o svedoštvo e Devleskoro so o Devel svedočingja pe Čhaveske. 10 Koj verujnela ko Čhavo e Devleskoro, isi le akava svedoštvo ki peste. A koj na verujnela ko Devel, kerela le hovavno, adaleske so na verujngja ko svedoštvo e Devleskoro so svedočingja pe Čhaveske. 11 A akava tano o svedoštvo: o Devel dengja amen večno životo, hem adava životo tano leske ko Čhavo. 12 Kas isi e Čhave, isi le večno životo. Kas nane e Devleskere Čhave, nane le o životo.

13 Akava pišinava tumenge, so verujnena ko anav e Devleskere Čhaveste, te šaj te džanen deka isi tumen večno životo. 14 A akaja i doverba so isi amen prema leste: ako rodingjem nešto spored leskiri vojla, ov ka šunel amen. 15 Ako džanaja deka ov šunela amen soj te roda, džanaja deka ka dela amen adava so rodingjem lestar.

16 Ako nekoj dikhela nesave phrale so kerela grevo so na legarela le ko meriba, neka molinel pe leske hem o Devel ka del le životo. Vakerava okolenge kaskoro grevo na legarela ko meriba. Ama, isi grevo so legarela ko meriba. Bašo adava grevo na vakerava te molinen tumen. 17 Sekoja nepravda tani grevo, ama isi grevo so na legarela ko meriba.

18 Džanaja deka sekoj soj bijamo taro Devel na živinela ko grevo, a okova soj bijamo taro Devel arakhela pe, hem o lošno našti te kerel leske ništo. 19 Džanaja deka sijem e Devleskere čhave hem deka celo sveto tano ki vlast e lošnoske. 20 Isto agjar, džanaja deka e Devleskoro Čhavo alo hem dengja amen godi, te šaj te pendžara e čačutne Devle. Hem amen sijem ko čačutno Devel, ko leskoro Čhavo, o Isus Hristos. Ov tano o čačutno Devel hem o večno životo.

21 Me čhave, arakhen tumen taro idojla.