1Amurǝma 12

Domurǝm purî bù Rehobuam

1 Rehobuam wari a Shekem, acemǝnana akanó ka amǝ Isǝrayila kat yi ramǝna à nǝ̀ pe wi gara-murǝm. 2 Lang Jerobuam muna-ɓwabura mala Nebat nǝ̀ ok cau mǝno ka, nyàrî Masar, (acemǝnana yì ɗiɗyal ka ɓangŋa o a Masar kya ue kam ace apî bù Murǝm Solomon.) 3 Aɓwana-mǝgule mala Isǝrayila túrnaban atè ɓǝ̀ yiu, sǝ yì Jerobuam andǝ amǝ Isǝrayila kat, à wari atārǝia aban Rehobuam, à nǝ̀ nggá nacau nǝi. À banggi Rehobuam ama, 4 <<Tárró para sǝm twalo mǝdǝmbǝre amur sǝm. Ado ka, ɓǝ̀ awu nǝ amsǝa sǝm túró-gula mǝnana tsǝk sǝm a pě, sǝ awu nǝ amsǝa sǝm boalo-cemi mǝkǝ̀rkǝ́rnì mǝnana kasǝa sǝm ngga, sǝm nǝ̀ duk aɓwana aɓato nǝ ɓabum sǝm mwashat.>>

5 Rehobuam earia wia ama, <<Wu pam nongŋo tàrú mǝ nǝ pak ɗenyicau amur mǝnia yì cau ka. Anzǝm mǝno ka, wu nyare wu yiu ace ok eare mem amurí.>> Pǝlǝa aɓwana mesǝe à o.

6 Murǝm Rehobuam pǝlǝa alta dǒ andǝ aɓwana-mǝgule, mǝnana à pākiyi tárrí Solomon kwarkiru a do-yilǝmu male ka. Ɗia ama, <<Ya kwarkiru na wun nǝ̀ pam, arǝ cau mǝnana ɓoaro mǝ nyesǝì aɓwana mǝnia ka?>>

7 À banggi wi ama, <<Ɓǝ̀ yalung awu nǝ eare, awu nǝ duk mǝtúró-ɓadǝm aɓwana mǝnia, sǝ awu nǝ pea wia gìr mǝnana à zǝmba, sǝ awu nǝ nyesǝia wia cau mǝnana nǝ̀ ɓoaria wia ka, à nǝ̀ duk aɓwana aɓato tàtǝ́k.>>

8 Sǝ Rehobuam ngga ginǝki kwarkiru mǝnana aɓwana-mǝgule pe wi ka. A kún mani ka o aban alaggana mǝnana à ndàlo andǝi, mǝnana twalia ado à nda ka amǝ’kwarkiru male ka, kya ɗia mana nda sǝne malea amur ceì. 9 Ɗia ama, <<Mana nda kwarkiru ma’wun? Ya cau na mǝ nǝ nyesǝî aɓwana mǝnana à kǝ earce ama mǝ amsǝia wia twalo mǝdǝmbǝre mǝnana tárrám paria wia amúrià ka?>>

10 Alaggana eari wi ama, <<Mǝnia ka ndà cau mǝnana awu nǝ nggá nyesǝî aɓwana mǝnana à bang ama wu amsǝia wia twalo mǝdǝmbǝre mǝnana tárró paria wia amúrià ka: <Munabuam mǝkyauwe nyane kútì byal tárrám! 11 E, tárrám tsǝka wun twalo mǝdǝmbǝre amur wun, sǝ mǝ ndo mǝ nǝ tsǝka wun dǝmbǝrya amur ɓè. Yì ka kwak wun nǝ nkamso, sǝ mim ngga mǝ nǝ tāki wun nǝ agenye.> >>

12 Anzǝm anongŋo tàrú ka Jerobuam andǝ aɓwana kat nyare à nǝ̀ yia ok cau mǝnana Murǝm Rehobuam nǝ̀ nyesǝia wia, kǝla mǝnana akdǝmba nea wia ka. 13 Sǝ Murǝm Rehobuam ngga yi kpākiarǝ aɓwana mǝno. Ginǝki kwarkiru mǝnana aɓwana-mǝgule pè wi ka, 14 kpata kwarkiru mǝnana alaggana pe wi ka. Banggi aɓwana mǝno ka ama, <<Tárrám tsǝka wun twalo mǝdǝmbǝre, sǝ mim ngga, mǝ nǝ tsǝka wun dǝmbǝrya amur ɓè! Tárrám kwak wun nǝ nkamso, sǝ mim ngga, mǝ nǝ tāki wun nǝ agenye!>>

15 Murǝm ngga falǝnǝ cau mala aɓwana ɗàng. Mǝnia ka pě mala Yahweh na sǝ acau yi pǝlǝa ani ace mǝnana ɓǝà lùmsǝ cau mala Yahweh mǝnana ne Jerobuam muna-ɓwabura mala Nebat nǝ kún mǝɓangnǝa Ahija ɓwa Shilo ka.

Gauwa mala domurǝm

16 Lang Isǝrayila kat sǝni ama murǝm ginǝna ok cau malea ka, pǝlǝa à nyesǝî murǝm cau ama:

<<Mana nda kāmbe ma’sǝm aɓa Dauda?

Sǝm panǝ kǝ liɓala aɓa muna mala Jeshi ɗàng.

Wun amǝ Isǝrayila, koyan ngga ɓǝ̀ nyar aɓa gumli male.

We Dauda ka, ɗenyinǝ ɓala mò.>>

Nǝ mǝno ka koya ɓwa Isǝrayila ka nyar a ɓala male. 17 Sǝama Rehobuam yálmúr amǝ Isǝrayila mǝnana à ndanǝdo arǝ anggea-là mala Yahuda ka. 18 Pǝlǝa Murǝm Rehobuam túr Adoram mǝnana nda mǝ’sàrǝ̀ban amúr aɓwana mǝnana à tsǝia a túró-púp ka, sǝ Isǝrayila kat ɓukki nǝ atali à wal-luí. Lang cê yi bik ban Murǝm Rehobuam ngga, yàl aɓa waru-pǝr male tsuk-tsuk sǝ ɓangŋa akaurǝa o a Urǝshalima. 19 Anggo sǝ Isǝrayila dum nǝ mgbicau arǝ ɓala mala Dauda ba yalung.

20 Sǝ lang Isǝrayila kat ongŋǝna ama Jerobuam nyarǝna ka, à túrban à kya tunǝi ɓǝ̀ yiu a ban rambǝa mala ɓwabundǝa kat, sǝ à tsǝì duk murǝm amúr Isǝrayila kat. Kǝɓwa pà kàm mǝnana kpata ɓala mala Dauda ka ɗang, shekǝ tàu mala Yahuda nǝmurǝi.

21 Lang Rehobuam yina a Urǝshalima ka, ram ɓala mala Yahuda kat, andǝ tàu mala Benjami, aburana á-gbǝman-mwashat nǝ á-lumi-tongno-nong-tàrú (180,000), amǝ’lwa mǝnana à tarkia ka, ace kánǝ munǝo arǝ ɓala mala Isǝrayila, ace mǝnana ɓǝà nyesǝ domurǝm ɗǝm aban Rehobuam muna-ɓwabura mala Solomon. 22 Sǝama cau mala Ɓakuli yiu aban Shemaya ɓwa mala Ɓakuli ama: 23 <<Banggi Rehobuam muna-ɓwabura mala Solomon, murǝm mala Yahuda, andǝ ɓala mala Yahuda andǝ Benjami kat, andǝ acili aɓwana ama, 24 <Mǝnia ka nda cau mǝnana Yahweh bang ngga: Pà wu nǝ kánǝ lwa arǝ amǝ’eam wun, yia amǝ Isǝrayila ɗàng. Koyan ngga ɓǝ̀ nyar a ɓala male, acemǝnana mǝnia ka pě mema.> >>

Nda à kwakikiria arǝ cau mala Yahweh, sǝ koyan ngga nyare a ɓala male ɗǝm, kǝla mǝnana cau mala Yahweh bang ngga.

Jerobuam ɓak aɓǝ̀nzál mala bolo-njengǝlan

25 Pǝlǝa Jerobuam ɓak nggea-là Shekem a nzali múr ankono mala Ifǝrem sǝ duk kam. Sǝ purî banì ka, kya ɓak Penǝwel. 26 Sǝ Jerobuam bang a ɓabumi ama, <<Ɓǝ̀ ǝn tsǝkiram raka domurǝm ngga nǝ̀ nyar a bu ɓala mala Dauda. 27 Ɓǝ̀ aɓwana man o ace pà gìr’nkila aɓa ɓala mala Yahweh a Urǝshalima ka, ɓabum aɓwana man nǝ̀ gandǝ nyar ɗǝm aban ɓwamǝgule malea, aban Rehobuam murǝm Yahuda, sǝ à nǝ̀ wal-luem, à nǝ̀ nyar aban Rehobuam murǝm Yahuda.>> 28 Anzǝm tàɓala andǝ amǝ’pa-kwarkiru male ka, murǝm ɓak aɓǝ̀nzál mala muna-ndá ɓari nǝ bolo-njengǝlan. Sǝ banggi aɓwana ama, <<Wu sauna kǝ̀rkǝ́r arǝ nyarke ma’wun arǝ ká a Urǝshalima ace peri. Wu sǝni, wun amǝ Isǝrayila, aɓakuli ma’wun mǝnana à pusǝ wun, wu purî ɓá nzali Masar ka, à ndya ka.>>*12:28 Ɓalli gbal aɓa: Pur 32:4,8. 29 Pǝlǝa tsǝk mwashat a Betel, sǝ ɓè ka tsǝì a Dan. 30 Sǝ mǝnia yì gìr ka duk cauɓikea, acemǝnana aɓwana ateà kǝ o ace peri aɓadǝm ɓǝ̀nzál mala muna-ndá mǝnana a Betel ka, sǝ aɓea ka à kǝ o ɗār a Dan ace peri aɓadǝm ɓe ɓǝ̀nzál mala muna-ndá mǝno.

31 Jerobuam ɗǝm ngga ɓakki amgbangban-peri atà ankúl, sǝ twal apǝris aɓalǝ aɓwana kat, aɓwana mǝnana à pùr atau mala Lawi raka. 32 Sǝ tita lamsan a lum-nong-tongnoia pwari mala tongno-nong-tàruià zongŋo, kǝla lamsan mǝnana à kǝ pakkiɗire male a Yahuda ka, sǝ pāki agir’nkila amur gyangŋan. Mǝnia yì gìr ka pè a Betel; pà gìr’nkila aban aɓǝ̀nzál mala amuna-ndá mǝnana peǎ ka. Sǝ yì ɗǝm ngga, tsǝk apǝris arǝ amgbangban-peri atà ankúl mǝnana ɓakkia a Betel ka. 33 Aɓa tongno-nong-tàruià zongŋo, a lum-nong-tongnoia pwari, pwari mǝnana yì nǝmurǝi na twal a ɓabumi ka, Jerobuam wari aban gyangŋan mǝnana ɓè a Betel ka. Sǝ ham lamsan ace amǝ Isǝrayila, pǝlǝa gbàshìban gyangŋan ace pa ɓoro mala pisǝ mùrú-mǝrǝmɓoarne.