1Amurǝma 14

Lú mala muna-ɓwabura mala Jerobuam

1 A bàkú mǝno ka, Abija muna-ɓwabura mala Jerobuam nongkwánó.*14:1 Ɓalli gbal aɓa: 1Amur 14:12,17-18. 2 Pǝlǝa Jerobuam ne māmí ama, <<Ida, lo sǝ wu ɓosǝki rǝo,*14:2 Ɓalli gbal aɓa: 1Sam 28:8; 2Sam 14:2-3. ace mǝnana ɓǝà kǝa sǝlǝa ama a nda mālá Jerobuam raka, sǝ wu o a Shilo. Ahija mǝɓangnǝa mǝnana bangcau amuram ama mǝ nǝ duk murǝm amur aɓwana mǝnia ka, ndakam a banì. 3 Twal agbatali bǝredi lum, aɓea agbatali kyak, sǝ mur’nyi aɓa dù a buo, sǝ wu kya abaní. Yì ka nǝ̀ banggo gìr mǝnana nǝ̀ kum muna ka.>>

4 Mālá Jerobuam pǝlǝa pàk anggo. Lo wari a Shilo, a ɓala mala Ahija. Adyan ngga Ahija ka, kǝ sǝnban ɗang, acemǝnana gulǝna, sǝ amǝsǝi wuna.*14:4 Ɓalli gbal aɓa: 1Sam 3:2; 4:15. 5 Pǝlǝa Yahweh banggi Ahija ama, <<Sǝni, mālá Jerobuam ndya kǝ yiu ace ɗìbancau a bano amur muni ka, acemǝnana muna ka mǝrǝkwana na. Banggi wi cau mǝnana mǝ nǝ po wu banggi wi ka.>>

Lang ɓwame warina ka, ɓosǝki rǝì kǝla ɓè ɓwama na ɗàng. 6 Sǝama lang Ahija nǝ̀ ok kusǝi aban kútí a kunkurǝm ngga, bang ama, <<Kutio yiu, mālá Jerobuam. Palang sǝ a ɓosǝki rǝo kǝla ɓeɓwa ɗàng? Mim ngga, à tasǝam a bano nǝ bǝsacau mǝnana pà nǝ̀ ɓoarô ǒ raka. 7 Kyane, kya ne Jerobuam ama, mǝnia ka nda cau mǝnana Yahweh, Ɓakuli mala Isǝrayila kǝ bang ngga: <Ən loasǝo aɓalǝ aɓwana, sǝ ǝn tsǝo a duk múrû amur aɓwana mem Isǝrayila. 8 Ən san domurǝm arǝ ɓala mala Dauda sǝ ǝn pô.*14:8 Ɓalli gbal aɓa: 1Amur 11:28-31; 16:2. Sǝ we ka, a pa kǝla guro mem Dauda ɗàng, mǝnana bwal anzongcau mem, sǝ kpatam nǝ ɓabumi kat ka. Kǝgìr mǝnana nda pepè a mǝsǝàm ngga nda kǝ pak ka. 9 Ɓealɓikea mô mǝnana a pê ka kutini mala aɓwana mǝnana à ako-dǝmba [duk murǝm] ngga.*14:9 Ɓalli gbal aɓa: 1Amur 16:25,30 A pangŋǝni ɓamuro aɓea aɓakuli, *14:9 Sǝni aɓa: Pur 34:17 .aɓǝ̀nzál bolo; a lulbumam, sǝ a túrnǎm nǝ nzǝmó.*14:9 Ɓalli gbal aɓa: Nehe 9:26; Ang 50:17. 10 Ace mani ka, sǝni, mǝ ndo mǝ nǝ yinǝ gir’murmwana amur ɓala mala Jerobuam. Mǝ nǝ tsǝa koya muna-ɓwabura mǝnana à ɓǝlî Jerobuam a Isǝrayila ka nǝ̀ wǔ, ko guro ko mǝnana nda atàrǝì ka. Mǝ nǝ pisǝ ɓala mala Jerobuam kǝla mǝnana ɓwa kǝ pisǝ ciunda sheɓǝ̀ pina kat-kat ka. 11 Ɓwa mǝnana kat mala Jerobuam na, sǝ wǔ a nggea-là ka, anvwa nǝ̀ she; sǝ ɓwa mǝnana kat wǔ a ɓawanban ngga, anyal mǝnana à nda a bumkuli ka à nǝ̀ lì. Mim Yahweh ka ǝn nani.>

12 <<Adyan ngga lo, o a ɓala mò. Lang kusǝo nǝ̀ kùtí aɓa nggea-là ka, munê nǝ̀ wú.*14:12 Ɓalli gbal aɓa: 1Amur 14:17. 13 Sǝ Isǝrayila kat ka nǝ̀ ɓua aceì, sǝ à nǝ̀ tsǝkbani. Kǝ yì nǝmurǝì aɓalǝ amuna mala Jerobuam nda mǝnana à nǝ̀ tsǝì a ɓembe ka, acemǝnana kǝ yì nǝmurǝì atà amǝɓala mala Jerobuam nda mǝnana à kum ɓekǝ gìr aɓalǝi mǝnana mǝɓoarne na aban Yahweh Ɓakuli mala Isǝrayila ka.

14 <<Ɗǝm ngga, Yahweh nǝ̀ loasǝì ɓamúrì ɓè murǝm amur Isǝrayila, mǝnana nǝ̀ nggá yinǝ málá mala ɓala mala Jerobuam ngga. Sǝ mǝnia ka nǝ̀ kumban yalung, yale ado. 15 Yahweh nǝ̀ wal Isǝrayila gandǝa nǝ̀ ɓǝl-rak’rak kǝla mǝnana nzuno kǝ dǝurǝkio a mùrɓangŋa ka; Yahweh nǝ̀ u Isǝrayila būt aɓa nzali mǝɓoarne mǝnia pè akeâ ka,*14:15 Ɓalli gbal aɓa: Nggur 29:28. sǝ nǝ̀ mesǝia ɓǝà kya purrì Nggeasala Yiufǝretis, acemǝnana à lulbum Yahweh nǝ atondong mala Ashera mǝnana à peǎ ace peri abania ka.*14:15 Ɓalli gbal aɓa: Pur 34:14-15; Nggur 12:3-4. 16 Yì ka nǝ̀ vwakibuì arǝ Isǝrayila atàcau mala acauɓikea mala Jerobuam mǝnana Jerobuam peǎ, sǝ tsǝk Isǝrayila pàk acauɓikê atè ka.>>*14:16 Ɓalli gbal aɓa: 1Amur 12:28-33; 13:34; 15:30

17 Pǝlǝa mālá Jerobuam lo o, sǝ yiu a Tǝrza. Sǝ lang bik bankutio a ɓala ka, munê wǔ. 18 Sǝ Isǝrayila kat tsǝì a ɓembe, à ɓuè kǝla mǝnana cau mala Yahweh bangŋi nǝ kún guro male, yì Ahija mǝɓangnǝa ka.

Lú mala Jerobuam

19 Adyan ngga, acili atúró mala Jerobuam, a’lwa mǝnana lwa,*14:19 Ɓalli gbal aɓa: 1Amur 14:30; 2Acau 13:2-20 . andǝ yálmúrû male ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 20 Jerobuam yálmúr aɓwana apǝlǝa lumi-ɓari (20), pǝlǝa usǝlǝ atà akê. Sǝ muna-ɓwabura male Nadap duk murǝm a bancame male.*14:20 Ɓalli gbal aɓa: 1Amur 15:25-26.

Yálmúrû mala Rehobuam a Yahuda

21 Adyan ngga, Rehobuam muna-ɓwabura mala Solomon ngga nda murǝm a Yahuda.*14:21 Ɓalli gbal aɓa: 1Amur 12:1-24. Ndanǝ apǝlǝa lumi-ine-nong-mwashat (41) a ɓanza lang duk murǝm ngga, sǝ yálmúr aɓwana apǝlǝa lum-bwandǝ-tongno-nong-ɓari (17) a Urǝshalima, yì nggea-là mǝnana Yahweh twali aɓalǝ atau mala Isǝrayila kat ama nǝ̀ tsǝk lullǝi kam ngga. Lullǝ nggea Rehobuam nda Naama, ɓwa’Amon.*14:21 Ɓalli gbal aɓa: 2Acau 12:13.

22 Yahuda pàk gìr mǝnana mǝɓike na a mǝsǝ Yahweh ka, tsǝk Yahweh a mɓali kútì mǝnana akeâ tsǝì pàk ka nǝ acauɓikea malea mǝnana à pàkki wi ka. 23 Yià ɗǝm ngga à pàkkî ɓamuria andaka-ankúl sǝ à tamsǝki akúnamúrú mala peri,*14:23 Ɓalli gbal aɓa: Pur 23:24; Nggur 16:21-22. andǝ atondong mala Ashera amur koya mgbang-ban andǝ tǝ́r koya nggun pwala. 24 Ɗǝm ngga, aburana na kam aɓa nzalinì mǝnana à mak ɓamuria aɓa gyatarǝu mala ɓwabura-nǝ-nongnǝ-ɓwabura ace boalo ka arǝ andaka-ankúl mǝnia ka.*14:24 Ɓalli gbal aɓa: Nggur 23:17. Amǝ Isǝrayila kùtí aɓa pàkki amǝnia yì agir ɓeami kat mala aɓwapǝndǝa mǝnana Yahweh pǝria a ɓadǝmbia ka.

25 A tongnia pǝlǝa mala yálmúrû mala Murǝm Rehobuam ngga, Shishak murǝm Masar*14:25 Ɓalli gbal aɓa: 1Amur 11:40. yiu nǝ̀ lwa arǝ Urǝshalima. 26 Yi pwan agǝna-ramba mǝnana a ɓala mala Yahweh, andǝ agǝna-ramba mǝnana a palta mala murǝm ngga, umnǝia. Pwan koman kat. Pwan atongŋo bolo-njengǝlan mǝnana Solomon peǎ ka.*14:26 Ɓalli gbal aɓa: 1Amur 10:16-17. 27 Nda Murǝm Rehobuam pàk atongŋo bolo-bángŋá a kúnì amǝno, sǝ tsǝia a ɓabu amǝ’sàrǝ̀ban mala amǝ’yalban mǝnana à kǝ yál bankutio a palta mala murǝm ngga. 28 Sǝ koya pwari murǝm kútí a ɓala mala Yahweh ka, amǝ’yalban nǝ̀ twal antongŋo mǝnia ka a buia, sǝ nǝnzǝ́mò ka à nǝ̀ nyesǝia a kurǝm mala amǝ’yalban.

29 Adyan ngga, acili agir mǝnana à kumban aɓa yálban mala Rehobuam, andǝ atúró mǝnana kat peǎ*14:29 Ɓalli gbal aɓa: 2Acau 12:15-16. ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda. 30 Sǝ lwa camarǝ lo anre Rehobuam andǝ Jerobuam bà. 31 Rehobuam yi usǝlǝ atà akê, sǝ à tsǝk-luí a ɓembe-ɓa-tali atà akê a nggea-là mala Dauda. Lullǝ ngge nda Naama, ɓwa’Amon. Sǝ muna-ɓwabura male Abijam*14:31 Ɓalli gbal aɓa: 1Amur 15:1-8; 2Acau 11:20; 13:1-14*14:31 Yì ɗǝm ngga à tunǝi ama Abija duk murǝm a bancame male.