1 Sǝ Dauda bang acau mala nggyal mǝnia ka aban Yahweh, a bàkú mǝnana amsǝi a bù aɓi-mǝbura kat, sǝ a bù Sawul ka 2 ama,

<<Yahweh nda tali mem,

ban-sǝmbǝrǝa mem

andǝ mǝ’amsǝam;

3 We Ɓakuli, tali mem,

mǝnana aɓalǝo sǝ ǝn nggǝ kum ban-auwa ka;

ntongŋo mem andǝ rǝcandǝa mala amsǝban mem,

kanggǝrang-ban andǝ ban-auwa mem;

mǝ’amsǝam a ɓabù ɓìkìbura.

4 Ən ɓua aban Yahweh, yì mǝnana kārǝ́na ɓǝà ɓwangsǝi ka;

Anggo sǝ mǝ nǝ kum amsǝban a ɓabù aɓiam-mǝbura.

5 Lú gumbǝliam kǝla eaki-nkono mala mùr;

mùrɓangŋa mala kiɗikiban ɓakiam;

6 Anggur mala Shewol taɓǝlikiam;

agbǝli mala lú puratam.

7 Aɓa nggikiban mem ngga, ǝn ɓua aban Yahweh,

ǝn ɓua aban Ɓakuli mem.

Ok giem aɓa ndà male;

sǝ ɓua mem ace gbasha kútí a kiri.

8 Pǝlǝa ɓanza dǝurǝo sǝ gǝggǝli,

akusǝɓa mala kuli ɓǝl-ryak’ryak

sǝ à dǝurǝkio;

à gǝggǝli acemǝnana bumi-lullo.

9 Yele pur a ɓá lullǝi;

bǝsa mǝ’earke pur a ɓá kúni,

nkalang mǝnana nggangsǝ ka ear-bǝsa nǝ baní.

10 Dìlì kuli sǝ sulǝo,

pǝndǝa mǝcikciki na aɓata akusǝi.

11 Eau a nzǝm cerup sǝ yàlé;

e, à sǝni a nkpamtari gung.*

12 Tsǝk pǝndǝa mǝnana gumbǝlì ka, pǝlǝ tara male,

pǝrɓang mana lùmsǝ nǝ mur ka kàrì.*

13 Tǎlaban mana aɓadǝmbi ka,

tsǝk nkalang bǝsa lo earke.

14 Yahweh sa a kuli kǝla mgbarangce.

Ɓakuli mana Karban Kat nǝ Gulo ka loasǝ gì.*

15 Túr amundi sǝ mesǝ aɓi-mǝbura,

liki’nzama male zurìmúria.

16 Abân-mǝlime mala nggeamùr ndǝlya,

akusǝɓa mala ɓanza nong kwas,

lang Yahweh gimban,

sǝ pyau n’yali a ɓá lullǝi ka.

17 Sárǝ́ bui nǝ kuli sǝ twalam;

eamsǝam a ban-mǝlime aɓa nggeamùr.

18 Amsǝam a ɓabù ɓiam-mǝbura mǝ’rǝcandǝe,

a ɓabù aɓwana mana à ɓinǝmǝsǝàm ngga, acemǝnana rǝcandǝa malea ɓākì mem.

19 À sulǝ amuram a pwari murɓikea mem,

sǝama Yahweh pam gbasha.

20 Sǝ ɗǝm ngga pusǝam, yinǝ mim aɓa dalang.

Amsǝam, acemǝnana bumipwasǝ arǝàm.

21 Yahweh pàngnǝ mim kǝla mǝnana karǝ arǝ ɓealɓoarna mem ngga;

pam tangnakusǝ ɗwanyicau-arǝǔ mem.

22 Ən kpanata anjargula mala Yahweh,

sǝ ǝn kyanggi Ɓakuli mem aban ká pàk ɓealɓikea ɗang.

23 Anggurcau male kat ka, à nda aɓadǝmbam,

sǝ ǝn kyanggi anê male ɗàng.

24 Mǝ nda jik aɓadǝmbi.

Ən bwal ɓamúràm arǝ cauɓikea.

25 Acemani ka Yahweh panam tangnakusǝu kǝla mana karǝ arǝ ɓealɓoarna mem ngga,

kǝla mana karǝ arǝ doɓoarnsari mem aɓadǝmbi ka.

26 Aban amǝ lǝmdǝ mǝsǝswatǝr ka, awu nǝ lǝmdǝ mǝsǝswatǝr,

aban amǝ’ɗwanyicau-arǝu ka, awu nǝ lǝmdǝ ɓamúrò, a nda mǝ’ɗwanyicau-arǝu.

27 Aban amǝ’doɓoarnsari ka, awu nǝ lǝmdǝ ɓamúrò mǝ’doɓoarnsari,

aban amǝ’kìɗìkì ka, awu nǝ lǝmdǝ ɓamúrò mǝɓìkìdo.

28 Awu nǝ amsǝ aɓwana mǝnana à paria ka,

sǝama amǝsǝo na arǝ amǝtwàlɓamúrû, ace nyesǝia a nzali.

29 A nda pitǝla mem, Yahweh.

Yahweh kǝ̀ tâ aɓa pǝndǝa mem.

30 Nǝ we ka, mǝ nǝ gandǝ loasǝtà amǝ’tǝllìban,

nǝ pagbasha mala Ɓakuli mem ngga, mǝ nǝ yàlî múr sheran.

31 Mala Ɓakuli ka, njar male na jik.

Cau mala Yahweh ka à mwamǝni.

Yi ka, ntongŋo na

aban aɓwana mana à kùmsǝ a baní ka.

32 Yana nda Ɓakuli, ɓǝ̀ Yahweh na raka?

Sǝ yana nda tali, ɓǝ̀ Ɓakuli na raka?

33 Ɓakuli nda ban-auwa mǝcandǝe mem,

sǝ kǝ tsǝk njar mem ɓǝ̀ duk jik.

34 Tsǝk akusǝam ɓǝà soa nzali kǝla mala mbamba,

sǝ tamsǝam amur abân mǝ’dāhre.

35 Kǝ kanì abuam munǝo,

ace mǝnana ɓǝ̀ anggwarbuam gandǝ kar nta mala bolo-bángŋá.

36 Sǝ ɗǝm ngga à panam ntongŋo mala amsǝban mô;

sǝ pagbasha mô dumsǝnam a gulo.

37 A tangsǝna njar ace akusǝam,

ace mǝnana akusǝam ɓǝà kǝa shambǝrǝ raka.

38 Ən pǝrnata aɓiam-mǝbura, sǝ ǝn kiɗikinia.

Ən pǝlǝ nzǝmam ɗàng she lang ǝn malnia ka.

39 Ən twalnatea, ǝn zuɓikia sǝ à gandǝ lo ɗang.

E, à kpaki a nzali a kusǝam.

40 A mārǝnam nǝ rǝcandǝa ace munǝo;

Aɓwana mǝnana à lo arǝàm ngga, a ɓunginia aɓatam.

41 A tsǝ́ngŋǝ̀nà aɓiam-mǝbura à pǝlǝam nzǝmia,

ace mǝnana ɓǝn kiɗiki aɓwana mǝnana à ɓinǝmǝsǝam ngga.

42 À pelǝban, sǝ kǝɓwa pà kàm nǝ̀ amsǝia ɗàng;

à ɓua aban Yahweh, sǝ okia wia ɗàng.

43 Pǝlǝa ǝn goea kǝla muku nzali.

Ən nyakia sǝ ǝn parkia kǝla dǝɓang a njarɓala, sǝ ǝn mesǝkia.

44 A amsǝnam aɓa kúnɓuàna sǝnǝ aɓwana mem.

A tsǝ́ngŋǝ̀nám ǝn dumǝna múrû amur anzali.

Aɓwana mana ǝn súrǝ̀ia raka, à pàk túróɓadǝmbu aɓadǝmbam.

45 Amǝkúnɗàngna nǝ̀ paɓamuria abanam,

Lang à ok cau nǝ o ani amuram ngga, à nǝ̀ oakam.

46 Ɓabum amǝkúnɗàngna nǝ̀ ɓungio,

à nǝ̀ purkî ɓalǝ abân-sǝmbǝrǝa malea,

sǝ à nǝ̀ yiu nǝ rǝɓǝla.

47 Yahweh na nǝ yilǝmu!

Ɓwangsǝban ɓǝ̀ pa aban Tali mem!

Gulo ka mala Ɓakuli na,

Tali mala amsǝban mem.

48 Yì nda Ɓakuli mǝnana mbwekiyiam akúnì,

mǝnana kǝ yinǝ aɓwapǝndǝa aɓatam,

49 mǝnana pusǝam ǝn purì bù aɓiam-mǝbura ka.

E, a kǝ loasǝam mǝ kútì aɓwana mǝnana à kǝ lo arǝàm ngga.

A kǝ amsǝam a bù ɓwa mǝɓìkìbura.

50 Acemani ka, mǝ nǝ po yàwá, we Yahweh, aɓalǝ anzali,

sǝ mǝ nǝ tùki anggyal ɓwangsǝki lullǝo.

51 Pè murǝm male amsǝban mǝgule,

sǝ kǝ lǝmdǝì ɓwa male mana ɗārǝì ka, earcearǝu mǝnana kǝ gǝshi raka,

aban Dauda andǝ amǝɓala male tàtǝ́k.>>