1Amurǝma 22

Ahap andǝ amǝ’ɓangnǝa mǝ’nyirì

1 À pàk apǝlǝa tàrú, munǝo pa kàm anre Suriya andǝ Isǝrayila ɗàng. 2 Sǝama a tàruià pǝlǝê ka, Jehoshafat murǝm Yahuda wari a sǝn murǝm Isǝrayila. 3 Sǝ Ahap murǝm Isǝrayila ne amǝ’tè ama, <<Wu sǝlǝ ama Ramot Gilǝyat ka nzali ma’sǝma, sǝ sǝm duk kún sǝm ɗǝong, sǝm é a ɓabù murǝm Suriya ɗàng?>>

4 Sǝ Ahap ɗì Jehoshafat ama, <<Awu nǝ̀ ká atam aban munǝo a Ramot Gilǝyat le?>> Sǝ Jehoshafat eari wi ama, <<Mim sǝnǝ we ka, sǝm nda mwashat, aɓwana mem ngga à nda mwashat andǝ aɓwana mô, sǝ apǝr mem ngga apǝr mò na.>>

5 Sǝama Jehoshafat banggi murǝm Isǝrayila ama, <<Ɗìbancau peatu amur mana Yahweh nâ.>>

6 Pǝlǝa murǝm Isǝrayila ramba amǝ’ɓangnǝa abanɓwáná, kǝla aɓwana gbǝman ine, sǝ ɗia ama, <<Mǝ kyan nǝ munǝo arǝ Ramot Gilǝyat le, ko mǝ nggá ká ɗàng?>>

Sǝ à eari wi ama, <<Kyane, acemǝnana Yahweh nǝ̀ pa nggea-lê a ɓabù murǝm.>>

7 Sǝama Jehoshafat ɗìban ama, <<Kǝ ɓè mǝɓangnǝa mala Yahweh pà kàm akani mǝnana sǝm nǝ̀ ɗìbancau nǝbani ka re?>>

8 Sǝ murǝm Isǝrayila ne wi ama, <<Ɓè ɓwa nakam mwashat mǝnana sǝm nǝ̀ gandǝnǝ ɗìbancau aban Yahweh nǝbani ka. Ɓwe nda Mikaya muna-ɓwabura mala Imla, sǝama ǝn nggǝ earce ɗàng, acemǝnana kǝ ɓangnǝ-ɓangnǝa mǝɓoarne amuram ɗàng, she mǝɓike.>>

Sǝ Jehoshafat bang ama, <<Murǝm, kǝa nacau anggo ɗang.>>

9 Pǝlǝa murǝm tunǝ ɓè mǝgulo male, sǝ ne wi ama, <<Yinǝàm nǝ Mikaya muna-ɓwabura mala Imla akaurǝa.>>

10 Adyan ngga, Murǝm Isǝrayila andǝ Jehoshafat murǝm Yahuda ka, à ndaban dumnǝdo amur abuno-murǝm aɓalǝ adaura-murǝm malea, a ban katǝra a kún bankutio mala Samariya, sǝ amǝ’ɓangnǝa kat kǝ ɓangnǝ-ɓangnǝa aɓadǝmbǝia.

11 Sǝ Zedekiya muna-ɓwabura mala Kena’ana pakkî ɓamurì njawe bolo-candǝa, sǝ na ama, <<Yahweh bang ama, <Nǝ mǝnia ka, sǝ a awu nǝ tulki amǝ’Suriya she ɓǝà kiɗikina ka.> >>

12 Sǝ amǝ’ɓangnǝa kat ka, à ɓangnǝ-ɓangnǝa anggo, sǝ à bang ama, <<Kya munǝ arǝ Ramot Gilǝyat, awu nǝ̀ limurǝm; Yahweh nǝ̀ pa nggea-lê a ɓabù murǝm.>>

13 Sǝ mǝ’na-túrbân mǝnana wari a tunǝ Mikaya ka, banggi wi ama, <<Sǝni, acau mala amǝ’ɓangnǝa ka, amǝ’mwashati na, sǝ acau mǝɓoarne na aban murǝm. Ɓǝ̀ cau mò yiu mwashat kǝla malea, sǝ wu nacau mǝɓoarne.>> 14 Sǝama Mikaya bang ama, <<Ən kanbo nǝ yilǝmi Yahweh Ɓakuli mô, cau mǝnana Yahweh nǝ̀ nam ngga, kǝ cê na mǝ nǝ bang ngga.>>

15 Sǝ lang Mikaya yina aban murǝm ngga, murǝm Ahap ɗi ama, <<Mikaya, ɓǝ̀ sǝm kya munǝo arǝ Ramot Gilǝyat le ko ɓǝ̀ sǝm nggá ká ɗàng?>> Mikaya eari wi ama, <<Kya arǝia, awu nǝ̀ limurǝm; sǝ Yahweh nǝ̀ po nggea-lê a ɓabuo.>>

16 Sǝ murǝm Ahap ne wi ama, <<Kusǝ shen sǝ mǝ nǝ tsǝo wu kángìr nǝ lullǝ Yahweh ama wu kǝa nam kǝcau ɗàng she kǝ mǝsǝcau?>> 17 Pǝlǝa Mikaya ne wi ama, <<Ən sǝn Isǝrayila kat mǝsǝe amur ankono, kǝla anzur mǝnana à pànǝ yalu raka. Sǝ Yahweh bang ama, <Amǝnia ka à pànǝ yalu ɗàng; koyanale ka ɓǝ̀ nyar a ɓala male aɓa rǝpwala.> >>

18 Murǝm Isǝrayila banggi Jehoshafat ama, <<Ən banggo mǝni nǝma Mikaya pà nǝ̀ ɓangnǝ-ɓangnǝa mǝɓoarne amuram ɗàng, she mǝɓane re?>>

19 Mikaya lidǝmba nǝ nacau ama, <<Acemani ka, ok cau mala Yahweh: *22:19 Ɓalli gbal aɓa: Isha 6:1; Dan 7:9; Sǝn 4:2.Ən sǝn Yahweh aban do amur buno-murǝm male, andǝ abangŋo mǝnana kat a kuli ka aban came a nkanggari a bui-mǝli andǝ bui-mǝnggare; 20 sǝ Yahweh bang ama, <Yana nǝ̀ swár Ahap acemǝnana ɓǝ̀ kya kpa a Ramot Gilǝyat ka?> Sǝ koyanale ka nacau a sǝne male. 21 Pǝlǝa ɓè bangŋo puro yi cam aɓadǝm Yahweh, sǝ na ama, <Mǝ nǝ swárí.> 22 Sǝ Yahweh ɗì ama, <Nǝ ya njar sǝ awu nǝ̀ swárí?> Sǝ bangŋonì ear ama, <Mǝ ne nggá pǝlǝ bangŋo mǝ’nyirì a kún amǝ’ɓangnǝa male kat.> Sǝ Yahweh ne wi ama, <Kya swárí, awu nǝ̀ limurǝm. Puro kya pa anggo.> 23 Ado ka, sǝni Yahweh tsǝ̀ngŋǝ́nà bangŋo mala nyir a kún amǝ’ɓangnǝa man kat, sǝ Yahweh nana ama gìr’mur’mwana nǝ̀ kumǒ.>>

24 Pǝlǝa Zedekiya muna-ɓwabura mala Kena’ana sung tù aban Mikaya, koè a takiri, sǝ ɗì ama, <<Lang sǝ bangŋo mala Yahweh nǝ̀ purî rǝam, sǝ nǝ̀ nacau nǝ we?>>

25 Sǝ Mikaya eari wi ama, <<Awu nǝ̀ sǝni a pwari mǝno a kutina aɓa kurǝm ɓalǝu ace sǝmbǝrǝ ɓamúrò ka.>>

26 Pǝlǝa murǝm Isǝrayila bang ama, <<Wu bwal Mikaya wu nyesǝi aban Amon yì nggwamna mala nggea-lê, sǝ aban Johash muna-ɓwabura mala murǝm, 27 sǝ wu nea wia ama, <Mǝnia ka nda cau mǝnana murǝm bang ngga: Wu tsǝk mǝnia yi ɓwa ka a ndàkurban, sǝ wu kǝa pe wi kǝgir ɗàng she bǝredi andǝ mùr, bà pwari mǝnana mǝ nǝ nyar nǝi jam ngga.> >>

28 Mikaya bang ama, <<Ɓǝ̀ a nyar jam ngga, Yahweh nacau nǝ mim ɗang.>> Mikaya nyare na ɗǝm ama, <<Koyan ngga, ɓǝ̀ okcau mǝnana ǝn bang ngga!>>

Munǝo andǝ lú mala Ahap

29 Nda Ahap murǝm Isǝrayila andǝ Jehoshafat murǝm Yahuda eauwe, à wari a Ramot Gilǝyat. 30 Sǝ murǝm Isǝrayila ne Jehoshafat ama, <<Mǝ nǝ ɓosǝki rǝam mǝ nǝ ká a kún munǝo, sǝama we ka oasǝ adaura-murǝm mo.>> Pǝlǝa murǝm Isǝrayila ɓosǝki rǝi, sǝ wari a kún munǝo.

31 Adyan ngga, murǝm Suriya nani amǝ’sàrǝ̀ban mala awaru-pǝr male lumi-tàrú-nong-ɓari ama, <<Wu kǝa munǝo arǝ kǝɓwa ɗang, ko ɓwamǝgule ko ɓwamǝkyauwe, she murǝm Isǝrayila nǝmurǝì.>> 32 Sǝ lang amǝ’sàrǝ̀ban mala murǝm Suriya sǝn Jehoshafat ka, à bang ama, <<Ɓafo murǝm Isǝrayila na.>> Nda à pǝlǝa arǝì nǝ munǝo, sǝ Jehoshafat mak-zwalo. 33 Sǝ lang amǝ’sàrǝ̀ban mala awaru-pǝr sǝni ama murǝm Isǝrayila na raka, à pǝlǝ nzǝmia arǝ pǝrte.

34 Sǝama ɓeɓwa nun mundi male, sǝ túrí ɓà, kara ta murǝm Isǝrayila anre ban mǝnana kún adaura-bolo male kpapi kam ngga. Acemani ka, Ahap banggi mǝkwak waru-pǝr male ama, <<Pǝlǝá, sǝ wu pusǝam aɓa munǝo, acemǝnana à tsǝgŋǝ́nàm npenye.>> 35 Munǝo lidǝmba a pwari mǝno, sǝ murǝm Isǝrayila eangnǝ arǝ waru-pǝr sǝ ɓamǝsǝi pǝlǝ nǝ ban amǝ’Suriya, ba lú male nǝ pwarikpǝra. Sǝ nkila mala npenye male solǝ arǝ waru-pǝr. 36 Lang pwari nǝ̀ nggǝ kpa ka, à banggia amǝ’lwa ama, <<Koya ɓwabura ka ɓǝ̀ nyar a là male andǝ nzali male!>>

37 Nda murǝm Isǝrayila wǔ, sǝ à yinǝ luí a Samariya, à tsǝì abanì. 38 Sǝ à lak nkila mǝnana sukki arǝ waru-pǝr ka a guguri mala Samariya (mǝnia ka nda guguri mǝnana amā-gung kǝ sussǝ kam ngga). Anva lenzǝki nkile, *22:38 Ɓalli gbal aɓa: 21:19.kǝla mǝnana cau mala Yahweh bang ngga.

39 Acili atúró mala Ahap andǝ agir mǝnana pea kat, andǝ aɓala minǝ-nzu mǝnana ɓeǎ, andǝ anggea-là mǝnana gilǝkia ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 40 Nda Ahap wǔ atà akê, sǝ Ahaziya muna-ɓwabura male twal bancame mala tárrí, duk murǝm ngga.

Jehoshafat duk murǝm Yahuda

41 Jehoshafat muna-ɓwabura mala Asa, tita yálmúr Yahuda a inea pǝlǝa mala do-bunomurǝm mala Ahap murǝm Isǝrayila. 42 Jehoshafat ka apǝlǝa ɓǝlban male lumi-tàrú-bwamdǝ-tongno (35) sǝ yi duk murǝm. Yálmúr Urǝshalima apǝlǝa lumi-ɓari-bwamdǝ-tongno (25). Lullǝ nggè nda Azuba, ɓoarnsarile Shilhi. 43 Yì ka twalkusǝ tárrí Asa, sǝ pǝlǝ nzǝmi arǝ njar mala tárrí ɗàng. Pàk gìr mǝnana nda pepè a mǝsǝ Yahweh ka. Sǝama kiɗikia amgbangban-peri atà ankúl ɗàng; amǝ’Isǝrayila lidǝmba nǝ paɓoro mala gìr’nkila andǝ mala pisǝ muku-gìr loasǝ yele mǝ’rǝmɓoarne amur amgbangban-peri atà ankúl. 44 Jehoshafat do aɓa rǝpwala andǝ murǝm Isǝrayila.

45 Acili atúró mala Jehoshafat, andǝ rǝcandǝa male mǝnana lǝmdǝi, andǝ amunǝo mǝnana munǝ ka, à ndakam a gilǝe aɓa Malǝmce mala Acau-ɓaraɓara mala Amurǝma mala Yahuda. 46 Acili amǝ’gyagung, mǝnana à ue a ɓàkú mala tárrí Asa ka, Jehoshafat pusǝia à purî ɓá nzali. 47 A bákuì ka, nzali Edom pànǝ murǝm ɗàng, mǝkwaɗitè na duk murǝm ngga.

48 Jehoshafat pàk waru-mur mala Tarshish ace o a *22:48 Ɓalli gbal aɓa: 9:28.Ofir ace yinǝ bolo-njengǝlan, sǝama à lo gya ɗàng, acemǝnana waruî arkia a *22:48 Ɓalli gbal aɓa: 9:26.Eziyon Geber 49 Pǝlǝa Ahaziya muna-ɓwabura mala Ahap banggi Jehoshafat ama, <<Nying amǝ’túró mem andǝ amǝ’túró mô ɓǝà o aɓalǝ awaru-mur.>> Sǝama Jehoshafat ɓinǝe. 50 Sǝ Jehoshafat nongŋo atà akê, sǝ à tsǝì atà akê a nggea-là mala kê Dauda, sǝ Jehoram muna-ɓwabura male duk murǝm.

Ahaziya duk murǝm Isǝrayila

51 Ahaziya muna-ɓwabura mala Ahap tita yálmúr Isǝrayila a Samariya a lum-bwamdǝ-tongno-nong-ɓaria pǝlǝa mǝnana Jehoshafat nda murǝm Yahuda ka, sǝ yálmúr Isǝrayila pǝlǝa ɓari. 52 Pàk gìr mǝnana mǝɓike na a mǝsǝ Yahweh ka, sǝ twalkusǝ tárrí andǝ nggè, sǝ kpata njar mala Jerobuam muna-ɓwabura mala Nebat mǝnana tsǝk Isǝrayila à pàk cauɓikea ka. 53 Kpata Ba’al sǝ peri abaní. Tsǝk Yahweh Ɓakuli mala Isǝrayila bumi lúllô, kǝla mǝnana tárrí pàk ka.