1 Masu'ba go, Yesu aabile kapi'ta mumigunda ya ngano, lyai lisu'ba lya Sabato ya Ayahudi. Banamasi' bake pabaminyike njala, ngabati'kwa yeyo ya ngano no tauna nombo yake. 2 Mafalisayo pabagabweni go ngabammakia Yesu, "Lola, banamasi' bako bapanga likowe lya mwilo lisu'ba lya Sabato."

3 Yesu ngaayangwa, "Buli munasomali mwaapangite Daudi pamope na aine pabaabile na njala? 4 Ywembe aayingi munyumba ya Nnu'ngu' no lya makati mapeleteu gagaapiyilwe kwa Nnu'ngu' na kwapeya aine, pamope no panga baayi'ki'tilweli lya makati go, ila api'ndo ba dini kisabe bai. 5 Kai', munasomali mukitabu sa salya ya Musa panga kila lisu'ba lya Sabato, api'ndo ba dini bendatumika munyumba ya Nnu'ngu'? Bati'kwana salya ya Sabato, ata nyo Nnu'ngu' aabalangilyali makosa. 6 Lakini nimmakianga panga pano pabile na nku'lu' pi'ta nyumba ya Nnu'ngu'. 7 Mukatangage malombolyo ga Maandiko Mapeleteu gagabaya, ‘Nipala kiya, wala kwenda salaka yinuli,’ mulu'e kwaukumuli bandu ba bangali makosa. 8 Kwa mwanjaa Mwana wa Mundu nga Bwana wa Sabato."

9 Yesu paabu'i po, ngayenda munyumba ya kunnu'ba Nnu'ngu' kwa Ayahudi. 10 Mu'lu' nnyumba kwabile na mundu mwene luboko lutomboloka. Bandu ngabannaluya Yesu, "Buli mwiloli kuntepwa mundu lisu'ba lya Sabato?" Bannalwiye nyo li'nga bapate kitumbu sa kunsitakya.

11 Yesu ngaabakia, "Tubaye yumo ywinu ai na ngondolo wake ywatumbuki mulyi'mbwa lisu'ba lya Sabato, buli, ankamwali na kumpiya? 12 Lakini mundu nga ywampu'ku'bi'la kulikoni ngondolo! Bai, mwiloli panga ganannoga lisu'ba lya Sabato." 13 Bu'kapo ngammakia yu'lu' mundu, "Golwa luboko lwako." Ngalugolwa, na lwembe ngalupanga lukoti kati lu'lu' lwi'ngi'. 14 Bai, Mafalisayo ngabapita panja no sikisana mu'lu' mwa kunnangamisa Yesu.

15 Lakini Yesu paakwipwi likowe lyo, ngabu'ka pandu po. Bandu baingi baatikunki'ngama, ngaatepwa atamwe boti. 16 Ngaamulisa kanebaabakiye bandu panga ywembe nyai, 17 li'nga galu' gaalongei Nnu'ngu' kwa ndi'la ya nnondoli wake Isaya gatimi.

18 "Munnole ntumisi wangu' ywaninsawile,

ywanimpendile na kunipulaisa pamwoyo wangu'.

Nalu'a kuntwi'li'ya Loo wangu' naywembe aanwaya ukosopoli wangu' kwa bandu boti.

19 Aabali na ntau, wala ndu'ti,

wala lilobe lyake lyayu'wanikali musimbasimba.

20 Nnai waubuguywike aauti'kwanali, wala utambi waupiya lyoi auimiyali,

mpaka paalu'a kuupanga ukosopoli utawale.

21 Kasake ywembe bandu bangali Ayahudi baapanga na mau'bi'lyo."

22 Apo bandu ngabannetya Yesu mundu ywaabile mbulibuli na bubu kwa kitumbu sa moka. Yesu ngaantepwa ata ngakombwa longela no lola. 23 Lipi'nga lyoti lya bandu ba palu' baatisangala ngababaya, "Buli, ayu' iwesa panga Mwana wa Daudi?" 24 Lakini Mafalisayo pabaayu'wine go ngababaya, "Mundu yu' abi'nga moka kwa makakala ga Belisebuli, mpi'ndo wa akamoka."

25 Yesu abile atangite maganio gabe, ngaabakia, "Ukulungwa wowoti waubaganike ipi'ngaipi'nga yaitaukyana ukombwali konda, na ilambo yoyoti au alongo boboti bababaganike ipi'ngaipi'nga yaitaukyana ikondali. 26 Manaitei Ibilisi ammi'nga Ibilisi, aitaukya mwene. Bai, ukulungwa wake walu'a yi'ma buli? 27 Ikapanga kakape panga nenga nibi'nga moka kwa makakala ga Belisebuli, buli? Bandu ba kipi'nga sinu babi'nga kwa makakala ga nyai? Kwa nyo bandu binu bakong'ondelya panga kikowe samukilongela sa kakape lili! 28 Lakini manaitei nibi'nga moka kwa makakala ga Loo wa Nnu'ngu', bai mutange panga Ukulungwa wa Nnu'ngu' wikite kasinu.

29 "Au akombwabuli mundu kuitangya nyumba ya mwene makakala na kumpokonywa mali yake, pangali wi'ti' kuntaba? Apo ngapaalu'a kombwa kumpokonywa mali yake.

30 "Ywoywoti ywakotoka lu'mbana nanenga endanitaukya, na ywoywoti ywakotoka kongolya pamope nanenga, endayanjaya. 31 Kwa nyo nimmakianga panga, kila sambi na kila liyi'gi'yo lya kupulu bandu baalu'a samilwa, ila kwa kunkupulu Loo Mpeleteu baasamilwali. 32 Kai' ywaalongela liyi'gi'yo lya kuntaukya Mwana wa Mundu aasamilwa, lakini yu'lu' ywaalongela lya kuntaukya Loo Mpeleteu aasamilwali, wala mudunia yi'no, wala mudunia yayaaisa.

33 "Nkongo unannoga na itunda yake yapanga inannoga, kai' nkongo unannyata na itunda yake yapanga inannyata. Kwa mwanjaa nkongo utanganikwa kwa itunda yake. 34 Mwenga mwa abu'su' kati nng'ambo! Mukombwabuli longela makowe ganannoga, lakini mwabene mwaalau? Kwa mwanjaa mundu agalongela gagatwi'li mumwoyo wake. 35 Mundu nnogau apiya makowe manogau bu'ka mumabi'ko gake manogau, na mundu nnau apiya makowe malau bu'ka mumabi'ko gake malau.

36 "Bai, nimmakianga, lisu'ba lya ukumu bandu baapalikwa yangwa bu'kana na kila liyi'gi'yo lyangali pwaika lyabalongei. 37 Kwa kitumbu sa mayi'gi'yo gako wabalangilwa aki, na kwa mayi'gi'yo gako waukumilwa."

38 Bu'kapo bi'ngi' ba balimu ba salya na Mafalisayo ngabammakia Yesu, "Mwalimu, tupala tuubone mwasu bu'ka kasako." 39 Naywembe ngaayangwa "Lubelekwo lulau lwangau'bi'li'ka! Mupala myasu, lakini mwaapeyelwali ila gu'lu' mwasu wa nnondoli Yona. 40 Kwa mwanjaa kati mwaatami Yona mundumbo ya omba nku'lu' kwa masu'ba gatatu kilo na muntwekati, nga nyinyonyo na Mwana wa Mundu alu'a tama mubwi' masu'ba gatatu, kilo na muntwekati. 41 Lisu'ba lya ukumu, bandu ba Ninawi baayi'ma pamope na mwenga mwabandu ba lubelekwo lu'no kabansitakya, kwa kitumbu bembe baagalambwike bu'ka mumasambi gabe pabaayu'wine maalo ga Yona, na kumbe pano abile nku'lu' kumpi'ta Yona! 42 Nyinyonyo kwa lisu'ba lya ukumu, malikia bu'ka kusi alu'a yi'ma na bandu ba lubelekwo lu'no kasitakya, kwa mwanjaa ywembe aaisi bu'ka kuutalu muno li'nga pi'kania mayi'gi'yo ga ikima ga nkulungwa Selemani, na kumbe pano pabile na nku'lu' kumpi'ta Selemani!

43 "Moka pammu'ka mundu, ati'li'tati'li'ta mulupu'ngu'ti' kapala pandu po pu'mu'lya. Mana akotwike pata, aibakia mwene 44 ‘Nilu'a buyangania kasangu' kwanibu'i.’ Lakini pabuyangana, na kuikolya nyumba ntu'pu' kili'be ipyagililwe no nemekelwa na nkati yake ntu'pu' ywatama 45 bai, ngayenda kwaatola moka bi'ngi' saba, alau muno kulikoni ywembe, na boti ngabaisa kunnyingya mundu ywo. Na ali ya mundu ywo yapanga mbaya kulikoni patumbu. Na nyo ngamwayalu'a panga mulubelekwo lwa bandu bano alau."

46 Yesu paabile anayomwali longela na lipi'nga lya bandu, mau' bake na anunabe baatiisa. Ngabayi'ma panja kabapala longela nakwe. 47 Bai, mundu yumo ngammakia, "Mau' bako na anunabo bai panja bapala longela na wenga." 48 Lakini Yesu ngannyangwa mundu ywo, "Mau' bangu' nga nyai na anunangu' nga kinyai?" 49 Bu'kapo ngagoloya luboko lwake li'nga kwa banamasi' bake, kabaya, "Aba nga mau' bangu' na akinaanunangu'! 50 Kwa mwanjaa ywoywoti ywapanga mwabapendi Tati' bangu' ba kunani, abo nga mau' bangu', nnunangu' na nnu'mbwangu'."