1 Yesu paibweni ipi'nga ya bandu, aau'bwike pakitu'mbi' no tama pai', na banamasi' bake ngabamwisilya. 2 Nembe ngatumbwa kwayi'gana kabaya,

3 "Nantali bababile aki'ba ba loo, kwa mwanjaa Ukulungwa wa Kunani wabe.

4 Nantali babausunika, kwa mwanjaa Nnu'ngu' alu'a kwapembeya.

5 Nantali babaliyaa, kwa mwanjaa baalu'a kuilisi dunia yoti.

6 Nantali bene njala na nnyota yo panga gapala Nnu'ngu', kwa mwanjaa baalu'a yukutiyilwa.

7 Nantali bababile na kiya, kwa mwanjaa baabi'ki'lwa kiya.

8 Nantali anoga mwoyo, kwa mwanjaa baalu'a kummona Nnu'ngu'.

9 Nantali ya balu' babaleta amani, kwa mwanjaa baakemelwa bana ba Nnu'ngu'.

10 Nantali babateselwa kitumbu so panga mwapala Nnu'ngu', kwa mwanjaa Ukulungwa wa Kunani wabe.

11 "Nantali yinu mwenga bandu pabaalu'a kuntukana, kunku'su'mbwa na kunku'pi'ki'ya malau goti kwa kitumbu sangu'. 12 Munapusike no luluta, kwa mwanjaa mubi'kilwe upo yinu ngu'lu' kunani. Nnyo, ngamwabaatesike alondoli ba masu'ba ga nsu'gu'.

13 "Mwenga nga kati mwinyo kwa bandu boti, lakini mwinyo mana wobiye kilyi'lyi' sake, ulu'a kuuyi'ya namani uki'li'bu'ye kilyi'lyi' sake? Upwaikali ata pasene, yaigala taikulya kuundi no li'batilwa na bandu.

14 "Mwenga nga mwabweya wa padunia. Nsengo wausengilwe pakitu'mbi' wiyanikwa lili. 15 Wala ntu'pu' mundu ywakoya kimuli na kukiwi'ki'lya mmu'ngu' au mukitu'ndu', ila, akiu'bu'ya patu'ndu'bau li'nga bandu babayingya nnyumba bapate kuubona bweya. 16 Nyinyonyo namwenga, bweya winu upalikwa umulike kwa bandu li'nga bagabone manogau gamugapanga, nabembe baalumbe Tati' binu bababile kunani.

17 "Kanemuwase panga niisi bu'ya salya ya Musa na mayi'gano ga alondoli ba Nnu'ngu'. Nenga naisali bu'ya, ila niisi timilisa. 18 Kwa mwanjaa nimmakianga kweli, mpaka kunani na pai' payayomoka, ntu'pu' ata pandu pasene musalya papaalu'a bu'yi'lwa mpaka goti gatimi. 19 Bai, mundu ywaalu'a ti'kwana yimo muamuli njene yi' na kwayi'gana bandu, aywo aapanga nsene muno muukulungwa wa Kunani. Lakini mundu ywaalu'a kwikamwa na kwayi'gana bi'ngi', aywo aakemelwa nku'lu' muukulungwa wa Nnu'ngu'. 20 Bai nimmakianga, aki yinu mana ikotwike pi'ta yi'lu' ya balimu ba salya na Mafalisayo, mwauyingyali Ukulungwa wa Kunani.

21 "Muyu'wine mwabaabakiyilwe au'ku' bitu kwai'mbu' panga, ‘Kaneubulage, mundu ywaabulaga aukumilwa.’ 22 Lakini nenga nimmakianga, mundu ywoywoti ywamusikya nnongowe apalikwa ukumilwa. Mundu mana kantukana nnongowe apalikwa ukumilwa kubalasa, na mana kammakia nnongowe ‘Wenga wa nnogeloge’, apalikwa yingya mumwoto wangayomoka.

23 "Bai, mana kauyenda pandu papeleteu piya salaka kwa Nnu'ngu', pauku'mbu'kya panga uyu'mine na nnongogo, 24 wileke salaka yako, ukaawane na nnongogo, bu'kapo ukapiye salaka yako.

25 "Uyomwane na nsitaki wako kiyu'ngu'ya mubile balo mundi'la kamuyenda kumwalo. Mana nyoli, aakuikia kwa akimu, nembe aakukamukia kwa asikali na kukuyingia muutabilwe. 26 Kakape nikubakia, waapitali mo mpaka uyomwe li'pa lwela lwa kuundi'la.

27 "Muyu'wine panga ibayilwe, ‘Kaneupange upege.’ 28 Lakini nenga nikubakia panga, mundu ywoywoti ywanningulya nnwawa kwa kumminyikia, ayomwike gonja nakwe nkati ya mwoyo wake. 29 Manaitei liyo lyako lyammalyo likupanga upange sambi, uliyokwe na kulitaikulya kuutalu. Nantali obeya kili'mbi'li'mbi' simo muyi'ga yako, kulikoni yi'ga yako yoti taikulilwa kumwoto wangayomoka. 30 Kai', nyinyonyo na luboko lwako lwamalyo, mana kalukupeleka musambi, ulukate na kulutaikulya kuutalu. Kwa mwanjaa nantali obeya kili'mbi'li'mbi' simo muyi'ga yako kulikoni yi'ga yako yoti taikulilwa kumwoto wangayomoka.

31 "Kai', ywabayilwe panga, ‘Mundu mana kanneka nnyumbowe ampei talaka.’ 32 Lakini nenga nimmakianga panga, ntu'pu' mundu ywayi'ki'ti'lwa kunneka nnyumbowe ila kwa kitumbu sa upege. Kai', ampanga nnwawa ywo abe mpege mana aaku'ndike kwa nnalu'me ywi'ngi'. Na mundu ywakobeka nnwawa ywalekilwe, apanga mpege.

33 "Muyu'wine kai' au'ku' binu baabayilwe panga, ‘Kaneuti'kwane kilapo sawannapi Bwana, lakini utimise ndapo yako.’ 34 Lakini nenga nimmakianga, kanemulape ata pasene, kwa lina lya kunani, kwa mwanjaa nga kiti'gu' sa lenji sa Nnu'ngu', 35 wala kwa dunia, kwa mwanjaa nga kiti'gu' sake so bi'kya magu'lu', wala kwa Yelusalemu kwa mwanjaa nga nsengo wa Nkulungwa nku'lu'. 36 Wala mundu kaneulape kwa ntwe wako, kwa mwanjaa uwesali ata kulugalambwa lunywili lwako lumo panga luu au lupili. 37 Ila pamulongela, mupalikwa longela kweli. ‘Elo,’ yinu ipange kakape ‘Elo’, na ‘Lili’ ipange kakape ‘Lili.’ Sakiyongeya po kibu'ka kwa yu'lu' nnau Ibilisi.

38 "Muyu'wine panga ibayilwe, ‘Liyo kwa liyo, na lino kwa lino.’ 39 Lakini nenga nimmakianga kanemubukiye, maakau kwa maakau. Mana mundu akuku'mbwi mbande muligomo lyammalyo, unng'alambukiye na ligomo lyanki'ya. 40 Mundu mana kakusitakya kwa kukutolya kiyampani sako, wanneki na likoti lyako kai'. 41 Mundu mana akuli'ndi'ndi'li pu'twa kigombo ulipau wa kilometa yimo, ukipu'twe kigombo so ata kwa kilometa ibi'li'. 42 Mundu mana kakulu'ba kili'be umpei, ywapala nngu'ta kaneunnyime.

43 "Muyu'wine panga ibayilwe, ‘Umpende wa papipi yako, na unsukwe nndumu wako.’ 44 Lakini nenga nimmakianga panga mwapende andumu binu na kwalu'bya babantesa. 45 Mupange nyo li'nga mupate panga kakape mwabana ba Tati' binu ba kunani. Bembe babawali, kwa mwanjaa aapeya lumu na ula anogau na alau. 46 Mana kamwapenda balu' babampenda mwenga bai, mupata upo yaku' kwa Nnu'ngu'? Ata alonga koli bapanga nyinyo. 47 Mana kamwapanga abali alongo binu bai, mupanga namani sakwapi'ta bi'ngi'? Ata bandu bangau'bi'lya bapanga kati go! 48 Kwa nyo, mupange mwatimya, kati mu'lu' Tati' binu ba kunani mwababile atimya."