1 "Kanemwaukumu bandu bi'ngi', li'nga Nnu'ngu' aakane kumuukumu mwenga. 2 Kwa mwanjaa mwenga mwaukumilwa kati mwamwaaukumu ainu, na kili'ngo si'si'lu' samwali'ngya ainu na Nnu'ngu' nga saakitumya kunni'ngya mwenga. 3 Mwanjaa namani ukibona kyelenje sakibile muliyo lya nnongogo, lakini ulubonali lubago lwalubile muliyo lyako? 4 Au ukombwabuli kummakia nnongogo, ‘Baliya nikubu'ye kyelenje muliyo,’ naapo kubile na lubago muliyo lyako wamwene? 5 Wenga wa nnapiki, ubu'ye wi'ti' lubago lwalubile nkati ya liyo lyako, bu'kapo uwesa kulubona wiso lwelenje lwalubile muliyo lya nnongogo.

6 "Kanemwapei mbwa ikowe mbeleteu, li'nga baakane galambuka na kumpoteka. Wala kanemwataikuli magu'be ili'be ya samani ngu'lu'. Mana mwapanga nnya, baaili'bata.

7 "Mulu'be, namwenga mwapeyelwa, mupale namwenga mwapata, mupange u'li, namwenga mwayu'gu'li'lwa. 8 Kwa mwanjaa kila mundu ywalu'ba endapeyelwa, na ywapala endapata, na ywapanga u'li endayu'gu'li'lwa. 9 Nyai mukipi'nga sinu ywawesa kumpeya mwana wake liwe mana kannu'ba likati? 10 Au nyai ywawesa kumpeya nng'ambo mana kannu'ba omba? 11 Manaitei mwenga mwaalau mumanyi kwapeya bana binu ikowe inannoga, nengite Tati' binu ba kunani nga munomuno kwapeya ili'be inannoga babannu'ba.

12 "Kwa nyo, sosoti samupala mupangilwe na bandu, namwenga mwapangi ainu nyinyonyo. Aga nga malombolyo ga salya ya Musa na maandiko ga alondoli ba Nnu'ngu'.

13 "Muyingi kwo pi'tya nniango wo patimwa. Kwa mwanjaa nniango na ndi'la yaibile ngu'lu' ili'nga kuulanganyiki, na babayingya mo nga bambone. 14 Lakini nniango na ndi'la yaili'nga kuukoto nga yo patimwa. Bandu banamboneli babakombwa kwipwa ndi'la yo.

15 "Mwili'ndi'le na alondoli ba ubu'su'. Bembe bamwisilya kwo liya kati ngondolo, lakini nkati ya myoyo yabe ibile kati pu'mbe akali'. 16 Mwalu'a kwatanga kwa makowe gabagapanga. Buli, bandu bawesa tu'mbwa itunda inannoga mumikongo ya mimimwa? 17 Nyinyonyo, nkongo nnogau upambika itunda inannoga, na nkongo unannyata, upambika itunda inannyata. 18 Nkongo unannoga upambikali itunda inannyata, wala nkongo unanyata upambikali itunda inannoga. 19 Kila nkongo waukotoka pambika itunda inannoga, wendapi'ngu'lwa no taikulilwa palitu'ta lya mwoto. 20 Nyinyonyo, mwalu'a kwatanga alondoli ba ubu'su' bu'kana na makowe gabe gabagapanga.

21 "Kwenda kila mundu ywanikema, ‘Bwana, Bwana’, aayingya muukulungwa wa kunani, ila yu'lu' ywapanga gabagapendi Tati' bangu' ba kunani. 22 Lisu'ba li'lu' lya ukumu, baingi baanibakia, ‘Bwana, Bwana! Kwa lina lyako twaalike liyi'gi'yo lyako, bi'nga moka no panga mangelongelo maingi?’ 23 Nenga naalu'a kummakianga mpu'la, ‘Katu, nintangiteli mwenga. Mubu'ke nnu'ngi' yangu' mwenga mwapanga malau.’

24 "Bai, kila mundu ywagapi'kania mayi'gi'yo gangu' na kugakamwa alandana na mundu mwene malango, ywasengite nyumba yake panani ya liwe lya mpi'mbi'. 25 Ula ngania na mabi'ndi' twi'lya masi', na kimbu'nga ngakiipukatya nyumba yo, lakini yaayilwikeli kwa mwanjaa yaasengilwe muliwe lya mpi'mbi'.

26 "Lakini kila mundu ywagayu'wa mayi'gi'yo ganigalongela pangali kugakamwa, aywo alandana na mundu nnogeloge ywasengite nyumba yake pakyangi, 27 ula panile na mabi'ndi' twi'lya masi', kimbu'nga ngakiipukatya nyumba yo, nayembe ngaiyiluka no sengwanika yoti."

28 Yesu payomwi longela makowe go, ipi'nga ya bandu yatisangala muno bu'kana na mu'lu' mwaayi'ganiye, 29 kwa mwanjaa mayi'gano gake gaai go amulisa, kwenda kati mwabayi'gana balimu ba salya lili.