1 Lang Solomon malǝna ɓak ɓala mala Yahweh andǝ ɓala mala murǝm andǝ gir mǝnana kat Solomon earkiyice nǝ̀ ɓè ka, 2 Yahweh ɓǝsǝlǝ lǝmdǝ rǝì aban Solomon kǝla mǝnana lǝmdǝ rǝì a baní a Gibiyon ngga.* 3 Yahweh ne wi ama:

Ən ongŋǝna hiwi mò andǝ azǝmba mô, mǝnana a peǎ a ɓadǝmbam ngga. Ən tarna mǝnia yì ɓala a ɓê ka, ǝn tsǝ́ngŋǝ̀nà lullǝàm kàm tàtǝ́k, sǝ mǝsǝam andǝ ɓabumam ngga à nǝ̀ duk kam koya pwari.

4 Ɓǝ̀ we ka, awu nǝ gya aɓadǝmbam, kǝla mǝnana tárró Dauda gya aɓadǝmbam nǝ ɓabum mǝ'mǝsǝcaunì andǝ came kporong ngga, sǝ awu nǝ pàk gìr mǝnana kat ǝn banggo nǝma wu pê, sǝ awu nǝ kpata anê andǝ angguracau mem ngga, 5 mǝ nǝ tamsǝkusǝ buno-murǝm mala domurǝm mò amur Isǝrayila tàtǝ́k, kǝla mǝnana ǝn pacau aban tárró Dauda ama, <<A pà wu nǝ ɗwanyi kǝɓwa mò, amur buno-murǝm mala Isǝrayila ɗàng>> ngga.

6 Sǝama ɓǝ̀ we, ko amǝkeo, wun nǝ̀ pǝlǝàm nzǝm wun, pà wu nǝ̀ kpata anzongcau andǝ anê mem, mǝnana ǝn tsǝka wuni aɓadǝm wun raka, sǝ wun nǝ̀ kpata aɓea aɓakuli, wun nǝ̀ peri abania ka, 7 mǝ nǝ kasǝ Isǝrayila ɓǝ̀ purî ɓá nzali mǝnana ǝn pania wia ka,* sǝ ɓala mǝnana ǝn tarì ace lullǝam ngga, mǝ nǝ túrí ɓǝ̀ purî ɓamǝsǝam,* sǝ Isǝrayila ka, nǝ̀ dum nǝ ɓǝsǝkiban andǝ oalban aban aɓwapǝndǝa kat.* 8 Kat andǝ amani ama à gusǝlǝ mǝnia yì ɓala ka, nǝ̀ duk gìgí. Ɓwa mǝnana kat gyakuti nǝbani ka, nǝ̀ pàk-ndalì, sǝ nǝ̀ sonzǝî-nggê sǝ nǝ̀ na ama, <<Mana tsǝa sǝ Yahweh pàngnǝ nzali man andǝ ɓala mǝnia ani?>>* 9 Sǝ à nǝ̀ pà eare ama, <<Nda acemǝnana à bwakibuia arǝ Yahweh Ɓakuli malea, mǝnana pusǝ atárrià à purî ɓá nzali Masar ka, sǝ à kùr arǝ aɓea aɓakuli, à peri abania, sǝ à kpatea ka. Nda sǝ Yahweh yinǝ mǝnia yì gir'murmwana ka amuria.>>*

10 A masǝlǝata apǝlǝa lumi-ɓari, mǝnana twal Solomon sǝ ɓak aɓala mǝno ɓari, yì ɓala mala Yahweh andǝ palta mala murǝm, 11 sǝ Hiram murǝm mala amǝ Taya panî Solomon anggun-seda andǝ anggun-sapǝre, andǝ bolo-njengǝlan kǝla mǝnana ɓabumi earkiyice ka, Murǝm Solomon pè Hiram anggea-là lumi-ɓari aɓa nzali Galili. 12 Sǝama lang Hiram pur a Taya nǝ̀ ya sǝn anggea-là mǝnana Solomon pe wi ka, bumipwasǝ arǝia ɗàng. 13 Hiram bang ama, <<Mǝ'eambam, ya ulang anggea-là na mǝnia a pam ngga?>> Nda sǝ à tunǝna banì ama Kabul* ba yalung ngga. 14 Adyan ngga Hiram tasǝnì murǝm bolo-njengǝlan tyang á-tongno (5,000).

15 Mǝnia ka nda gìr mǝnana à tsǝì a gilǝe mala túró-púp mǝnana Murǝm Solomon cemi ace ɓak ɓala mala Yahweh andǝ palta male ka, andǝ Millo, andǝ sheran mana gumbǝli Urǝshalima, andǝ Hazo andǝ Megido, andǝ Geza ka. 16 (Firona murǝm Masar ka angŋa dǝmba warina nǝ munǝo arǝ Geza sǝ angŋǝni. Soani wi bǝsa pisǝni. Walna-lú amǝ'Kan'ana mǝnana à do aɓa nggea-lê ka, sǝ panî ɓoarnsarile, yì mālá Solomon kǝla ɓoro mala isǝban; 17 acemani ka, Solomon ɓǝsǝlǝ ɓak Geza.) Sǝ ɓak Bet-Horon mǝnana nda a ɓangŋaban ngga, 18 andǝ Baalat, andǝ Tadmo a njenza, 19 andǝ anggea-là mala tsǝk-gǝna mǝnana kat amale na ka, andǝ anggea-là mǝnana tsǝk awaru-pǝr andǝ apǝr male kàm ngga. Solomon ɓak gìr mǝnana kat ɓoari wi nǝ̀ ɓè ka a Urǝshalima, andǝ Lebano, andǝ ɓá nzali puppup mana nda aɓata yálban male ka.

20 Aɓwana na kam piu atà amǝ'Amor, andǝ amǝ'Hitti, andǝ amǝ'Periz, andǝ amǝ'Hivi, andǝ amǝ'Jebus, mana à ueo aɓa nzalinì, mǝnana amǝ Isǝrayila na raka. 21 Amǝkea mǝnana à ueo anzǝmia aɓa nzalinì, yia mǝnana amǝ Isǝrayila gandǝ tària ace kiɗikia kat-kat raka,* Solomon tsǝia púp ɓǝà duk aguro, sǝ anggo sǝ à pa ba yalung. 22 Sǝama Solomon tsǝk kǝɓwa atà amǝ Isǝrayila ɓǝ̀ duk guro ɗàng. Yia ka, à nda ka amǝ'lwa, amǝ'túró-ɓadǝmbi, andǝ amǝgulo-lwa male, andǝ amǝkok awaru-pǝr male, andǝ amǝpǝr male.

23 Solomon twal amǝgulo gbǝman-tongno nǝ lumi-tongno (550) sǝ tsǝia à nda ka amǝ'sǝntà-túrô mala Solomon; yia na à yálmúr aɓwana mǝnana à pàkkiyi túrè ka.

24 Zuku anzǝm mana ɓoarnsarile Firona purni nggea-là mala Dauda sǝ yina a ɓala male mana Solomon ɓakkî wi ka, nda Solomon ɓak Millo ka.

25 Kusǝ tàrú aɓa pǝlǝa mwashat Solomon kǝ pa ɓoro mala pisǝe kǝring andǝ ɓoro mala dotarǝu amúr gyangŋan mǝnana ɓakkî Yahweh ka. Kǝ paɓoro mala pisǝ muku-gìr loasǝ yele mǝ'rǝmɓoarne ateà, amúr gyangŋan mǝnana nda aɓadǝm Yahweh ka. Anggo sǝ Solomon yi masǝlǝ ɓak ɓalae.

26 Ɗǝm ngga Solomon gballì awaru-bǝsa a Eziyon-Geba, tù aban Elot, a kún Nggeamùr Nzuno a nzali Edom. 27 Sǝ Hiram tasǝ amǝtúró male ɓǝà kpapibu andǝ amǝ'samsǝa aɓa nggeamùr mǝnana à ndanǝ sǝlǝe amúr nggeamùr ka, atārǝia andǝ aguro mala Solomon. 28 À wari a Ofir sǝ à pwan tyang á-lum-nong-ine (14,000) mala bolo-njengǝlan abanì, sǝ à yinǝì Murǝm Solomon wi.