1 AKOLINTO 12

Ili’mbi’li’mbi' yambone, lakini yi’ga yimo

12 Mundu ai na yi’ga yimo na nkati yake kubile ili’mbi’li’mbi' yambone, nyinyonyo ngamwaibile muyi’ga ya Kilisitu. 13 Kwa mwanjaa twaboti tubatisilwe ubatiso wa Loo yumo ata manaitei Ayahudi au Ayunani, wammanda au wangwana, tupeyilwe aywo Loo yumo li’nga tupange yi’ga yimo.

14 Yi’ga iumbilweli na kili’mbi’li’mbi' simo ila kwa ili’mbi’li’mbi' yambone. 15 Ikapangage lugu’lu' kalubaya, "Kwa mwanjaa nenga na luboko lili, bai, nenga na ywayi’gali," alyo lilu’e pangali alwo lugu’lu' kanelube kili’mbi’li’mbi' sa yi’ga. 16 Ikapangage likutu kalibaya, "Kwa mwanjaa nenga na liyo lili, bai, nenga na ywayi’gali," alyo likutu kanelibe kili’mbi’li’mbi' sa yi’ga? 17 Ikapangage yi’ga yoti panga nga liyo, yu’wa kulu’e panga ntu’pu', nyinyonyo yi’ga yoti ikapangage likutu, nuya kulu’e panga ntu’pu'. 18 Lakini kati mwaibile, Nnu’ngu' akibi’kite kila kili’mbi’li’mbi' muyi’ga kati mwapendi mwene. 19 Kulu’ebali yi’ga, ikapangage ili’mbi’li’mbi' yoti panga simo bai. 20 Ukakape nga wu’no, yi’ga yimo lakini ili’mbi’li’mbi' yambone.

21 Liyo likombwali kulubakia luboko, "Nikupalali." Nyinyonyo, ntwe ukombwali kulubakia lugu’lu', "Nikupalali." 22 Lakini mwaibile, kili’mbi’li’mbi' sa yi’ga sakibonekana kigopi muno, aso nga sa ngama muno. 23 Kai' ili’mbi’li’mbi' yaibonekana panga ipalikwali isimilwa ngayatuisimu. Nyinyonyo, ili’mbi’li’mbi' ya yi’ga yitu yaibonekana panga ileta oni, ngayatuikota muno. 24 Ili’mbi’li’mbi' yangali leta oni ipalikwali kotelwa kati yi’ngi', lakini Nnu’ngu' mwene abi’kite pamope ili’mbi’li’mbi' ya yi’ga na kwipeya isima muno yi’lu' yaipu’ngu’kilwe. 25 Nnu’ngu' aabini panga nyo li’nga ili’mbi’li’mbi' ya yi’ga kaneilekangane, ila kila simo kiyangatiane na si’ngi'. 26 Manaitei kili’mbi’li’mbi' simo kilumile na yi’ngi' yoti yaalu’a minya pamope naso. Na si’ngi' mana kilumbilwe, yi’ngi' yoti yaalu’a pulaika pamope.

27 Bai, mwenga mwaboti kwa pamope nga yi’ga ya Kilisitu. Na kila yumo ywinu nga kili’mbi’li’mbi' sa yi’ga yo.