1Amurǝma 10

Mā-murǝm mala amǝ Sheba yiu a sǝn Murǝm Solomon

1 Lang mā-murǝm mala amǝ Sheba okcau mala zǝ́kí mala Solomon mǝnana yinǝ pagulo arǝ lullǝ Yahweh ka, lo yiu nǝ aɗikiban mǝkwane, nǝ̀ mwam Solomon nǝia. 2 Yiu atārǝia andǝ amǝ’tè kaɓa nyangsang; à yi tusǝ a Urǝshalima nǝ akalakadambi mǝnana à tsaɗi a nzǝmarǝia nǝ atwalo a nzǝmia ka; atwalo mala agir-mǝ’kuskushi, andǝ bolo-njengǝlan kǝ̀rkǝ́r, andǝ atali-gǝna. Sǝ lang yina aban Solomon ngga, ɗìkí nǝ acau amur agir mǝnana kat yì Mā-murǝm ndanǝi a ɓabumi nǝ̀ ɗìkí ka. 3 Solomon pe wi eare arǝ aɗikiaban male kat; ɓekǝ cau pà kàm mǝnana ama kwan kǝ̀rkǝ́r Solomon gandǝ bǝ́lì wi ɓālǝi raka ɗàng. 4 Mā-murǝm mala amǝ Sheba yi sǝn Solomon ngga mǝ’sǝlǝe na kǝ̀rkǝ́r. Sǝ lang sǝn palta mǝnana Solomon ɓak ka, 5 andǝ agirlina mǝnana à tsǝia a ban-li male, andǝ do mala amǝ’tè, andǝ amǝtúró-ɓadǝm Solomon aɓalǝ adaura-murǝm malea, andǝ amǝ’pa-girnùná male, andǝ agir’nkila mǝnana à kǝ pisǝia ace paɓoro aban Yahweh aɓa ndàmǝgule ka, gìrnî tsǝì mǝn kúni aban ndali.

6 Ne Solomon ama, <<Cau mǝnana aɓwana yi banggam a nzali mem amúr acau mò andǝ sǝlǝe mò ka mǝsǝcaua, 7 sǝama ǝn earnǝ acau mǝno ka ɗàng, she lang ǝn yina sǝ amǝsǝam sǝnǝni ka. Sǝ mǝsǝcau ka, gauwa-tsùrú mala ceì ka, à banggam ɗàng. Sǝlǝe mò andǝ gǝna mò ka à kútì mǝnana à bangŋi ǝn oê ka. 8 Aɓwana mô ka amǝ’múrɓoarna na! Amǝ’túró mô mǝnana à kǝ cam a ɓadǝmbo à kǝ ok acau sǝlǝe mò ka, amǝ’múrɓoarna na!*10:8 Ɓalli gbal aɓa: Pas 8:34 . 9 Ɓwangsǝban ngga ɓǝà pè Yahweh Ɓakuli mô, mǝnana banɓoari wi arǝò, sǝ dumsǝo amúr buno-murǝm mala Isǝrayila ka!*10:9 Ɓalli aɓa: 2Sam 22:20; 1Amur 5:7. Ace earcearǝu mǝnana Yahweh ndanǝi arǝ Isǝrayila, yì earcearǝu mǝnana málá male pà kàm raka, twalǝno wu duk murǝm ace mǝnana wu lǝmdǝ mǝsǝcau a ɓashi andǝ ɓealɓoarna.>>

10 Pǝlǝa mā-murǝm mala amǝ Sheba pè Solomon bolo-njengǝlan mǝnana dǝmbǝrya male ka tyang á-ine (4,000) na ka; ɗǝm ngga pè wi atali-gǝna pas andǝ agir-mǝ’kuskushi kǝ̀rkǝ́r. Anzǝm mǝno ka, kǝɓwa nyare yiu nǝ agir-mǝ’kuskushi mǝkǝ̀rkǝ́rnì kǝla mǝnana mā-murǝm mala amǝ Sheba pè Murǝm Solomon ngga ɗàng. 11 Nyarɗǝm ngga, awaru-bǝsa mala Hiram mǝnana à wari a Ofir sǝ à yinǝ bolo-njengǝlan ngga, à yinǝ nggun almu gbal a buia, andǝ atali-gǝna kaɓa-kpǝm. 12 Murǝm paktúró nǝ nggun almu ace nggun-gbasha mala ɓala mala Yahweh, sǝ ace palta mala murǝm, sǝ ɗǝm ngga ace shàr adànà andǝ azangŋan ace amǝ’nggyal. Ulang mǝno yì nggun almu ka, à yinǝi ko à sǝni ɗǝm ɗàng ba yalung.

13 Murǝm Solomon pè mā-murǝm Sheba agir mǝnana kat earkicea ka; gìr mǝnana kat ɗice, tsǝa-amur agir mǝnana murǝm pàni wi ka, Murǝm Solomon pè wi aɓa nyangsang mala pàbu male. Pǝlǝa nyare o a nzali male andǝ amǝtè.

14 Dǝmbǝrya mala bolo-njengǝlan mǝnana Solomon kumo a pǝlǝa mwashat ka, nda tyang á-lumi-ɓari bwamdǝ tongno (25,000),*10:14 Ib: talent gbǝman-tongno-nong-mwashat nǝ lumi-tongno-nong-mwashat bwamdǝ tongno-nong-mwashat (666). 15 ɗeki amǝnana kum aɓa cemi mǝnana à yinǝì wi nǝi a bu amǝ’nggali, andǝ mǝnana kum aban amǝ’kúrkúró andǝ amǝ’makkiagir, andǝ mǝnana kum a bu amurǝma mana kat nǝ njar-nzali ka, andǝ mǝnana nǝban anggwamna mala nzalinì ka. 16 Murǝm Solomon pàk antongŋo mǝgulke gbǝman-ɓari mala bolo-njengǝlan mǝnana à walki ka, sǝ koya ntongŋo ka tyang tongno-nong-ɓari mala bolo-njengǝlan na à pè nǝi ka. 17 Sǝ pàk antongŋo mǝkeke gbǝman-tàrú (300) mala bolo-njengǝlan mǝnana à walki ka; pàktúró nǝ tyang ɓari mala bolo-njengǝlan sǝ pàk komǝye ateà ka. Sǝ murǝm tsǝk atongŋo mǝnia kat ka a Palta mala Ndà-nggun Lebano.

18 Ɗǝm ngga, murǝm pàk nggea buno-murǝm nǝ aminǝ-nzu sǝ à tasǝ rǝi nǝ bolo-njengǝlan mǝɓoarne kat-kat. 19 Buno-murǝmì ka ndanǝ aban-eauwe tongno-nong-mwashat, sǝ múr buno-murǝmì ka kàr kunggurung. Sǝ amur koya bu buno-murǝmì ka, ban nongsǝ myalbu na kam, sǝ ɓǝ̀nzál mala im na kam gbal aban came a nkanggari koya ban nongsǝ myalbu ka. 20 Aɓǝ̀nzál mala a’im na kam lum-nong-ɓari mǝnana à came amur aban-eauwe tongno-nong-mwashat ka, mwashat a koya kúnban mala akúnban ɓari mala koya ban-eauwe. À pàk ulangyi a kǝ pwara, a ɓè domurǝm ɗàng. 21 Akwap kat mala nugìr mala Murǝm Solomon ngga, à peǎ nǝ bolo-njengǝlan, sǝ atanggǝla mala Palta mala Ndà-nggun Lebano kat ka, à peǎ nǝ bolo-njengǝlan mǝɓoarne. Ɓekǝ gìr pà kàm mǝnana à pè nǝ azǝrfa ka ɗàng; acemǝnana à twal azǝrfa kǝla kǝgir na ɗàng a nza mala Solomon. 22 Murǝm ngga ndanǝ awaru-bǝsa pas mala twal gya mǝsauwe amur nggeamùr andǝ awaru-bǝsa mala Hiram. Kusǝ mwashat aɓa koya pǝlǝa tàrú ka, à kǝ yinǝ bolo-njengǝlan, andǝ bolo-azǝrfa, andǝ aminǝ-nzu, andǝ agbakǝm, andǝ anyál-murǝm.

23 Nda Murǝm Solomon yi kútì amurǝma mala ɓanza nǝ gǝna andǝ sǝlǝe. 24 Ɓanza kat alta yiu aɓadǝm Solomon ace ok sǝlǝe male, mǝnana Ɓakuli pe wi a ɓabumi ka. 25 Pǝlǝa anzǝm pǝlǝa, koyan mǝnana yiu ka, yinǝ aɓoro male: agir bolo-azǝrfa andǝ bolo-njengǝlan, agir-nggūrǝu, andǝ agirbura, andǝ agir-mǝ’kuskushi, andǝ apǝr, andǝ apǝr-mǝdambǝriso.

26 Pǝlǝa Solomon ramba awaru-pǝr andǝ amǝ’pǝ̀r abanɓwáná. Ndanǝ awaru-pǝr á-mwashat nǝ gbǝman-ine (1,400) andǝ amǝ’pǝ̀r á-lum-nong-ɓari (12,000) mǝnana tsǝia arǝ anggea-là mala awaru-pǝr ka, sǝ tsǝk aɓea atè a Urǝshalima. 27 Murǝm Solomon tsǝa, bolo-azǝrfa na kam a koya ban aɓa Urǝshalima kǝla amǝsǝtali, sǝ tsǝa, aɓwana kǝ kum nggun-seda kpǝm kǝla nggun-vwari mǝnana kǝ gul a kusǝ ankono ka. 28 Apǝr mala Solomon ngga à kúria a Masar andǝ Kuwe sǝ à yinǝia. Amǝ’nggali mala ɓala-murǝm kúria a Kuwe. 29 Waru-pǝr mwashat ka à kúrí a kún shekel gbǝman-tongno-nong-mwashat (600) mala bolo-azǝrfa a Masar sǝ à yinǝi, sǝ pǝ̀r mwashat ka a kún shekel gbǝman-mwashat-nǝ-lumi-tongno (150) mala bolo-azǝrfa. Yià gbal ka à kǝ makki awaru-pǝr andǝ apǝr mǝnia ka aban amurǝma mala amǝ’Hitti andǝ amurǝma mala amǝ’Suriya kat, ace umnǝia arǝ anzali malea.