1 Paliyomwike lisu’ba lya Sabato, Malia Makatalena, Malia mau' bake Yakobi, na nnwawa ywi’ngi' Salome baapi’mite mauta go sikya li’nga bakaupakaye ntwi wa Yesu. 2 Jumapili kindai', lisu’ba kalitumbwa pita, ngabayenda kulisiko. 3 Nabembe baai kababakiyana, "Nyai ywakombwa kulinokwa li’lu' liwe bu’ka munniango wa lisiko?" 4 Lakini pabalingulile, ngabalibona li’lu' liwe liku’lu' linokolilwe pambwega. 5 Pabaabile kabayingya mulisiko, ngabankolya mwinsembe yumo aweti nganju uu, atami kummalyo, nabembe ngabang’ang’amuka.

6 Lakini mwinsembe yu’lu' ngaabakia, "Kanemung’ang’amuke! Mumpala Yesu wa ku Nasaleti ywaabambilwe munsalaba. Ywembe ayu’kite, abileli pano. Mulinguli, pano nga pandu pabammi’kite. 7 Lakini nambi’yambi' muyende mukaabakiye banamasi' bake pamope na Petili panga endalongolya yenda ku Galilaya, namwenga mukammona kwo kati mu’lu' mwaamakiye."

8 Bai, baapitike mulisiko no butuka lubi’lo ku’no kabalendema no sangala muno. Nabembe bammakiyeli mundu ywoywoti kwa mwanjaa baatiyogopa.*16:8 Maandiko gi’ngi' ga kwai’mbu' gayomolya Injili yi’no 8

9 Yesu paayu’kite, yaai kindai' lisu’ba lyo tumbulya yuma. Aampiti wi’ti' Malia Makatalena, yu’lu' ywammi’ngite moka saba. 10 Malia ngayenda kwabakia balu' babaabile pamope na Yesu. Na paikite aayi’i kwakolya kabalombola no li’la. 11 Lakini, pabayu’wine panga Yesu ayu’kite na Malia Makatalena aamweni, baau’bi’li lili.

12 Bu’kapo banamasi' abi’li' baabile kabayenda kumigunda, Yesu ngaapitya kuminyo kugalambwike. 13 Nabembe baatibuyangana na kwabakia banamasi' bi’ngi' makowe galu', lakini nyinyonyo baau’bi’li lili.

14 Kuundi’la, Yesu aapiti balu' banamasi' ku’mi na yumo pabaabile kabalya kilyo. Aatikwakalipya kwa kitumbu so kotoka u’bi’lya kwabe na unonopau wa myoyo yabe kwo kana kwau’bi’lya balu' babaamweni bu’ka pa uyu’ki wake. 15 Bu’kapo ngaabakia, "Muyende mudunia yoti mukaale Abali Inannoga kwa kila mundu. 16 Ywau’bi’lya no batisilwa aalu’a kosopolelwa, lakini ywaakotoka u’bi’lya aaukumilwa. 17 Na boti babaalu’a u’bi’lya baalaya myasu yi’no. Kwo tumya lina lyangu', baalu’a bi’nga moka, baalongela kwa luga yayambi'. 18 Kai', baalu’a kamwa nng’ambo kwa maboko gabe, ata mana banywile kili’be sene sumu katu baasulikali, baabi’ka moko gabe panani ya atamwe, nabembe baayu’yu’ki’lwa."

19 Bwana Yesu paayomwi longela nabo makowe go, ngakatuyilwa yenda kunani no tama kummalyo ga Nnu’ngu'. 20 Nabembe banamasi' bake ngabayenda ala abali yake kila pandu. Bwana Yesu aapangite lyengo pamope nabo na kulikangamaya liyi’gi’yo lyake kwa myasu yayaayi’i pamope na liyi’gi’yo lyo.