1 Dikhen kozom mangipe dengja amen o Dad: te vikina amen e Devleskere čhave! A adava da sijem. O manuša e svetoskere na pendžarena amen adaleske so na pendžarge le. 2 Me mangle, akana sijem e Devleskere čhave, a panda na dikhola so ka ova. Ama džanaja koga ka sikavel pe o Hristos, ka ova sar leste, soske ka dikha le sar soj ov. 3 Sarine so isi len akaja nada ki leste, čistinela korkori pes, sar soj ov čisto.

4 Sekoj so grešinela phagela o Zakoni, adaleske so o grevo tano protiv o Zakoni. 5 Tumen džanena deka o Hristos alo te lel amare grevija hem deka ki leste nane grevo. 6 Sekoj so ačhola ki leste, na živinela ko grevo. A sekoj so živinela ko grevo, na dikhla le, ni na pendžargja le.

7 Me čhave, ma dozvolinen nikoj te hovavel tumen. Koj kerela soj pravedno, ov tano pravedno sar soj o Hristos pravedno. 8 Koj živinela ko grevo, ov tano e Bengestar, soske o Beng grešingja taro početok. Adaleske alo o Čhavo e Devleskoro, te uništinel e Bengeskere dejla. 9 Sekoj soj bijamo taro Devel nane te živinel ko grevo, soske e Devleskoro seme živinela ki leste. Ov našti te živinel ko grevo, soske tano bijamo taro Devel. 10 Palo akava pendžaraja e Devleskere čhaven hem e Bengeskere čhaven: Sekoj so na kerela adava soj pravedno hem na mangela pe phrale, nane e Devleskoro čhavo.

11 Soske akava tano o lafi so šungjen le taro početok: trebela te mangen tumen jekh jekheja. 12 Ma oven sar o Kain, so sine vodimo e lošnostar hem mudargja pe phrale.✝ A soske mudargja le? Soske leskere dejla sine lošna, a leskere phraleskere sine pravedna. 13 Ma čudinen tumen, phrajlalen, ako o manuša taro sveto mrzinena tumen. 14 Amen džanaja deka nakhlem taro meriba ko životo, adaleske so mangaja amare phralen. A koj na mangela, ov ačhola ko meriba. 15 Sekoj so mrzinela pe phrale, ov tano ubijco, a džanena deka nijekh ubijco nane le ki peste večno životo.

16 Palo akava džanaja soj mangipe: o Hristos dengja po životo baši amenge. Hem amen sijem dužna te da amare životija bašo amare phrajla. 17 Kas isi barvalipe ki akaja phuv hem dikhela pe phrale so nane le, a na kerela ništo te pomožinel le, sar šaj e Devleskoro mangipe te ovel ki leste?

18 Me čhave, ma te manga samo mujeja ili lafencar, nego ko dejla hem ko čačipe.

19 Palo akava ka džana deka sijem e čačipastar hem ka smirina amari sovest anglo Devel. 20 Ako amari sovest osudingja amen, togaš ka džana deka o Devel i pobaro tari amari sovest hem deka ov džanela sa.

21 Me mangle, ako amari sovest na osudinela amen, togaš isi amen hrabrost anglo Devel, 22 hem so te roda lestar, ka dobina, soske ikeraja leskere zapovedija hem keraja soj leske ugodno. 23 Hem akaja tani leskiri zapoved: te verujna ko anav leskere Čhaveskoro e Isuse Hristoskoro hem te manga amen jekh jekheja sar so zapovedingja amenge. 24 Okova so ikerela e Devleskere zapovedija, ov živinela ko Devel, hem o Devel ki leste. A palo akava džanaja deka ov živinela ki amende: taro Duho so dengja amen.